ޕްރީސްކޫލް ހިންގަން ކޮންމެ ރަށަކަށްވެސް ސަރުކާރުން ބޮޑު އެހީތެރިކަމެއް ދޭނަން: ޑރ. މުޢިއްޒު

ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވެރިކަމެއްގައި ރަށްރަށުގައި ޕްރީސްކޫލް ހިންގުމަށް މާލީގޮތުންނާއި އެނޫންވެސް ގޮތް ގޮތުން އެހީތެރިކަން ފޯރުކޮށްދެއްވާނެ ކަމަށް އެމަނިކުފާނު ވިދާޅުވެއްޖެއެވެ.

ރިޔާސީ އިންތިހާބުގެ ކެންޕެއިނަށް ރ. ރަސްގަތީމަށް ވަޑައިގެން އެރަށު ރައްޔިތުންނާ ބައްދަލުކުރައްވާ ވާހަކަ ދައްކަވަމުން މުޢިއްޒު ވިދާޅުވީ ހުރިހާ ރަށެއްގައިވެސް ހިނގަމުންދާ އަދި ފަށާފައި ހުއްޓިފައި ހުރި ހުރިހާ މަޝްރޫޢުއެއްވެސް އެމަނިކުފާނުގެ ވެރިކަމެއްގައި ރައްޔިތުން އެދޭގޮތަށް ނިންމަވައިދެއްވާނެ ކަމަށެވެ.

އެގޮތުން ރަސްގަތީމުގެ ބަނދަރުގެ މައްސަލަ ހައްލުކޮށްދީ، ނެރު ބަދަލު ކުރުމާއިއެކު، އޮޑިއެހެލާތަން މަރާމާތުކޮށް ރަނގަޅު އޮޑިއެހެލާ ތަނެއް ބިނާ ހަދައިދެއްވާނެ ކަމަށް މުޢިއްޒު ވިދާޅުވިއެެވެ.

މީގެ އިތުރުން އެ ރަށު ސިއްޙީ މަރުކަޒުގެ ފެންވަރު ރަނގަޅު ކޮށްދީ ސްކްލޫގައި ފެންވަރު ރަނގަޅު މަލްޓި-ޕާޕަސް ހޯލެއް ގާއިމް ކޮށްދެއްވާނެ ކަމަށް މުޢިއްޒު ވިދާޅުވިއެެވެ.

މީގެ އިތުރުން ރަސްގަތީމަށް ކޮށްދެއްވާނެ ކަމަށް ފާހަގަކުރެއްވި ކަންކަމުގެ ތެރޭގައި؛

- ކުނި މެނޭޖް ކުރުން ރަށުގެ ނިސްބަތުން ރަނގަޅު ނިޒާމެއް ގާއިމްކޮށްދިނުން

- ފުޓްސަލް ދަނޑުގެ ފެންސް މަރާމާތު ކުރުން

- މިސްކިތުން ފެން ފޭބުން ރަނގަޅު ކޮށްދިނުން

- އިންޖީނުގެ މަސައްކަތް ނިންމައިދިނުން

މީގެ އިތުރުން ރަސްގަތީމުގެ ނަރުދަމާއާއި ފެނުގެ ޚިދުމަތުގެ ނުނިމެނިސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހުޅުއްވައިދެއްވި ކަމަށް ރަށު ރައްޔިތުން ބުނަމުންދާކަން ފާހަގަކުރައްވައި، އެ މަސައްކަތްވެސް ޢަމަލީގޮތުން ނިންމައިދީ ރައްޔިތުންގެ އުންމީދު ހަގީގަތަކަށް ހައްދަވައިދެއްވާނެކަމަށް ވިދާޅުވިއެވެ.

މިއާއެކު މުޢިއްޒު ވިދާޅުވީ ކޮންމެ ރަށަކުވެސް މި ސަރުކާރުން ފަށާފައި ނުވަތަ ކޮށްދޭނަމޭ ބުނެ ނުނިމި ހުރި ގިނަ ކަންކަން ހުރި ކަމަށެވެ. އަދި އެހެން ވަނީ މި ސަރުކާރުގެ ދޯދިޔާ ސިޔާސަތުގެ ސަބަބުން ކަމަށްވެސް މުޢިއްޒު ވިދާޅުވިއެެވެ.

