ބަޖެޓުގެ 40 އިންސައްތަ ބަރޯސާކޮށްފައި އޮތީ ބޭރު ގައުމުތަކަށް، މީ ސަލާން ޖެހުން: އިލިޔާސް

މި އަހަރަށް ލަފާކޮށް ދައުލަތުން ހުށައެޅި ބަޖެޓުގެ 40 އިންސައްތަ ބޭރުގެ ހިލޭ އެހީއާއި ލޯނަށް ބަރޯސާކޮށްފައި އޮތުމަކީ ބަޖެޓުގައިވާ ކަންކަން ތަންފީޒުކުރުމަށް އޮތް ބޮޑު ގޮންޖެހުމެއްކަމަށް މަޖިލީހުގެ ހުޅުދޫ ދާއިރާގެ މެމްބަރު އިލިޔާސް ލަބީބު ވިދާޅުވެއްޖެ އެވެ.

އަންނަ އަހަރަށް ލަފާކޮށް ހުށައަޅާފައިވާ ބަޖެޓަށް މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އިލިޔާސް ވިދާޅުވީ ދައުލަތަށް ލިބޭނެކަމަށް އަންދާޒާކޮށްފައިވާ ހިސާބުތަކާއި ދޭތެރޭ ކަންބޮޑުވާކަމަށެވެ.

އެއީ ވޭތުވެދިޔަ އަހަރުތަކުގައި، ކޮންމެ އަހަރަކު ވެސް ހިލޭގެ އެހީގެ ގޮތުގައި ލިބޭނެކަމަށް ބޮޑެތި އަދަދުތައް ޖަހާފައި ހުރި ނަމަވެސް، އެއާއި ގާތްކުރާ އަދަދަކަށް ހިލޭ އެހީގެ ގޮތުގައި ލިބިފައި ނުވާތީ ކަން އޭނާ ފާހަގަކުރެއްވި އެވެ.

އޭގެ އިތުރުން އޭނާ ވިދާޅުވީ މިހާރު ހުށައަޅާފައިވާ ބަޖެޓަށް ބަލާއިރު، 40 އިންސައްތަ ބަރޯސާ ވަނީ ބޭރު ގައުމުތަކުން ދޭނެކަމަށް ލަފާކޮށްފައިވާ ލޯނާއި ހިލޭ އެހީއަށް ކަމަށެވެ. ބަޖެޓުގެ އެހާ ބޮޑު އިންސައްތައެއް ބޭރު ގައުމުތަކުން ލިބޭނެކަމަށް ބަލާ ހިމަނާފައި އޮތުމަކީ ބަޖެޓު ތަންފީޒު ކުރެވިދާނެ ކަމާއި މެދު ގިނަ ސުވާލުތަކެއް އުފެދޭ ކަމެއް ކަމަށް އިލިޔާސް ވިދާޅުވި އެވެ.

"50 ބިލިއަން ރުފިޔާގެ ބަޖެޓެއް ތަންފީޒުކުރުމަށް އަޅުގަނޑުމެންގެ ބަޖެޓުގެ 40 ޕަސެންޓު ޑިޕެންޑު ވަނީ ރާއްޖެއިން ބޭރުން ނަގާ ލޯނުތަކަށާއި، ހިލޭ އެހީއަށް. ކިހެނެއްތޯ މިހެން މި ދައުލަތުގެ ބަޖެޓު ހިންގަނީ؟ އަޅުގަނޑުމެންގެ ދައުލަތުގެ ބަޖެޓަކީ ބޭރު ގައުމުތަކުގެ ބޭންކުތަކަށް ސަލާން ޖަހައިގެން ހިންގާ ބަޖެޓަކަށް ވެ ނިމުނީ ނޫންތޯ؟"

މެމްބަރު އިލިޔާސް ލަބީބު

އިލިޔާސް ވިދާޅުވީ ބަޖެޓުގެ މިހާ ބޮޑު އަދަދެއް ބޭރު ގައުމުތަކަށް ބަރޯސާ ކުރުމަކީ އިޤްތިޞާދީ ގޮތުން މިނިވަން ގައުމެއްގެ ގޮތުގައި ރާއްޖެ އޮތުމަށް އެޅިގެންދާނެ ވަރަށް ބޮޑު ހުރަހެއް ކަމަށެވެ. އަދި ރާއްޖެއަކީ މިނިވަން ގައުމެއްގެ ގޮތުގައި ބޭއްވުމަށް، ދައުލަތުގެ ބަޖެޓު ބޭރު ގައުމުތަކަށް ބަރޯސާކޮށްފައި އޮތް އޮތުން ބަދަލުކުރަން ޖެހޭ ކަމަށް އިލިޔާސް ވިދާޅުވި އެވެ.

އިލިޔާސް ވަނީ ބަޖެޓުގައި ރިކަރެންޓު ޚަރަދުގެ ގޮތުގައި ފާހަގަކޮށްފައިވާ އަދަދުތަކަށް އަލިއަޅުވާލައްވާ އެކަމަށް ވެސް ފާޑުވިދާޅުވެފަ އެވެ.

ދައުލަތަށް ލިބޭ އާމްދަނީއަށް ވުރެ ރިކަރެންޓު ޚަރަދުތައް ބޮޑުކުރުމަކީ ކޮށްގެން ވާނެ ކަމެއް ނޫން ކަމަށާއި، އެކަމަށް ސަމާލުކަން ދީ، ކަންކަން ބަދަލުކުރެވިގެން ނޫނީ ރާއްޖޭގެ އިޤްތިޞާދީ ސިޔާދަތު ގާއިމް ނުކުރެވޭނެ ކަމަށް އިލިޔާސްގެ ވާހަކައިގައި ފާހަގަކުރެއްވި އެވެ.