މަޖިލީހަށް މެމްބަރުން ހާޒިރުނުވެ، ޖަލްސާތައް ނުބޭއްވުމަކީ،ސަރުކާރުން ބޭނުންހާ ކަމެއް ކުރަން ދޫކޮށްލުން: އީވާ
ރައްޔިތުންގެ މަޖިލީހުގެ ޖަލްސާތަކަށް މމެމްބަރުން ހާޒިރުނުވެ، ޖަލްސާތައް ނުބޭއްވުމަކީ، ސަރުކާރުން ބޭނުންހާ ކަމެއް ކުރަން ދޫކޮށްލުން ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله ވިދާޅުވެއްޖެ އެވެ.
އީވާ މިފަދައިން ވިދާޅުވީ މިއަދު ގެ ޖަލްސާ ފަށާ ގަޑި ޖެހުނު އިރުވެސް ކޯރަމް ހަމަނުވެގެން މިއަދުގެ ޖަލްސާ ނިންމާލުމާއި ގުޅިގެން ކަންބޮޑުވުން ފާޅުކުރައްވަމުން އެކްސް ގައި ކުރެއްވި ޕޯސްޓެއްގައިއެވެ. މިގޮތުން އީވާ ވިދާޅުވީ، ސަރުކާރު ޖަވާބުދާރީކުރުމާ ދައުލަތުގެ ކަންކަމަށް ފާރަވެރި ވުމަކީ ރައްޔިތުންގެ މަޖިލީހުގެ އެންމެ ބޮޑު ޒިންމާ އާއި ބާރު ކަމަށް ވާއިރު މަޖިލީހަށް މެމްބަރުން ހާޒިރު ނުވެ ޖަލްސާތައް ނުބޭއްވުމަކީ ސަރުކާރުން ބޭނުންހާ ކަމެއް ކުރަން ދޫކޮށްލުން ކަމަށެވެ.
"ސަރުކާރު ޖަވާބުދާރީކުރުމާ ދައުލަތުގެ ކަންކަމަށް ފާރަވެރި ވުމަކީ ރައްޔިތުންގެ މަޖިލީހުގެ އެންމެ ބޮޑު ޒިންމާއާ ބާރު. ރައްޔިތުންގެ މަޖިލީހަށް މެމްބަރުން ހާޒިރު ނުވެ، ޖަލްސާތައް ނުބޭއްވުމަކީ، ސަރުކާރުން ބޭނުންހާ ކަމެއް ބޭނުންހާ ގޮތަކަށް ކުރާން ދޫކޮށްލުން."
އީވާ ވިދާޅުވިއެވެ.
އީވާ މިފަދައިން ވިދާޅުވެފައިވާއިރު، މިއަދުގެ 9 ޖަހާއިރު ފަށަން އޮތް ޖަލްސާ އަށް ކޯރަމް ހަމަނުވާތީ މިއަދުގެ ޖަލްސާގެ ރިޔާސަތު ބެލެހެއްޓެވި ހަނިމާދޫ ދާއިރާގެ އެމްޑީޕީ މެމްބަރު އަބްދުލް ގަފޫރު މޫސާ ޖަލްސާ ފެށުން 09:30 އަށް ވަނީ ފަސްކޮށްފައެވެ. މިއީ މި ހަފްތާގައި ބޭއްވި ފުރަތަމަ ޖަލްސާ ނަމަވެސް މިއަދުގެ ޖަލްސާއަށް ހާޒިރުވީ އެންމެ 11 މެންބަރުންނެވެ.
އެންމެ ފަހުން 9:30 ގައި ފެށިއިރު ވެސް ޖަލްސާ ފަށަން ބޭނުންވާ ގާނޫނީ އަދަދަށް މެންބަރުން ހަމަވެފައި ނުވާތީ، ގަފޫރު ވިދާޅުވީ ޖަލްސާ ބޭއްވެން ނެތް ކަމަށާއި ދެން ޖަލްސާއެއް ބޭއްވޭނެ ތާރީޚެއް ފަހުން އިއުލާނުކުރައްވާނެ ކަމަށެވެ.
ގާނޫނުއަސާސީ ބުނާ ގޮތުން މަޖިލީހުގެ ޖަލްސާ ފެށޭނީ 22 މެންބަރުން ތިބެގެންނެވެ.
މިއަދު މަޖިލީހުގެ ޖަލްސާގެ އެޖެންޑާ ގައި ސަރުކާރުގެ ފަރާތުން ހުށަހަޅާފައިވާ ދަތުރު ރާވައި ހިންގުމުގެ ޚިދުމަތް ދިނުމާބެހޭ ބިލާއި ރިއަލް އެސްޓޭޓް ވިޔަފާރީގެ ފުރަތަމަ ކިޔުން ހިމެނެއެވެ. އަދި ރާއްޖޭގެ ހާރިޖީ ސިޔާސަތު ހަރުދަނާ ކުރުމަށް ގޮވާލާ ހުޅާހަޅާފައިވާ ގަރާރަށް މިއަދު ގެ ޖަލްސާގައި ބަހުސް ކުރުމަށް ވެސް އޮތީ ހަމަޖެހިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
