އުރީދޫ ފަން ރަން 2023ގެ ހަރަކާތްތައް މާދަމާ ފަށަނީ!

އުރީދޫ ފަން ރަންގެ ހަރަކާތްތައް މާދަމާ ހެދުނު ފަށާނެކަމަށް އުރީދޫ އިން ބުނެފިއެވެ.

މިކަމާ ގުޅިގެން އުރީދޫއިން ނެރުނު ނޫސްބަޔާނެއްގައި ބުނީ އުރީދޫ މޯލްޑިވްސްގެ އަހަރީ ފަން ރަން މާދަމާ ފަށާއިރު، ރާއްޖޭގައި ބާއްވާ ފުރަތަމަ ޑްރޯން ރޭހާއި، އެންމެ ބޮޑު އަދި އެންމެ އުފާވެރި 5 ކިލޯ މީޓާރު ދުވުމުގެ އިތުރުން ރާއްޖޭގެ މަގުބޫލު ފަންނާނުން ހިމެނޭ އުރީދޫ މިއުޒިކް ޝޯ ވެސް ކުރިއަށްދާނެ ކަމަށެވެ.

މިގޮތުން މި ހަރަކާތުގައި އެންމެ ފުރަތަމަ އޮންނާނީ ރާއްޖޭގައި ބާއްވާ އެންމެ ފުރަތަމަ ޑްރޯން ރޭހެވެ. މި ހަރަކާތް ކުރިއަށްދާނީ ހުޅުމާލޭ ސެންޓްރަލް ޕާކުގައި ހެނދުނު 8:00 އިން 11:00 އަށެވެ. މި ހަރަކާތުގައި ފައިނަލް ރޭހުގައި ދެ ކެޓަގަރީއެއް ކަމަށްވާ ސްކައި އެލީޓް (އެފްޕީވީ ޑްރޯން) ޕައިލެޓުންނާއި ސްކައި ވޯކާ (ޑީޖޭއައި ނޮން-އެފްޕީވީ ޑްރޯންސް) ގެ ޕައިލެޓުން ބައިވެރިވާނެ އެވެ. މި ރޭހަކީ އެންމެ ކުރު މުއްދަތެއްގެ ތެރޭގައި ނިންމާ ވާދަކުރާ ރޭހެއް ކަމަށް އުރީދޫ އިން މައުލޫމާތު ދެއެވެ. އުރީދޫ ޑްރޯން ރޭސް 2023ގެ ސްކައި ވޯކާ އަދި ސްކައި އެލީޓް ކެޓަގަރީގެ ބައިވެރިން ވާދަކޮށް 1 ވަނަ 2 ވަނަ އަދި 3 ވަނަ އަށް ދާ ފަރާތްތަކަށް ހާއްސަ އިނާމުތަކެއް ދިނުމަށް ހަމަޖެހިފައިވާ ކަމަށް ވެސް އުރީދޫ އިން ބުނެއެވެ.

އުރީދޫ ފަން ރަން އޮންނާނީ މާދަމާ ހަވީރު 3:30 އިން 6 އަށެވެ. އަލަށް ދުވާ ދުވުންތެރިންނާއި ތަޖުރިބާކާރު ދުވުންތެރިންގެ އިތުރުން ހުރިހާ އުމުރެއްގެ އާއިލާތަކަށާއި ރަހުމަތްތެރިންނަށް ވެސް މަޖާކޮށްލެވޭ ގޮތަށް ފަރުމާކޮށްފައިވާ މި ދުވުން އޮންނާނީ ހުޅުމާލޭގައި އެވެ. ކޮންމެ ކިލޯމީޓަރެއް ނިމުމުން ކުލައާއި ފެނާއި މަޖާ އޮބްސްޓޭކަލްސްތަކާ އެކު ތަފާތު ފަން ސްޓޭޝަންތައް ފެންނާނެ ކަމަށް އުރީދޫއިން މައުލޫމާތު ދެއެވެ. މި ދުވުމަކީ ޓައިމް އިވެންޓަކަށް ނުވާތީ، ފިނިޝިން ލައިނަށް ހިނގާފައި ނޫނީ ޖޮގްކޮށްފައި ނުވަތަ ނަށާފައިވިޔަސް، ބައިވެރިންނަށް ދުވުން ނިންމާލެވޭނެއެވެ. ދުވުން ނިންމާލާއިރު ފޯމް ޕާޓީއަކާއި ފިނިޝަރ މެޑަލްއަކާއި މިއުޒިކް ޝޯއަކާ އެކު ދުވުން ނިންމާލުމުގެ އުފާ އުރީދޫއިން ފާހަގަ ކުރާނެއެވެ.

މި ފަން ރަންގެ އެންމެ ފަހު އިވެންޓް ކަމުގައިވާ އުރީދޫ މިއުޒިކް ފެސްޓިވަލް ކުރިއަށް ދާނީ 22 ޑިސެމްބަރ 2023 ވާ ހުކުރު ދުވަހުގެ ރޭ 8:00 އިން ފެށިގެން 12 އަށެވެ. މި  މިއުޒިކް ޝޯގައި ރާއްޖޭގެ މަގުބޫލު އާޓިސްޓުތަކެއް  ޕާފޯމްކުރުމަށް ވަނީ ހަމަޖެހިފައެވެ. އޭގެ ތެރޭގައި ހިމެނެނީ ހަބޭސް ބޮޑުބެރު، ޑިޓިއުން، މީރާ، ޝަމްބެ އަދި އިންމަ، ޑިޖޭ ދީދު، ޒަކިއްޓެގެ އިތުރުން ޓްރަފިކް ޖޭމެވެ.

އުރީދޫ ފަން ރަންގެ ހަރަކާތްތަކާ ބެހޭ އިތުރު މައުލޫމާތު އުރީދޫގެ ފޭސްބުކް، އެކްސް އަދި އިންސްޓަގްރާމް މެދުވެރިކޮށް ބަލައިލެވޭނެ ކަމަށް އުރީދޫ މޯލްޑިވްސް އިން ބުނެއެވެ.