މި ހުކުރު މެންދުރު ކެއުމަށް ބަޓަރ ޗިކަން ހަދާލަން ބޭނުންތަ؟ މިއޮތީ ރެސިޕީ!

މިއަދު "ވޮއިސް" ގެ ބަދިގެއިން މި ގެނެސްދެނީ ވަރަށް މީރު ކޮށް ބަޓަރ ޗިކަން ތައްޔާރުކުރާނެ ގޮތެވެ. ބަޓަރ ޗިކަން އަކީ ފަރާޓާ އާއި އެކު ނުވަތަ ރޮށްޓާއި އެކު ކާލަންވެސް ވަރަށް މީރު ކެއުމެކެވެ.

ކުކުޅު މެރިނޭޓް ކުރުމަށް ބޭނުންވާތަކެތި:

500 ގްރާމް ބޯންލަސް ކުކުޅު

1 ސައިސަމުސާ ލޮނު (ނޫނީ ބޭނުން ވަރަކަށް)

1 ސައިސަމުސާ ގަރަމް މަސާލާ

1 ސައިސަމުސާ ތެޅި މިރުސް

½ ޖޯޑު ޕްލެއިން ޔޯގަޓް
1/2 ސައިސަމުސާ ލޮނުމެދު (ގާނާފައި)

1/2 ސައިސަމުސާ އިނގުރު (ގާނާފައި)

1 މޭޒުމަތީ ސަމުސާ ލުނބޯ ހުތް

ކުކުޅު ކޮޅު ފްރައި ކުރުމަށް ބޭނުންވާ ތަކެތި:

2 މޭޒުމަތީ ސަމުސާ ބަޓަރު
2 މޭޒުމަތީ ސަމުސާ ތެޔޮ

ސޯސްގަނޑު ތައްޔާރު ކުރުމަށް ބޭނުންވާ ތަކެތި:

1 ބޮޑު ފިޔާ (ތުނިކޮށް ކޮށާފައި)

6 ލޮނުމެދު (ތުނިކޮށް ކޮށާފައި)

5 ކާފޫރު ތޮޅި

2 ސައިސަމުސާ ތަންދޫރީ ހަވާދު

½ ޖޯޑު ޓޮމާޓޯ ޕިޔުރީ

1 ޖޯޑު ހެވީ ކްރީމް ނުވަތަ ބޯކިރު

1 ސައި ސަމުސާ މުގުރި މިރުސް 
ރަހަލާ ވަރަށް ލޮނު

50 ގްރާމް ކެޝޫ ނަޓް (ބޭނުންނަމަ)

50 ގްރާމް އަލްމަންޑް (ބޭނުންނަމަ)

2 މޭޒުމަތީ ސަމުސާ ބަޓަރ

1/2 ސައިސަމުސާ ގަރަމް މަސާލާ

ހަދާނެގޮތް

1. ކުކުޅު ކޮށާލާށެވެ. ކޮށާނީ ކުޅިމަހަށް ކަނޑުމަސް އާއްމުކޮށް ކޮށާ ސައިޒަށެވެ. އެއަށްފަހު، މެރިނޭޓް ކުރުމަށް ބޭނުންވާ ހުރިހާ ތަކެތި ބޮޑު ތަށްޓެއްގައި އެކުލަވައިލާށެވެ. ދެން އޭގެ ތެރެއަށް ކުކުޅުކޮޅު އަޅާލާ ރަނގަޅަށް އެއްކުރުމަށްފަހު މަތިޖަހާފައި ބަހައްޓާށެވެ. މިގޮތަށް ގިނައިރު ބަހައްޓަން ބޭނުންވާނަމަ ފްރިޖްގައި ބަހައްޓާށެވެ.

