މާފުކޮށްދިން ފައިސާއިން 23 ހާސް އާއިލާއަށް ބޯހިޔާވަހިކަން ފޯރުކޮށްދެވޭނެ: ސައީދު
ޖުރިމަނާގެ ގޮތުގައި ރިސޯޓުތަކުން ސަރުކާރަށް ދައްކަން ޖެހޭ 4 ބިލިއަކަށް ވުރެ ގިނަ ރުފިޔާ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދާދި ފަހުން މާފުކޮށްދެއްވާފައި ވާއިރު، އެ ފައިސާއަކީ 23 ހާސް އާއިލާއަށް ބޯހިޔާވަހިކަން ފޯރުކޮށްދެވޭނެ އަދަދުގެ ފައިސާކަމަށް މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުޙައްމަދު ސައީދު ވިދާޅުވެއްޖެ އެވެ.
ހުޅުދުއްފާރުގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ސައީދު ވަނީ ރިސޯޓުތަކުން ދައުލަތަށް ދައްކަން ޖެހޭ ޖޫރިމަނާގެ ފައިސާ މާފުކޮށްދިނުމުން ދައުލަތަށް ލިބުނު ބޮޑު ގެއްލުމަށް އަލިއަޅުވާލައްވާފަ އެވެ.
ސައީދު ސިފަކުރެއްވި ގޮތުގައި އެއީ ރައީސް ޞާލިހު ދައުލަތަށްވީ ވަރަށް ބޮޑު ޚިޔާނާތެކެވެ. އެ ފައިސާއަކީ ރާއްޖޭގެ ރައްޔިތުންގެ ތަރައްގީގެ ކަންކަމަށް ބޭނުންކުރެވޭނެ ފައިސާކަން ސައީދު ފާހަގަކުރެއްވި އެވެ. އަދި އެ ފައިސާ ހޯދައިގެން ހިންގިދާނެ ބައެއް މަޝްރޫއުތަކަށް ވެސް ސައީދުގެ ވާހަކައިގައި އަލިއަޅުވާލެއްވި އެވެ.
އެގޮތުން އޭނާ ވިދާޅުވީ ރައީސް ޞާލިހު މާފުކޮށްދިން އެ ފައިސާއަށް އެތައް އެއާޕޯޓެއް އެޅޭނެކަމަށެވެ. ނުވިތާކަށް ރާއްޖެއަށް ކުރިމަތިބެފައިވާ އެންމެ ބޮޑު މައްސަލައަކީ ބޯހިޔާވަހިކަމަށް ވާއިރު، އެ ފައިސާއިން މަދުވެގެން 23 ހާސް އާއިލާއަށް ބޯހިޔާވަހިކަން ފޯރުކޮށްދެވޭނެކަމަށް ސައީދު ވިދާޅުވި އެވެ.
"އެ ކަނޑާލި، މާފުކުރި 4 ބިލިއަން ރުފިޔާއަކީ (4000 މިލިއަން ރުފިޔާ) އަކީ 23 ހާސް އާއިލާއަށް ބޯހިޔާވަހިކަން ފޯރުކޮށްދެވޭނެ ފައިސާ. މީ ވަރަށް ބޮޑު ޚިޔާނާތެއް"
ޕީއެންސީގެ ނައިބު ރައީސް ސައީދު
ސައީދު ވިދާޅުވީ 99 އަހަރަށް ރަށްތައް ކުއްޔަށް ދޫކުރާއިރު، އެ ރަށްތަކުން ރައްޔިތުންގެ ތަރައްގީއަށް ބޭނުންވާ ފައިސާ ހޯދުމަކީ ރައީސުލްޖުމްހޫރިއްޔާ ކުރައްވަން ޖެހިވަޑައިގަންނަވާ ކަމެއް ކަމަށެވެ.
އެހެން ނަމަވެސް އެ މަސްއޫލިއްޔަތު އަދާކުރެއްވުމުގެ ބަދަލުގައި ރައީސް ޞާލިހު އެ ކުރެއްވި ކަމަކީ ދައުލަތަށް ލިބެން އޮތް އާމްދަނީއެއް ކަނޑާލުންކަމަށް ސައީދު ވިދާޅުވި އެވެ. އަދި އެއީ ދައުލަތަށް ޚިޔާނާތްތެރިވުން ކަމަށް ސައީދު ތަކުރާރުކޮށް ވިދާޅުވި އެވެ.
ސައީދު ވިދާޅުވީ އެފަދައިން ދައުލަތަށް އާމްދަނީ ލިބެން އޮތް މަގުތައް ބަންދުކުރުމަކީ ރައީސުލްޖުމްހޫރިއްޔާ ލިބިވަޑައިގަންނަވާ ބާރެއް ނޫން ކަމަށެވެ.
އެހެން ނަމަވެސް 2022 ވަނަ އަހަރު ވެސް މިފަދަ ކަމެއް ކުރުމަށް ޤާނޫނަށް ބަދަލުގެނެސްގެން ރައީސް ޞާލިހު މަސައްކަތްޕުޅު ކުރައްވާފައިވާ ކަމަށާއި، މި ކަންކަމުން ރައީސް ޞާލިހު ވެވަޑައިގަންނަވާ ޚިޔާނާތުގެ މަންޒަރު ވަރަށް ސާފުކޮށް ފެނިގެންދާކަމަށް ސައީދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
