ފުރަތަމަ ލޯކަލް އޮތޯރިޓީ ކުންފުންޏެއް އުފެއްދުމުގެ ހުއްދަ ތޮއްޑޫ ކައުންސިލަށް

ދިވެހިރާއްޖޭގެ ޢިދާރީ ދާޢިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އަލަށް ގެނެވުނު އިޞްލާހުތަކުގެ ދަށުން ފުރަތަމަ ރަޖިސްޓްރީކުރި ކުންފުންޏަކަށް ތޮއްޑޫ ކައުންސިލުން އުފެއްދި ލޯކަލް އޮތޯރިޓީ ކުންފުނި ވެއްޖެއެވެ.

މިކަމަށްޓަކައި އިކޮނަމިކް މިނިސްޓްރީގައި އިއްޔެ ބޭއްވި ރަސްމިއްޔާތުގައި ތޮއްޑޫ ކައުންސިލާއި ކުންފުނީގެ ރަޖިސްޓްރީ ހަވާލުކޮށްދެއްވީ އިކޮނޮމިކް މިނިސްޓަރ ފައްޔާޟް އިސްމާޢީލެވެ. އަދި ތޮއްޑޫ ކައުންސިލުގެ ފަރާތުން ރަޖިސްޓްރީއާއި ހަވާލުވެވަޑައިގަތީ ކައުންސިލްގެ ރަޢީސް އަޙުމަދު ކަރަމްއެވެ.

މި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޟް ވަނީ ލޯކަލް ކޮމިއުނިޓީތަކުގައި އިގްތިސާދީ ފުރުސަތުތައް ފަހިކޮށްދިނުމަށް ލޯކަލް އޮތޯރިޓީ ކުންފުނިތައް އުފެއްދުމަށް ކައުންސިލްތަކަށް ބާރު ދިނުމުގެ މުހިންމުކަން ފާހަގަކުރައްވާފައެވެ.

އަދި މި ލޯކަލް އަތޯރިޓީ ކޮމްޕެނީއާއި ބެހޭގޮތުން ތޮއްޑޫ ކައުންސިލުން ބުނީ އުންމީދަކީ މި ކޮމްޕެނީ މެދުވެރިކޮށް ކައުންސިލްގެ ތަރައްޤީގެ ޕްލޭންގައި ލިޔެވިފައިވާ ކަންކަންވީ އެންމެ ހަލުވި ބާރުމިނެއްގައިކޮށް ތޮއްޑޫގެ ރައްޔިތުންނަށް އެކަމުގެ ނަފާ ލިބިގެންދިއުން ކަމަށެވެ.

ކުންފުނިން ދޭނެ ހިދުމަތްތައް

• ބަނދަރު ބަލަހައްޓައި ބަނދަރުގައި އެހެން ބައެއް ހިދުމަތްތައް ދިނުން

• ކުނި މެނޭޖުކުރުމުގެ ހިދުމަތް ދިނުން

• މަގުތައް މަރާމާތުކުރުމުގެ ހިދުމަތް ދިނުން

• ގަސްގަހާގެހީގެ ނާސަރީއެއް ހިންގުން

• ދަނޑުވެރިކަމަށް ބޭނުންވާ ސާމާނު ފޯރުކޮށްދިނުން

.• ޓޫރިސްޓު ބީޗުތަކާއި ޕާކުތައް ބެލެހެއްޓުން

• ފައިބާ ނެޓްވޯކެއް ގާއިމްކުރުން

• ތޮއްޑޫގެ ޓޫރިޒަމް އިޝްތިހާރުކުރުމަށް މާކެޓިން އެންޑް ޕަބްލިކް ރިލޭޝަންސް ޑިޕާޓަމަންޓެއް އުފެއްދުން

• ކޮންވެންޝަން ސެންޓަރެއް ހެދުން

ދިވެހިރާއްޖޭގެ ޢިދާރީ ދާޢިރާތައް ލާމަރުކަޒީ އުޞޫލުން ހިންގުމުގެ ޤާނޫނަކީ ރައްޔިތުންނާއި ވީހާވެސް ގާތުން ޚިދުމަތްތައް ފޯރުކޮށްދިނުމުގެ މަޤުޞަދުގައި 2010ވަނަ އަހަރު ސަރުކާރުން އެކުލަވާލައި ޢަމަލުކުރަމުން އަންނަ ޤާނޫނެކެވެ