ތަމްރީނު ދަތުރެއްގައި އިންޑިއާ ނޭވީގެ 3 އުޅަނދެއް ރާއްޖެ އަތުވެއްޖެ

އިންޑިއާއިން ޤައުމުން ބޭރުގައި ކުރިއަށްގެންދާ ތަމްރީނު ދަތުރުތަކުގެ ތެރެއިން، ދިވެހި އަސްކަރިއްޔާއާ ގުޅިގެން ތަމްރީނުތަކެއް ފުރިހަމަކުރުމަށް އެ ޤައުމުގެ ކަނޑުގެ ސިފައިންގެ ތިން އުޅަނދެއް މާލެ ބަނދަރުކޮށްފިއެވެ.

މާލެއަށް ބަނދަރުކުރި އުޅަނދުތަކަކީ އިންޑިއަން ނޭވީގެ ފަސްޓް ޓްރެއިނިންގ ސްކޮޑްރަންގައި ހިމެނޭ އައިއެންއެސް ތީރާއި، އައިއެންއެސް ސުޖާތާގެ އިތުރުން އައިސީޖީއެސް ސާރަތީ ކަމަށް، ރާއްޖޭގައި ހުންނަ އިންޑިއާގެ ހައިކޮމިޝަނުން މީސްމީޑިއާ މަންސަ "އެކްސް" ގައި ހާމަކޮށްފައިވެއެވެ.

އިންޑިއާ ހައިކޮމިޝަނުން މަޢުލޫމާތު ދިން ގޮތުގައި، މި ދަތުރުގެ މައިގަނޑު ބޭނުމަކީ އިންޑިއާ އަދި ދިވެހި އަސްކަރިއްޔާ ގުޅިގެން ޚާއްޞަ ތަމްރީނުތަކެއް ކުރިއަށް ގެންދިއުމެވެ. އަދި މި ދަތުރުގެ ސަބަބުން ދެ ޤައުމުގެ ދެމެދުގައި އޮތް ގުޅުމާއި، ޚާއްޞަކޮށް ކަނޑުގެ ސަލާމަތާއި ރައްކާތެރިކަމުގެ ދާއިރާއިން އޮތް ގުޅުން އިތުރަށް ބަދަހިވެގެންދާނެ ކަމަށް ވެސް އެ ކޮމިޝަނުން ފާހަގަކުރެއެވެ.

މި އުޅަނދުތައް މާލެ ބަނދަރުކުރުމުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ އެ އުޅަނދުތަކަށް ހޫނު މަރުޙަބާއެއް ކިޔާފައެވެ.

ދިވެހިރާއްޖެއާއި އިންޑިއާގެ ސިފައިން ގުޅިގެން އެންމެ ފަހުން އަސްކަރީ ތަމްރީނެއް ބާއްވާފައިވަނީ މިއަހަރުގެ ޖެނުއަރީ މަހުގެ ތެރޭގައެވެ. މީގެއިތުރުން، ރާއްޖެއާއި އިންޑިއާ އަދި ސްރީލަންކާ ގުޅިގެން "ދޯސްތީ" ގެ ނަމުގައި ސިލްސިލާކޮށް ކުރިއަށްގެންދާ އަސްކަރީ ތަމްރީނުތަކަކީ ވެސް މިފަދައިން ކޮންމެ އަހަރަކު ކާމިޔާބުކަމާއެކު ހިންގަމުން އަންނަ މުހިންމު ޕްރޮގްރާމެކެވެ.