2. ތަވާ އުނދުން މައްޗަށް އުދާށެވެ. ތަވަޔަށް ރަނގަޅަށް ހޫނުވުމުން، ތެޔޮފޮދާއި، ބަޓަރުކޮޅު އަޅާށެވެ. ބަޓަރުކޮޅު ވިރުމުން، އޭގެ ތެރެއަށް މެރިނޭޓްކުރި ކުކުޅުކޮޅު އަޅާލާށެވެ. ކުކުޅުކޮޅު ރަނގަޅަށް ރޯފިލަންދެން ފުށުންޖަހަން ވާނެއެވެ. ހުރިހާ ކުކުޅުކޮޅުތައް ރޯފިލުމުން، އެހުރީ، ބަޓަރ ޗިކަންއަށް ބޭނުންވާނޭ ކުކުޅުކޮޅު ތައްޔާރުކޮށް ނިމިފައެވެ. ދެން ތަވާގެ ތެރެއިން ކުކުޅުކޮޅު ނަގާށެވެ.

3. ސޯސްގަނޑު ތައްޔާރުކުރުމަށް، ކުކުޅުކޮޅު ފްރައިކުރި ތާސް އުނދުންމައްޗަށް އުދާށެވެ. އޭގެ ތެރެއަށް، ފިޔާ އާއި ލޮނުމެދުކޮޅު އަޅައި ރަނގަޅަށް އެއްކޮށްލާށެވެ. ދެން، ޓޮމާޓޯ ފިއުރީކޮޅު އަޅައި ރަނގަޅަށް ކައްކާލާށެވެ. އެއަށްފަހު މުގުރި މިރުސްކޮޅާއި ތަންދޫރީ މަސާލާ އަދި ގަރަމް މަސާލާ އަޅައި އެއްކޮށްލާށެވެ.

އޭގެފަހުގައި ކެޝޫ ނަޓް އަދި އަލްމަންޑް އެޅުމަށްފަހު ފަނަރަ މިނެޓް ވަންދެން، މަތި ޖަހައިގެން ކައްކާލާށެވެ. މާ ހިކި ހެން ހީވާނަމަ ފެންފޮދެއް އަޅާލާށެވެ.  އުނދުން ބަހައްޓަންވާނީ، މަޑު ގިނީގައެވެ. ފަނަރަމިނެޓް ފަހުން، ލޮނުކޮޅު އެޅުމަށްފަހު، ރަނގަޅަށް އެއްކޮށްލާށެވެ. ސޯސްގަނޑު ރަނގަޅަށް ހިހޫވުމުން، މިކްސަރަށް އަޅާފައި ހިމުންވަންދެން މުގުރާލާށެވެ. އޭގެފަހުގައި ފުރާނާލާށެވެ.

4. ތަވާ އުނދުން މައްޗަށް އުދާށެވެ. މަޑު ގިނީގައި އުނދުން ބަހައްޓައިގެން، ފުރާނާލި ސޯސްގަނޑާއި ކާފޫރުތޮޅި އޭގެ ތެރެއަށް އަޅާށެވެ. ބޮކި ޖަހާފައި ކެކެން ފެށުމުން، ބަޓަރުކޮޅު އަޅާލާށެވެ. ބަޓަރުކޮޅު ވިރުމުން، އޭގެ ތެރެއަށް ހެވީކްރީމް ނުވަތަ ބޯކިރު އަޅައި، ރަނގަޅަށް އެއްކޮށްލާށެވެ. ބޮކި ޖަހާފައި ކެކެންދެން ހަލަމުން ގެންދަންވާނެއެވެ.

5. ސޯސް ގަނޑު ތައްޔާރު ވުމުން، އޭގެ ތެރެއަށް ފްރައި ކުރި ކުކުޅު ކޮޅު އަޅާލުމަށްފަހު ރަނގަޅަށް އެއްކޮށްލާށެވެ. ބޭނުންނަމަ، އުނދުންމަތީން ބޭލުމުގެ ކުރިން، އިތުރު ބަޓަރުކޮޅެއް (1 މޭޒުމަތީ ސަމުސާ ބަޓަރު) އަޅާލެވިދާނެއެވެ.

މިހާރު އެހުރީ މީރު ކޮށް ބަޓަރ ޗިކަން ތައްޔާރުކުރެވިފައެވެ.