މޮރިޝަސް އިން ނިންމީ ތާކުންތާކު ނުޖެހޭ ނިންމުމެއް؛ ޗާގޯސް ހަވާލުކުރަންޖެހޭނީ ރާއްްޖެއާ: ރައީސް މުޢިއްޒު

ފޯޅަވަހީގެ މައްސަލާގައި މޮރިޝަސް އިން ރާއްޖެއާއެކު ސިޔާސީ ގުޅުން ކަނޑާލުމަކީ ވަރަށް ތާކުންތާކު ނުޖެހޭ ނިންމުމެއް ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

މޮރިޝަސްގެ ސިޔާދަތީ ބާރު ޗާގޯސް ރަށްތަކުގެ މައްޗަށް ނެތް ކަމަށާއި އެ ޖަޒީރާ ލިބެން ޖެހޭނީ ރާއްޖެއަށް ކަމަށް ދިވެހި ސަރުކާރުން ބުނާތީ މޮރިޝަސްއިން ރާއްޖެއާ ސިޔާސީ ގުޅުން ކަނޑާލަން ވަނީ ނިންމާފައެވެ.

ރައީސުލްޖުމްހޫރިއްޔާ މިއަދު ބޭއްވި ނޫސްވެރިންގެ ބައްދަލުވުމުގައި، އެކަމާ ގުޅޭ ގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން އެމަނިކުފާނު ވިދާޅުވީ،  މޮރިޝަސް އިން ރާއްޖެއާ ގުޅުން ކަނޑާލަން ނިންމި ކަމުގައި ވީނަމަވެސް، ހަގީގަތް ބަދަލު ނުވާނެ ކަމަށެވެ. އަދި ޗާގޯސް އަކީ މޮރިޝަސްއާ ހައްގުވާ ތަނެއް ނޫން ކަމަށްވެސް ވިދާޅުވިއެވެ.

މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަކީ ވަރަށް ތާކުންތާކު ނުޖެހޭ، ވަރަށް އިމެޗުއާ، ނައިވް ނިންމުމެއް. އެ ނިންމުން އެހެން ނިންމުމަކުން ހަގީގަތް ބަދަލެއް ނުވޭ. ރާއްޖެއާ ސިޔާސީ ގުޅުން ކަނޑާލިޔަސް މޮރިޝަސް އަށް ހައްގުނޫން ތަނެއް މޮރިޝަސް އަށް ހައްގެއް ނުވާނެ. އެއްވެސް ގައުމަކަށް ޗާގޯސް ހަވާލުކުރަންޏާ ހަވާލުކުރަންވާނީ އެތަނުގެ ހައްގުވެރިފަރާތް، ދިވެހިރާއްޖެއަށް. އެ ފެކްޓް ބަދަލެއް ނުވާނެ ގައުމަކުން މި ގައުމާ ގުޅުން ކަނޑާލުމަކުން.

ރައީސް ޑރ. މުޙައްމަދު މުޢިއްޒު

ރައީސް ވިދާޅުވީ، ރާއްޖެއާ ގުޅުން ކަނޑާލަން މޮރިޝަސްއިން ނިންމީ އެއްވެސް ވަރަކަށް މަޝްވަރާ ކުރުމެއްވެސް ނެތި ކަމަށެވެ. އެ ނިންމުމުގެ ސަބަބުން ރާއްޖޭގެ ސްޓޭންޑް ބަދަލު ނުވާނެ ކަމަށާ، ރާއްޖެ ކުރިއަށްދާނީ މޯލްޑިވްސް ފަސްޓް ޕޮލިސީ އާ އެކުގައި ކަމަށްވެސް ވިދާޅުވިއެވެ.

ރައްޔިތުންގެ މަޖިލީހުގެ ހިނގަމުން މިދާ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެ މައްސަލާގައި ކުރީގެ ރައީސް އިބްރާހިމް މުހައްމަދު ސޯލިހް މޮރިޝަސްގެ ބޮޑުވަޒީރަށް ފޮނުއްވެވި ސިޓީ އަނބުރާ ގެންނެވުމަށް ނިންމަވާފައިވާކަން އިއުލާން ކުރައްވާފައެވެ.

މީގެ އިތުރުން ޗާގޯސްގެ ރަށްތަކުގެ ހަގީގީ މިލްކުވެރިންނަކީ ދިވެހިންކަން ތާރީހީ ހެކިތަކުން އެނގެން އޮތް ކަމަށް ވިދާޅުވެ އިނގިރޭސި ބޮޑުވަޒީރަށް ރައީސް މުއިއްޒު ވަނީ ސިޓީއެއް ފޮނުއްވާފަ އެވެ.