ރައްޔިތުން ނިންމަންވީ، ބްރިޖު އެޅި މީހުން ތޯ؟ ނޫނީ އަޅަން އުޅެ ނޭޅުނު މީހުން ތޯ؟ : ޑރ މުއިއްޒު
ދެ ސަރުކާރަކުން ބްރިޖު އެޅުމުގެ މަސައްކަތް ކުރިއަށް ގެންގޮސްފައިވާ ގޮތް ރައްޔިތުންނަށް ފެނިގެންދާނެ ކަމަށާއި، ވޯޓުދެއްވާނީ ބްރިޖުގެ މަސައްކަތް ވައުދުވިގޮތަށް ނިންމުނު މީހުންނަށްތޯ ނުވަތަ އެ ވައުދުވެ އެކަން ނުކުރެވުނު މީހުންނަށްތޯ ގޮތް ނިންމަވާއިރު، ރައްޔިތުން އެކަމާއި ވިސްނާވަޑައިގަތުމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ އައްޑޫ ސިޓީއަށް ޑރ މުއިއްޒު ކުރައްވާ ރިޔާސީ ކެމްޕޭނު ދަތުރުފުޅުގައި އައްޑޫ ސިޓީ ހިތަދޫގައި ބޭއްވި ކެމްޕޭނު ޖަލްސާގައި ރައްޔިތުން އެދޭގޮތަށް ހިތަދޫގައި ބްރިޖު އަޅުއްވާދެއްވާނެ ކަމަށް ވައުދުވެވަޑައިގެން ވާހަކަފުޅު ދައްކަވަމުން ނެވެ.
ޑރ މުއިއްޒު ވިދާޅުވީ ބްރިޖަކީ ހަމައެކަނި ބްރިޖެއް އަޅާލުމަށް ކުރާކަމެއް ނޫން ކަމަށެވެ. އެގޮތުން ބްރިޖަކީ ތަރައްގީގެ ކުރިމަގަށް އެޅޭ ފާލަމެއް ކަމަށާއި، އެއީ ސަރަހައްދީ ތަރައްގީއަށް ކުރާ "އިންވެސްޓުމަންޓެއް" ގެ ގޮތުގައި ޑރ މުއިއްޒު ސިފަކުރެއްވި އެވެ. އަދި އެއީ ދެކޮޅުޖެހޭ ސިޔާސަތުގެ ތެރެއިން އޭގެ ފައިދާ ލިބިގެންދާނެ އިންވެސްޓެއްކަން ޑރ މުއިއްޒު ފާހަގަކުރެއްވި އެވެ.
ޑރ މުއިއްޒު ވިދާޅުވީ ހިތަދޫ ބްރިޖު އެޅުމުގެ މަޝްރޫއު ކުރިއަށް ގެންގޮސްދެއްވާނެކަމުގެ ޔަގީންކަން ދެއްވާކަމަށެވެ.
ބްރިޖު އެޅުމުގެ ވާހަކަތައް އަދި، ބްރިޖު އެޅުމަށް ވައުދުވާއިރު، ދެ ސަރުކާރަކުން ބްރިޖު އެޅުމުގެ މަޝްރޫއު ކުރިއަށް ގެންގޮސްފައިވާ ގޮތް ރައްޔިތުން ވާނީ ވަރަށް ގާތުން ތަޖުރިބާކޮށްފައިވާނެކަމަށް ޑރ މުއިއްޒު ވިދާޅުވި އެވެ.
އަދި އެ ވާހަކައާއި ގުޅުވާ ޑރ މުއިއްޒު ވިދާޅުވީ ރައްޔިތުންނާއި ޤައުމުގެ ތަރައްގީއަށް ކުރަން ޖެހިފައިވާ މުހިންމު ގިނަ މަސައްކަތަކެއް ހުރި ނަމަވެސް ގައުމު ހަވާލުކުރާނީ ކޮން ބަޔަކާކަން ޚިޔާރުކުރައްވާނީ ރައްޔިތުން ކަމަށެވެ.
އެހެން ނަމަވެސް އެ ނިންމުން ނިންމަވާއިރު، ގައުމު ހަވާލުކުރާނީ ވައުދުވި ގޮތަށް ބްރިޖު އެޅި މީހުންނާއި ތޯ؟ ނުވަތަ އެ ވައުދުވެ ބްރިޖު އަޅަން އުޅެ ނޭޅުނު މީހުންނާތޯ ރައްޔިތުން އަމިއްލައަށް ސުވާލުކުރެއްވުމަށްފަހު ގޮތް ނިންމެވުމަށް ޑރ މުއިއްޒު ވަނީ އެދިވަޑައިގެންފަ އެވެ.
"ބްރިޖެއް އެޅުނުތަނާއި، އަޅަން އުޅެ ނޭޅުނުތަނާއި، ރައްޔިތުންނަށް ފެނިފައި އޮންނާނެ. އެހެންވީމަ ރައްޔިތުން ޚިޔާރުކުރަންވީ ބްރިޖު އެޅި ފަރާތްތޯ؟ އަޅަން އުޅެ ނޭޅި ފަރާތްތޯ؟ ގައުމު ހަވާލުކުރާނީ؟
ޑރ މުޙައްމަދު މުއިއްޒު
ޑރ މުއިއްޒު ވިދާޅުވީ ރައްޔިތުން ގޮތް ނިންމާ، ބްރިޖު އެޅުމުގެ މަސައްކަތް ނިންމި ފަރާތާއި ގައުމުގެ ހިންގުން ހަވާލުކޮށްފިކަމަށް ވާނަމަ އަދި ރައްޔިތުން ޕްރޮގްރެސިވް ކޮންގްރެސް ކޯލިޝަނަށް އިތުބާރުކޮށް ވެރިކަން ދީފިކަމަށް ވާނަމަ ހިތަދޫގައި ބްރިޖު އަޅާދެއްވާނެކަމުގެ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ.
ބްރިޖުގެ އިތުރުން ވެސް އައްޑޫ ސިޓީ ތަރައްގީކުރުމަށް ޕްރޮގްރެސިވް ކޮންގްރެސް ކޯލީޝަނުން ގިނަ ކަންތައްތަކެއް ކުރުމަށް ރާވާފައިވާ ކަމަށާއި، ރައްޔިތުން ފުރުސަތު ދެއްވައިފި ނަމަ އެކަންކަން ކުރާނެކަމުގެ ޔަގީންކަން ވެސް ދެއްވާކަމަށް ޑރ މުއިއްޒު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
