ރައީސް ޑރ.މުއިއްޒު ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫޢު އިއުލާނުކޮށްފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫޢު އެޗްޑީސީން މިރޭ އިއުލާނުކޮށްފިއެވެ.

އަދުގެ ސަރުކާރުގެ ބޯހިޔާވަހިކަމުގެ މަޝްރޫޢު އިއުލާނު ކޮށްފައިވަނީ، އެޗްޑީސީން މިރޭ، އިފްތިތާހުކުރި އިންގިލާބީ ޕްރޮޖެކްޓްތަކުގެ ތެރެއިންނެވެ. ހުޅުމާލެއަށް އިންގިލާބީ ބަދަލުތަކެއް ގެނުވާނެ ފަދަ ގޮތަކަށް ފަރުމާކޮށްފައިވާ ""ޓްރާސްފޯމިންގ ޓުމޯރޯ" މަޝްރޫޢު ތައާރަފްކޮށްފައިވަނީ އެކަމަށްޓަކައި ހުޅުމާލޭ ސެންޓްރަލް ޕާކްގައި ބޭއްވި ހަފްލާއެއްގައެވެ.

އަދުގެ ސަރުކާރުގެ ފުރަތަމަ ހައުސިން މަޝްރޫޢު އިއުލާނުކުރިއިރު، 2 ކޮޓަރިއާއި 3 ކޮޓަރީގެ އެޕާޓްމަންޓާއެކު ދެ ސޯޝަލް ހައުސިން ޔުނިޓް ގާއިމްކުރުމަށް ވަނީ ހަމަޖެހިފައެވެ. މީގެ ތެރެއިން ތިން ކޮޓަރީގެ 1020 އެޕާޓްމަންޓް ހެދިގެންދާއިރު، ދެ ކޮޓަރީގެ 680 އެޕާޓްމަންޓް ހެދިގެންދާނޭކަމަށް އެޗްޑީސީން ބުނެއެވެ.

މި ހައުސިން ޔުނިޓް ތަރައްޤީކޮށް ނިމޭއިރު، ޕާކްކުރާނެ ޖާގަ އާއި، ވިޔަފާރީގެ އުސޫލުން ހިންގުމަށް ތަންތަން ދިނުމަށް ވަނީ ނިންމާފައެވެ.

މީގެ އިތުރުންވެސް އެޗްޑީސީން ވަނީ އަންނަން އޮތް ޖީލަށް ފޯރުކޮށްދިނުމަށް ފާހަގަކޮށްލެވޭ މަޝްރޫޢުތައް ކުރިއަށްގެންދިއުމަށް ނިންމާފައިވާކަން އިއުލާނުކޮށްފައެވެ.

މީގެ ތެރޭގައި ސްމާޓްވެއަާ ހައުސް ކޮމްޕްލެކްސް އާއި ފަރުކޮޅުފުށީގައި ތަރައްޤީކުރުމަށް ހަމަޖެހިފައިވާ އެޕާޓްމަންޓްތަކާއި ހޮޓާތައް ހިމެނެއެވެ. މީގެ އިތުރުން އެޗްޑީސީގެ ޒަމާނީ އޮފީހެއް ތަރައްޤީކުރުމާއި، އެސްއެމްއީ އިމާރާތެއް އެޅުމުގެ އިތުރުން ގަލުފަޅުގައި ލަގްޒަރީ ވިލާތަކެއް ތަރައްޤީކުރުންވެސް ހިމެނެއެވެ.

މި ރަސްމިއްޔާތުގައި ވާހަކަދައްކަވަމުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ، މި މަޝްރޫޢުއާއެކު ޤައުމުގެ އިގްތިސާދު މުޅިން އައު ހަރުފަތަކަށް ޖެހިލައި ހުޅުމާލޭގެ ރައްޔިތުންގެ ދިރިއުޅުމަށް ފަސޭހަ ފުރުސަތުތަކެއް ލިބިގެންދާނޭ ކަމަށެވެ.

ތަފާތު އެކިއެކި ދާއިރާތަކުން އިފްތިތާހުކުރެވުނު މި މަސައްކަތްތަކަކީ ޖުމްލަގޮތެއްގައި އެޗްޑީސީގެ ކުރިއެރުމާ ހުޅުމާލޭގައި ދިރިއުޅޭ ހުރިހާ ރައްޔިތުންނަށް ފަސޭހަކުރުމާއި އަދި ވިޔަފާރިވެރިންނަށް ހާއްސަ ގޮތެގައި ފަހިފުރުސަތުތަކެއް މި ޕްރޮޖެކްޓްގެ އަލީގައި ފަހިކޮށްދިނުން.

ފަޒުލް ވިދާޅުވިއެވެ.

ފަޒުލް ވިދާޅުވީ އެޗްޑީސީގެ މި މަޝްރޫޢުގެ ދަށުން އެސްއޯއީ ބިލްޑިން ކުރިއަށްއޮތްތަނުގައި ވިޔަފާރިހިންގުމަށް އޮފީސް ލިބިދާނޭ ކަމަށާއި އޭގެ އިތުރުން އެޗްޑީސީގެ ޒަމާނީ އޮފީސް އިމާރާތުގެ ސަބަބުން ބޭރުގެ ފަރާތްތަކަށާއި ރައްޔިތުންގެ އިތުރުން އެޗްޑީސީގެ މުއައްޒަފުންނަށްވެސް ވަރަށްބޮޑު ފަސޭހަތަކެއް ލިބިގެންދާނޭ ކަމަށެވެ.

މީގެ އިތުރުން މި ރަސްމިއްޔާތުގައި ވާހަކަދައްކަވަމުން ފަޒުލް ވިދާޅުވީ، ހުޅުމާލޭގެ ފޭސް 3 ހިއްކުމުގެ މަސައްކަތް މިއަދާހަމަޔަށް އާއިރު މަޑުޖެހުނުކަން ގަބޫލުކުރައްވާ ކަމަށާއި، ނަމަވެސް އެކަމުގައި ގޮންޖެހުންތަކެއް ކުރިމަތިވި ކަމަށެވެ.

ނަމަވެސް މިއަދު މިހާހިސާބަށް އާއިރު ގިނަ ގޮންޖެހުންތަކެއް ޚަދައްތުކޮށް ނިމިފައިވާކަމަށާއި، މިގޮތުން ބިންވެރިޔާ ސްކީމުގެ ހުޅުމާލެ ފޭސް 3 ގެ ގޯތި ލިބިފައިހުރި ރައްޔިތުންނަށް ހައްގުވާ ގޯތިތައް އަންނަ އަހަރުގެ ޖެނުއަރީމަހުގެ ނިޔަލަށް ދޭނޭކަން އޭނާ ފާހަގަކުރެއްވިއެވެ.