ތިލަމާލެ ބްރިޖު އަޅާ ނިންމާނީ އަޅުގަނޑުމެން: ޑރ މުއިއްޒު

ތިލަމާލެ ބްރިޖު އަޅާ ނިންމާ، އެ ބްރިޖުގެ ޚިދުމަތް ރައްޔިތުންނަށް ދޭން ފަށާނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ހުޅުދުއްފާރުގައި ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން އެމަނިކުފާނު ވަނީ ތިލަމާލެ ބްރިޖުގެ މަޝްރޫއު މި ސަރުކާރުން ކުރިއަށް ގެންދާގޮތުގެ ސަބަބުން ރާއްޖޭގެ އިޤްތިޞާދަށް ލިބޭ ގެއްލުންތަކާއި އަދި އެ ބްރިޖުގެ މަސައްކަތް ކުރިއަށް ދާ ސްޕީޑަށް ގިނަ ފާޑުކިޔުންތަކެއް އަމާޒުކުރައްވާފަ އެވެ.

ޑރ މުއިއްޒު ވިދާޅުވީ މި ސަރުކާރުން މާލެއާއި ތިލަމާލެ އާއި ދޭތެރޭގައި އަޅަން ފަށާފައިވާ ބްރިޖުގެ މަސައްކަތަށް 700 މިލިއަން ރުފިޔާގެ ލޯނެއް ނަގާ އޭގެ ތެރެއިން 190 މިލިއަން ޚަރަދުކޮށްފައިވާ ކަމަށެވެ. އެހެން ނަމަވެސް އެހާ ބޮޑު ޚަރަދެއް ކުރިއިރު ބްރިޖުގެ އެއްވެސް އެއްޗެއް ފެންނަން ނެތްކަމަށް ޑރ މުއިއްޒު ވިދާޅުވި އެވެ.

ޑރ މުއިއްޒު ވަނީ ރައީސް ޔާމިނުގެ ޒައާމަތުގައި އަޅުއްވާދެއްވި ސިނަމާލެ ބްރިޖާއި، މި ސަރުކާރުން ކުރިއަށް ގެންދާ ތިލަމާލެ ބްރިޖުގެ މަޝްރޫއުގެ އަގު އަޅާކިޔުއްވާފަ އެވެ. އެގޮތުން އެ މަޝްރޫއަށް 190 މިލިއަން ޚަރަދުކޮށްގެން ނިންމާ، ރައްޔިތުންނަށް ޚިދުމަތް ދޭން ފަށާފައިވާއިރު، މި ސަރުކާރުން އެއަށް ވުރެ ބޮޑު ޚަރަދުކޮށްގެން ކޮށްފައިވާ މަސައްކަތް ފެންނަން ނެތްކަމަށް ޑރ މުއިއްޒު ވިދާޅުވި އެވެ.

"އަޅާކިޔުމަށް، ރައީސް ޔާމީން ވެރިކަމުގައި މާލެއާއި ހުޅުލެއާއި ދޭތެރޭގައި އެޅި ބްރިޖު. އެއީ ވެސް 190 މިލިއަން ޑޮލަރު. 190 މިލިއަން ޑޮލަރު ޚަރަދުކޮށްގެން އެ އޮތީ ބްރިޖު ފެންނަން. މި ސަރުކާރުން އަޅާ ބްރިޖު 190 މިލިއަން ޑޮލަރަށް ވީގޮތެއް ނޭނގޭ ބްރިޖު ވެސް ނެތް"

ޕީޕީއެމް-ޕީއެންސީގެ ރިޔާސީ ކެންޑިޑޭޓު ޑރ މުއިއްޒު

ޑރ މުއިއްޒު ވިދާޅުވީ ރައްޔިތުންގެ ނަމުގައި ލޯނުތައް ނަގާ، އެ ނެގި ލޯނުތަކުން ކޮށްދެއްވުނު ކަމެއް ނުދައްކާ ދެވަނަ ދައުރެއް ހޯދުމަށް ރައްޔިތުންގެ ކުރިމައްޗަށް އައުމުން އެ ފައިސާއަށް ވީ ގޮތާއި ދޭތެރޭ ރައްޔިތުން ވަރަށް ސީރިއެސްކޮށް ސުވާލުކުރައްވަން ޖެހިވަޑައިގަންނަވާ ކަމަށެވެ.

