އެމްއައިބީ ސަރވިސް ސެންޓަރުތަކުގައި ސެލްފް ސަރވިސް ކިއޮސްކްސް ތަޢާރަފުކޮށްފި
ލިޔުންތެރިޔާ
ޚަދީޖާ އަރުފާ
މޯލްޑިވްސް އިސްލާމިކް ބޭންކް (އެމްއައިބީ) އިން އެ ބޭންކުގެ ސަރވިސް ސެންޓަރުތަކުގައި ސެލްފް ސަރވިސް ކިއޮސްކްސް ތަޢާރަފުކޮށްފިއެވެ.
މި ކިއޮސްކްތައް ބެހެއްޓިފައިވަނީ ވެރިރަށް މާލެ އާއި ކައިރީގައިވާ ހުޅުމާލޭގައި ހުރި އެމްއައިބީގެ ސަރވިސް ސެންޓަރުތަކުގައެވެ.
އަދި ރާއްޖޭގެ އެކި އަތޮޅުތަކުގައިވެސް ކިއޮސްކް ޚިދުމަތްތައް ތަޢާރަފުކުރުމުގެ މަސައްކަތް ކުރިއަށްދާކަން ބޭންކުން ޔަގީންކޮށްދީފައިވެއެވެ.
މިއީ ކަސްޓަމަރުންނަށް ސަރވިސް ސެންޓަރުތަކުގައި އަމިއްލައަށް ބޭންކުގެ ޚިދުމަތްތައް ބޭނުންކުރެވޭނެކަން ކަށަވަރުކުރުމަށް ބެހެއްޓިފައިވާ ކިޔޮސްކްސް ކަމަށް އެމްއައިބީއިން މައުލޫމާތު ދެއެވެ.
އެމްއައިބީ އިން ބުނެފައިވަނީ އެ ބޭންކުގެ މުވައްޒަފުން ސަރވިސް ސެންޓަރުތަކުގައި ތިބޭނެ ކަމަށާއި، ކިއޮސްކްތަކުން ލިބެންހުރި ޚިދުމަތްތައް ބޭނުންކުރުމުގައި ކަސްޓަމަރުންނަށް އެހީތެރިވުމަށް ތައްޔާރަށް ތިބޭނެ ކަމަށެވެ.
ޚިދުމަތްތައް ފުޅާކޮށް، ކަސްޓަމަރުންނަށް ފަސޭހަ ބޭންކިންގ ނިޒާމެއް ފޯރުކޮށްދިނުމުގެ ގޮތުން، އެމްއައިބީ އިން ވޭތުވެދިޔަ އަހަރުތަކުގައި ގިނަ އޮފަރތަކާއި ޚިދުމަތްތައް ތަޢާރަފުކޮށްފައިވެއެވެ. ބޭންކުގެ ގިނަ ޚިދުމަތްތައް އޮންލައިންކޮށްވެސް ލިބެން ހުރުމުން، ރާއްޖޭގެ ކޮންމެ ކަންކޮޅަކުން ވެސް ކަސްޓަމަރުންނަށް މި ޚިދުމަތްތައް ލިބިގަނެވެއެވެ.
މީގެ އިތުރުން، ބޭންކުން ވަނީ ރާއްޖޭގެ އެކި ސަރަޙައްދުތަކުގައި ސަރވިސް ސެންޓަރުތައް ޤާއިމުކޮށްފައެވެ. އަދި އިތުރު ތަންތަނަށް ފުޅާކުރުމުގެ މަސައްކަތް ދަނީ ކުރަމުންނެވެ. އެމްއައިބީގެ ރިމޯޓް ސޭލްސް ޓީމުގެ މުވައްޒަފުން ވިޔަފާރިތަކަށާއި އަމިއްލައަށް ބޭންކަށް ޒިޔާރަތްކުރަން ނުކުޅެދޭ ކަސްޓަމަރުންނަށްވެސް ޒިޔާރަތްކުރެއެވެ.
އެމްއައިބީގެ އިންޓަރނެޓް ބޭންކިންގ ޚިދުމަތްތައް ލިބިގަނެވޭނީ އެ ބޭންކުގެ ފައިސާނެޓް މެދުވެރިކޮށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
