ރަސްމާލެއަކީ އަޅުގަނޑު ހިޔާލުކޮށްފައި އޮތް މަޝްރޫއެއް: ރައީސް ޔާމީން

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ކުރިއަށް ގެންދަވާ ބޯހިޔާވަހިކަމުގެ އެންމެ ބިޔަ މަޝްރޫޢު، 'ރަސްމާލެ' މަޝްރޫއަކީ، އެ މަނިކުފާނު ވެސް ހިޔާލު ކުރައްވާފައި އޮތް މަޝްރޫއެއް ކަމަށް ކުރީގެ ރައީސް އަބްދުالله ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.

ޕީއެންފް އޮފީހުގައި ރޭ ބޭއްވި ޖަލްސާއެއްގައި ޕޯޑިއަމްގައި ވާހަކަދެއްކެވި ބޭބޭފުޅުންނަށް ސުވާލުތައް އަމާޒުކުރައްވަމުން ޔާމީން ވަނީ މާލޭގެ ރައްޔިތުންނާއި މާލޭގައި ދިރިއުޅެމުންދާ ރައްޔިތުންނަށް ވެސް އެންމެ ބޮޑަށް ކުރިމަތިވެފައިވާ މައްސަލައަކީ ބޯހިޔާވަހިކަމުގެ މައްސަލަ ކަމަށެވެ.

އަދި އެ މައްސަލަ ހައްލުކުރުމަށް މި ސަރުކާރުން ފަށާފައިވާ  ރަސްމާލޭގެ މަޝްރޫއާ މެދު ސުވާލު ނުއުފައްދާ ކަމަށްވެސް އޭނާ ވިދާޅުވި އެވެ.

"ޝައްކެއްވެސް ނެތް. ބޯހިޔާވަހިކަން ހައްލުކުރުމުގެ ގޮތުން ރަސްމާލޭގެ ނަމުގައި މަޝްރޫއެއް ފެށިގެން އެބަދޭ. އެއަށް އެއްޗެއް ދަންނަވާކަށްނޫން. އެއީ، އަޅުގަނޑު ވެސް ހިޔާލުކޮށްފައި އޮތް މަޝްރޫއެއް،"

ކުރީގެ ރައީސް އަބްދުالله ޔާމީން އަބްދުލްގައްޔޫމް

މިއާއެކު، ޔާމީން ވިދާޅުވީ އެ މަޝްރޫއު ކުރިއަށް ގެންދަވަން އެމާނިކުފާނު ނިންމެވީ ހުރިހާ ކަމެއް ހުއްޓައިލާފައި ނޫން ކަމަށެވެ.

އެގޮތުން މާލެއާއި ހުޅުމާލޭގައި ވެސް ބައިވަރު ހުސްބިންތައް އެބަހުރި ކަމާއި އަދި އިތުރު ބިންތައް އުފެއްދޭނެ ގޮތްތަށް ހުޅުމާލޭގައިހުރި އިރު، މާލެއިން ބިން ހުސްކުރެވޭނެ ގޮތްތައް ވެސް އެބަހުރި ކަން ޔާމީން ފާހަގަކުރެއްވިއެވެ.

އެހެން ކަމުން، ސަރުކާރަށް އެންމެ ޚަރަދު ކުޑަވާނީ މުޅިން އާ ސަހަރެއް ހިއްކައިގެން އެ ތަނުގައި މީހުން އާބާދުކުރަންތޯ ނޫނީ މިހާރު ވެސް ހުޅުމާލެއާއި މާލޭގައި ހުރި ބިންތަކުގައި އުސްކޮށް އިމާރާތްކޮށް، ލިފްތައް ހަރުކުރުންތޯ ޔާމީން ވަނީ ސުވާލު އުފައްދަވައިފައެވެ.

"މާލެއާއި ހުޅުމާލޭގައި މިހާރު ހުރި ބިންބިމުން މި މަސައްކަތް ފައްޓައިފި ކަމަށްވަންޏާ، ދައުލަތަށް މުޅިން އާ ސަހަރެއް ހިއްކައިގެން މި ކަން ކުރުމަށް ވުރެ ޚަރަދު ކުޑަވާނެތޯ،"

ކުރީގެ ރައީސް އަބްދުالله ޔާމީން އަބްދުލްގައްޔޫމް

ފުށިދިއްގަރުފަޅު މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.

ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އާ ހަވާލުކޮށްގެން ފުށިދިއްގަރުފަޅު ހިއްކުމުގެ މަސައްކަތް 8 މަސް ދުވަސްތެރޭ އެއްކޮށް ހިއްކައި ނިމޭނެ ކަމަށް ސަރުކާރުން ވަނީ ބުނެފައެވެ.

މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.