"ކޮންމެ މަޝްރޫޢެއްވެސް ޢާއްމުކޮށް މި ހައްދަވާފައިހުރި ގޮތަކީ މަޝްރޫޢު ފަށަން ކުންފުންޏަކާ ހަވާލުކޮށްފައި %15 އެޑްވާންސް ދެނީ. ދުވަސްކޮޅަކުން އެ ކުންފުނި މަސައްކަތް ހުއްޓާލާފައި ފައިބައިގެން ދަނީ. ދެން އަނެއްކާ އަނެއް ކުންފުންޏަށް މަސައްކަތް ހަވާލުކޮށްފައި %15 ދެނީ. އެކުންފުނިވެސް ދުވަސްކޮޅަކުން ދަނީ. މަޝްރޫއުއަކަށް އެގޮތަށް ތިން ހަތަރު ކޮންޓްރެކްޓަކުން ކަނޑައެޅީމާ، (މަޝްރޫއަށް ހަރަދުކުރަން ކަނޑައަޅާފައިވާ ފައިސާގެ) ވަރަށް ބޮޑު ބައެއް އޮންނަނީ ހުސްވެފައި. އެހެންވެގެން ހަގީގަތުގައި ގިނަ ރަށްރަށުގައި އެކަން ނުވެ މިއޮތީ.

ޑރ. މުހައްމަދު މުޢިއްޒު

މުޢިއްޒު އިތުރަށް ވިދާޅުވީ ރަސްގަތީމު ބޭބީ ނާސަރީ އާއި ނާސަރީގެ މައްސަލަވެސް ރައްޔިތުން ފާހަގަ ކުރައްވާފައިވާ ކަމަށާ، ސަރުކާރުގެ ރަސްމީ ނިޒާމުގައި މިހާރު ޕްރީ ސްކޫލް ހިމަނާފައި ނޯންނަ ކަމަށެވެ. އެހެންކަމުން އެކަމަށް ހެޔޮ ބަދަލެއް ގެންނަން މަޝްވަރާކުރަމުންދާ ކަމަށްވެސް މުޢިއްޒު ވިދާޅުވިއެެވެ.

"އެކަމަށް (ޕްރީ ސްކޫލް ހިންގުމަށް) އަޅުގަނޑުމެން ވަރަށް ބޮޑު ތަރުހީބެއް ދޭނަން. އަދި އިންސެންޓިވް ދޭނަން. ފަސޭހަކަމާ އެކީގައި އަމިއްލަ ފަރާތްތަކަށް ރަށްރަށުގައި، ބޭބީ ނާސަރީ، ނާސަރީ ހިންގުމަށް މަގުފަހި ކުރުމުގެ ސިޔާސަތު އޮންނާނެ. ދެން އެއީ ސީދާ، ރަސްމީކޮށް އަޅުގަނޑުމެންގެ އެލްކޭޖީ ޔޫކޭޖީ މިހާރު ހިންގާހެން ހިންގާ ކަމެއްގެ ގޮތުގައި ނިންމުމަށް އަދި ވަކިގޮތެއް ނޯންނާނެ. އެހެންނަމަވެސް، އިންސެންޓިވް ދީގެން، ޕްރައިވެޓް ސެކްޓާއަށް ރަނގަޅު ފެންވަރުގައި ރަނގަޅު ކުދިން، ޓީޗަރުންވެސް ޓްރެއިން ކުރުމާ މިކަންކަމަށް އެހީތެރިކަން ދީ، ސަރުކާރުގެ އެހީތެރިކަމާއެކު ހިންގޭ ކަމަކަށް ހެދުމަށް އަޅުގަނޑުމެންގެ ސިޔާސަތަކަށް އޮންނާނީ. އެގޮތަށް މިރަށުގައި ވެސް، ބޭބީ ނާސަރީ ހިންގަން ބޭނުންވާ ފަރާތަކަށް ފައިނެންޝިއަލީއާ އެގޮތަށް އިންސެންޓިވް ވެސް ދޭނަން." ޑރ. މުހައްމަދު މުޢިއްޒު ވިދާޅުވިއެވެ.