ސިފައިންނާއި ފުލުހުން ރިޓަޔަރ ކުރުމަށްފަހު ވަޒީފާ އަދާކުރާނަމަ އަންގަން އެދިއްޖެ
ސިފައިންނާއި ފުލުހުންގެ އިތުރުން ސިވިލް ސަރވިސްގެ ވަޒީފާތަކުން ރިޓަޔަރ ކުރުމަށްފަހު ދައުލަތުގެ އެހެން ވަޒީފާއެއް އަދާކުރާ ފަރާތްތަކުން އެ މައުލޫމާތު ހިއްސާކުރުމަށް ޕެންޝަން އޮފީހުން މިއަދު އެދިއްޖެއެވެ.
މިގޮތަށް އެދިފައިވަނީ ސިފައިންގެ ރިޓަޔަރމަންޓް ގަވާއިދާއި، ފުލުހުންގެ ރިޓަޔަރމަންޓް ގަވާއިދު އަދި ދިވެހި ސިވިލް ސަރވިސްގެ ގަވާއިދަށް ޑިސެންބަރު 2025 ގައި ގެނެސްފައިވާ އިޞްލާޙުތަކާ ގުޅިގެންނެވެ.
މި އިޞްލާޙުތަކުގައިވާ ގޮތުން، ރިޓަޔަރމަންޓް ޢިނާޔަތް ލިބޭ ގޮތަށް ދައުލަތުގެ ވަޒީފާއަކުން ރިޓަޔަރ ކޮށްފައިވާ ފަރާތެއް، އަލުން ދައުލަތުގެ މަގާމަކަށް އިންތިޚާބުވެއްޖެ ނަމަ ނުވަތަ ދައުލަތުގެ ވަޒީފާއެއް ނުވަތަ ސަރުކާރު ހިއްސާވާ ކުންފުންޏެއްގެ ވަޒީފާއެއް އަދާކުރަން ފަށައިފިނަމަ، އެ ވަޒީފާގައި ދެމިހުންނަ މުއްދަތުގައި މަހުން މަހަށް ދެވޭ ރިޓަޔަރމަންޓް އިނާޔަތް މެދުކަނޑާލެވޭނެއެވެ.
މި އައު އުސޫލަށް އަމަލުކުރަން ފެށުމަށް ހަމަޖެހިފައިވަނީ ޖަނަވަރީ 2026 އިން ފެށިގެންނެވެ. އެހެންކަމުން، ރިޓަޔަރ ކުރެއްވުމަށްފަހު ދައުލަތުގެ އެހެން ވަޒީފާއެއް މިހާރު އަދާކުރައްވަމުން ގެންދަވާ ފަރާތްތަކަށް، ޖަނަވަރީ 2026 އިން ފެށިގެން ރިޓަޔަރމަންޓް އިނާޔަތް ދިނުން މެދުކަނޑާލެވޭނެ ކަމަށް ވަނީ އިޢުލާންކޮށްފައެވެ. އަދި މިފަދަ ފަރާތްތަކަށް އަލުން އިނާޔަތް ދޭން ފަށާނީ، ފަހުން އަދާކުރި ވަޒީފާ ނުވަތަ މަގާމުން ވަކިވާ މަހާ ޖެހިގެން އަންނަ މަހުން ފެށިގެންނެވެ.
އެހެންކަމުން، ރިޓަޔަރ ކުރެއްވުމަށްފަހު ދައުލަތުގެ އެހެން ވަޒީފާއެއް މިހާރު އަދާކުރައްވަމުން ގެންދަވާ ފަރާތްތަކުން ނުވަތަ އެފަދަ ވަޒީފާއަކުން 2026 ޖަނަވަރީ މަހުން ފެށިގެން ވަކިވާ ފަރާތްތަކުން، އެ މައުލޫމާތު ލަސްނުކޮށް ހިއްސާކުރުމަށް ޕެންޝަން އޮފީހުން ވަނީ އަންގާފައެވެ.
މައުލޫމާތު ހުށަހެޅުމަށް ބޭނުންވާ ފަރާތްތަކުން ތިރީގައިވާ ގޫގުލް ފޯމު މެދުވެރިކޮށް ނުވަތަ [email protected] އަށް އީމެއިލް ކުރެއްވުމަށް ވަނީ އެދިފައެވެ.
ދިވެހި ފޯމު ލިންކު: https://forms.gle/dNotZkbagiucwszk7
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