ތިލަމާލެ ބްރިޖު މަތީގައި ދުއްވޭނެކަމަށް ސަރުކާރުން އެކި ފަހަރުމަތިން ތާރީހުތަކެއް ވެސް ދެއްވާފައިވާއިރު، މިހާތަނަށް އެ ދިން ތާރީހުތަކާއި އެއްގޮތަށް މަސައްކަތްތައް ކުރިއަށް ގެންދވިފައި ނުވާކަން ފާހަގަކުރައްވާ ޑރ މުއިއްޒު ވިދާޅުވީ މިހާ ޒިންމާދާރުކަން ކުޑަކޮށް ރައްޔިތުންގެ ފައިސާއިން ޚަރަދުކުރުން ވަރިހަމަކޮށްލައިގެން ތިއްބަވާނަމަ ސަރުކާރެއް ހޮވައިގެން ރައްޔިތުންނަށް ޚިދުމަތް ކުރާނެ ބަޔަކާއެކު ސޯޝަލް ކޮންޓްރެކްޓެއް ހަދައިގެން ތިބުމުގެ އެއްވެސް ބޭނުމެއް ނެތް ކަމަށެވެ. އަދި މިއީ ބަދަލުކުރަން ޖެހޭ ކަމެއް ކަމަށެވެ.

އެމަނިކުފާނު ވިދާޅުވީ އިތުބާރު ކުރައްވާ، ރައްޔިތުންނަށް ކުރިމަތިވެފައިވާ އެފަދަ މައްސަލަތައް ހައްލުކޮށްދިނުމުގެ ޒިންމާ ހަވާލުކުރައްވައިފި ނަމަ ތިލަމާލެ ބްރިޖުގެ މަޝްރޫއުވެސް ހަމަމަގަށް އަޅުވާ އެ މަޝްރޫއު ނިންމާނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ކަމަށެވެ. އަދި އެކަމުގެ ޔަގީންކަން ވެސް ދެއްވާކަމަށް ޑރ މުއިއްޒު ވިދާޅުވި އެވެ.ބްރިޖު

"މި މަޝްރޫވެސް ހަމަމަގަށް އަޅުވައިގެން ކުރިއަށް ގެންދާނީ އިރާދަކުރެއްވިއްޔާ އަޅުގަނޑުމެން. ރައްޔިތުންނަށް އެ މަޝްރޫއިން ވެސް އުފާ ފާގަތިކަން ގެނެސްދީ އެ ބްރިޖު ވެސް ނިންމަދޭނީ އިރާދަކުރެއްވިއްޔާ އަޅުގަނޑުމެން"

ޕީޕީއެމް-ޕީއެންސީގެ ރިޔާސީ ކެންޑިޑޭޓު ޑރ މުއިއްޒު

ތިލަމާލެ ބްރިޖު މަޝްރޫއަކީ އިންޑިއާ އިން ފައިސާގެ ބޮޑު ބައެއް އަދަދެއް ނަގައިގެން ކުރިއަށް ގެންދާ މަޝްރޫއެކެވެ. އިންޑިއާ ސަރުކާރުން ފަންޑުކޮށްގެން ތިލަމާލެ ބްރިޖު އަޅަނީ އިންޑިއާގެ 100 މިލިއަން ޑޮލަރުގެ ހިލޭ އެހީ އާއި 400 މިލިއަން ޑޮލަރުގެ ލޯނު ފައިސާއިންނެވެ.

ރާއްޖޭގައި ހުންނަ އިންޑިއާ އެމްބަސީން ބުނެފައިވާ ގޮތުގައި 400 މިލިއަން ޑޮލަރަކީ އެ ގައުމުން ރާއްޖެއަށް ދިން 800 މިލިއަން ޑޮލަރުގެ ކްރެޑިޓް ލައިންގެ ބައެކެވެ.

މިހާ ބޮޑު އަދަދެއް ނަގައިގެން އެ މަސައްކަތް ކުރިއަށް ގެންދާއިރު، ޝެޑިއުލާއި އެއްގޮތަށް މަޝްރޫއުގެ އަމަލީ މަސައްކަތް ނުދާކަން ފާހަގަކޮށް ގިނަ ބައެއްގެ ފާޑުކިޔުންތައް އަމާޒުވެފައިވާއިރު، އެ މަޝްރޫއަކީ މި ދައުރުގައި ނިންމުމަށް ރައީސް ޞާލިހު ވެވަޑައިގެންފައިވާ ވައުދުފުޅެއްކަން ވެސް ފާހަގަކޮށްލެވެއެވެ.