ހުޅުމާލެ ފޭސް ދޭކުން މާލެއަށް 900 އެއްހާ ކުދިން ކިޔަވަން ދަތުުރުކުރޭ: މިނިސްޓަރު

ހުޅުމާލޭގެ ދެވަނަ ފޭސްއިން އެކަނިވެސް މާލެއަށް 900 އެއްހާ ކުދިން ކިޔަވަންދާކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.

ޕީއެސްއެމް ނިއުސްއާ ވާހަކަދައްކަވަމުން މިނިސްަރު ވިދާޅުވީ، ހުޅުމާލޭ ފޭސް ދޭއްގެ ސްކޫލްތަކުން ޖާގަ ނުލިބިގެން އެ ސަރަހައްދުން އެކަނިވެސް 900 އެއްހާކުދިން މާލޭގެ ސްކޫލްތަކަށް ކިޔަވަން އަންނަކަމަށެވެ. އަތްވާ އަދި ވާރޭ ވެހުނު ނަމަވެސް ސްކޫލަށް ދާންޖެހޭ ދުވަސްތަކުގައި ހުޅުމާލެ ފޭސް ދޭކުން މާލެއަށް ގިނަ ދަރިވަރުން ސައިކަލްގައި އަންނަކަން މިނިސްޓަރު ވަނީ ފާހަގަކުރައްވާފައެވެ.

މިނިސްޓަރު ވިދާޅުވީ ހުޅުމާލެ ފޭސް ދޭއްގައި މިހާރު އިމާރާތްކުރަމުންދާ ޝަހީދު އަލީ ސްކޫލް ނިމުމާއެކު އަންނަ އަހަރު އެ ހުރިހާ ކުދިންނަށް ޖާގަ ކަށަވަރުވެގެން ދާނޭކަމަށެވެ. ފޭސް ދޭއްގެ ޓަވަރު 16 އަދި 15 ކައިރީ އިމާރާތްކުރަމުންދާ އެ ސްކޫލް ނިންމައި ހުޅުވުމަށް ތައްޔާރުވަމުންދަނީ އަންނަ ޖެނުއަރީމަހުއެވެ.

މިނިސްޓަރު ވިދާޅުވީ ސްކޫލްގެ ހުރިހާ މަސައްކަތެއް ނިންމައި އަންނަ އަހަރުގެ ޖެނުއަރީމަހުގެ ތެރޭގައި އެ ސްކޫލުގައި ކުދިން ކިޔަވަން ފަށާނޭކަމަށެވެ.

ސްކޫލް މަސައްކަތުގެ ޕްރޮގްރެސް ވަރަށް ރަނގަޅަށް ދަނީ. އެޑިއުކޭޝަން މިނިސްޓްރީގެ ފަރާތުން ކޮންމެ ހަފްތާއަކު ސްކޫލްގެ މަސައްކަތް ކުރިއަށްދާގޮތް ވަރަށް ރަނގަޅަށް ބަލަމުންދަނީ

މިނިސްޓަރު ވިދާޅުވިއެވެ

މިނިސްޓަރު ވިދާޅުވީ ސްކޫލްގެ މަސައްކަތް ނިންމުމަށް ކަނޑައަޅާފައިވާ ތާރީހަށް މަސައްކަތް ނިންމާލެވޭނޭކަމަށް ކޮންޓްރެކްޓަރުގެ ފަރާތުން ޔަގީންކަންދީފައިވާކަމަށެވެ.

އެޑިއުކޭޝަން މިނިސްޓްރީން ވަނީ ޝަހީދު އަލީ ސްކޫލަށް ބަދަލުވާން ބޭނުންވާ ދަރިވަރުންނަށް މިދިޔަ މަހު އެ ފުރުސަތު ހުޅުވާލާފައެވެ. މިކަމާ ގުޅޭގޮތުން މިނިސްޓަރު ވިދާޅުވީ ޝަހީދު އަލީ ސްކޫލަށް ވަނުމަށް އެދި ވަރަށް ބޮޑު ޑިމާންޑެއް އެބައޮތްކަމަށާއި، ފޭސް ދޭކުން އެ ސްކޫލަށް ވަނުމަށް ބޭނުންވާ ހުރިހާ ކުދިންނަށް ޖާގަ ލިބޭނޭކަމަށެވެ.