ފަލަސްތީނުގެ އަޑުއުފުލުހުން ހުއްޓުވި މީހުން، ބާރު ކެނޑުމުން ފަލަސްތީނޭ ގޮވާނީ ގޮތެއްފޮތެއް ނެތީމަ: އަލީ ރަމީޒު

އާރާއި ބާރުގައި ތިބި ދުވަހު ފަލަސްތީނުގެ ހައްގުގައި އަޑުއުފުލަން ނިކުތުމުން އެކަން ހުއްޓުވި މީހުން، މިއަދު އާރާއި ބާރު ކެނޑުމުން ފަލަސްތީނުގެ ހައްގުގައި އަޑުއުފުލާނީ ގޮތެއްފޮތެއް ނެތުމުން ކަމަށް ދީނީ ހޭލުންތެރިކަން އިތުރުކުރުމަށް މަސައްކަތް ކުރަމުން އަންނަ އަލީ ރަމީޒު ވިދާޅުވެއްެޖެ އެވެ.

އަލީ ރަމީޒު މިފަދައިން ވިދާޅުވެފައި ވަނީ ފަލަސްތީނުގެ ރައްޔިތުންނަށް ކުރަމުންދާ އަނިޔާތަކާއި ދެކޮޅަށް ޒުވާނުންތަކެއް އިސް ނަގައިގެން އިންތިޒާމު ކުރި ސައިކަލު ބުރު އެމްޑީޕީގެ މި ސަރުކާރުން ހުއްޓުވާފައިވާކަން ހަނދާންކޮށްދީ ކުރެއްވި ޓްވީޓެއްގަ އެވެ.

އެ ޓްވީޓުގައި އަލީ ރަމީޒު ވަނީ އެ ސައިކަލުބުރު ހުއްޓުވި ހޯމް މިނިސްޓަރު އަދި ފުލުހުންގެ އިސްވެރިންނަށް ނުސީދާ ރައްދެއްދެއްވާފަ އެވެ.

ދިވެހީންނަކީ ޒަމާނުއްސުރެ ފަލަސްތީނުގެ ހައްގުގައި މަސައްކަތް ކުރަމުން އަންނަ، އެ ޤައުމަށް އެހީތެރިކަން ފޯރުކޮށްދޭ ގައުމެކެވެ. އެހެން ނަމަވެސް އަދާލަތު ޕާޓީގެ ރައީސް އިމްރާނުގެ ހޯމް މިނިސްޓަރުކަމުގައި ވަނީ، ފަލަސްތީނުގެ ހައްގުގައި އަޑުއުފުލުމަށް ދިވެހި ޒުވާނުން އިސް ނަގައިގެން އިންތިޒާމުކުރި ސައިކަލު ބުރަށް ހުރަސްއަޅާ އެ ހަރަކާތް ހުއްޓުވާފަ އެވެ.

އެކަމަށް އިޝާރާތްކުރައްވާ އަލީ ރަމީޒު ވިދާޅުވީ، އެ ދުވަހު އާރާއި ބާރުގައި ތިބެ ފަލަސްތީނުގެ ހައްގުގައި އަޑުއުފުލަން ދިވެހީން ނިކުތުމުން، އަޑުކަނޑުވާލަން މަސައްކަތް ކުރި މީހުން، މިއަދު އެމީހުންގެ އާރާއި ބާރު ކެނޑުމުން ފަލަސްތީނުގެ ހައްގުގައި އަޑުއުފުލަން ނިކުންނާނީ ގޮތެއްފޮތެއް ނެތުމުން ކަމަށެވެ.

"އާރާއި ބާރުގައި ހުރި ދުވަހު، އަނިޔާވެރި އިޒްރާއިލްގެ އުދުވާނުތަކާއި ދެކޮޅަށް ބޭއްވި ސައިކަލު ބުރު ހުއްޓުވާފައި، އެއްކަލަ ބާރުވެރިކަން ނެތެމުންދާ ދަނޑިވަޅުގައި ފަލަސްތީނު ފަލަސްތީނު ކިޔަމުން ނިކުންނާނީ ހަމަ އެއްވެސް ގޮތެއް ފޮތެއް ނެތީމަ

އަލީ ރަމީޒު

މިހާރުގެ ސަރުކާރުގައި 2021 ވަނަ އަހަރުގެ މެއި މަހު އިސްރާއީލުން ފަލަސްތީނަށް ދެމުން ގެންދާ ލާއިންސާނީ އަނިޔާ ތަކާއި ދެކޮޅަށް ޒުވާނުން އިސްނަގައިގެން ހުޅުމާލޭގައި ބޭއްވި ސައިކަލު ބުރު ބޭއްވިޔަ ނުދީ ފުލުހުން ހުރަސްއެޅުމާއި ގުޅިގެން އޭރުވެސް ގިނަ ފާޑުކިޔުންތަކެއް ހޯމް މިނިސްޓަރު އިމްރާނުއަށް އަމާޒުކޮށްފައި ވެއެވެ.

ފަަލަސްތީނުގެ ރައްޔިތުންނަށް އިޒްރާއިލުން ދެމުންދާ ހަމަލާތަކާއި ދެކޮޅަށް އިމްރާނު މިއަދު ޝުއޫރު ފާޅުކުރަމުންދާތީ ގިނަ ބަޔަކު ފާޑުކިޔުންތައް އަމާޒުކޮށްފައިވާއިރު، އިމްރާނު މިއަދު ޝުއޫރު ފާޅުކުރަމުން ދިޔަ ނަމަވެސް، އެއްވެސް އިޚްލާސްތެރިކަމެއް އޭނާގެ ކިބައިގައި ނެތްކަމަށް ގިނަ ބަޔަކު ދަނީ ސިފަކުރަމުންނެވެ.