މަސްތުވާތަކެތި ގެއްލޭ މައްސަލާގައި އެމްއެންޕީން ކަންބޮޑުވުން ފާޅުކޮށްފި

ރާއްޖެއަށް އެތެރެކުރެވޭ މަސްތުވާތަކެތި އަތުލައިގަންނަ ފަހުން، އެ ތަކެއްޗާއި، އެތަކެތި އެތެރެކުރި މީހުން ކަމާބެހޭ ފަރާތްތަކުގެ ބެލުމުގެ ދަށުގައި ވަނިކޮށް، މަސްތުވާތަކެތި ގެއްލުމުގެ ހާދިސާތައް ތަކުރާރުކޮށް ހިނގާފައިވާތީ މޯލްޑިވްސް ނެޝަނަލް ޕާޓީއިން ކަންބޮޑުވުން ފާޅުކޮށްފިއެވެ.

އެގޮތުން އެ އެމްއެންޕީން ނެރުން ނޫސް ބަޔާނުގައި، ޤައުމީ ތަރައްޤީއަށް އޮތް އެންމެ ބޮޑު ހުރަހަކީ ގިނަ ޒުވާނުން މަސްތުވާތަކެތީގެ މަސްތުން ނުނެއްޓިގެން އުޅޭ އުޅުން ކަމަށެވެ. އަދި މިއީ ޤައުމާއި ރައްޔިތުންގެ މަސްލަޙަތާ ނުހަނު ބޮޑަށް ގުޅިފައިވާ ކަމެއް ކަމަށް އެ ޕާޓީއިން ދެކޭކަމަށް އެޕާޓީން ނެރެފައިވާ ނޫސްބަޔާނުގައި ބުނެފައިވެއެވެ.

މީގެ އިތުރުން، ދައުލަތުގެ އިދާރާއެއްގެ ބެލުމުގެ ދަށުގައި ވަނިކޮށް، ރާއްޖެ އެތެރެކުރުން މުޅިން މަނާ މިފަދަ އެއްޗެއް ވީނުވީއެއް ނޭނގި ނިޒާމުން ގެއްލުމަކީ މުޅި ދިވެހި ދައުލަތުގެ ސަލާމަތާ ރައްކާތެރިކަން ބެލެހެއްޓުމުގެ ޒިންމާ ޙަވާލުވެފައިވާ މުހިއްމު މުއައްސަސާތަކުގެ ޤާބިލްކަމާ، ނަޒާހަތްތެރިކަމާ މެދު ސުވާލު އުފެދޭފަދަ ކަމަކަށް ވާތީ، މިފަދަ ކަމެއް ތަކުރާރުވިޔަ ނުދިނުމަށް އަވަސް ފިޔަވަޅުތަކެއް އަޅުއްވައި، ހިނގާދިޔަ ހާދިސާތައް ސީރިއަސް މައްސަލަތަކެއްގެ ގޮތުގައި ތަޙުޤީޤުކުރައްވާ، ޒިންމާވާން ޖެހޭ ފަރާތްތަކާމެދު ފިޔަވަޅު އެޅުއްވުމަށް އެ ޕާޓީއިން ވަނީ ގޮވާލާފައެވެ.

އެމްއެންޕީއިން ވަނީ މަސްތުވާތަކެތި ގެއްލުވާލުމުގެ މި މައްސަލަތައް ތަޙުޤީޤުކުރުމާއި، އަދިވެސް މިކަމާ ގުޅިގެން އަޅަންޖެހޭ ފިޔަވަޅުތައް އެޅުމަށް ސަރުކާރުން ފަސްޖެހެމުންދާތީ އާއި، މިކަމުގައި މިހާތަނަށްވެސް ނޭޝަނަލް އިންޓެގްރިޓީ ކޮމިޝަނުން ބަހެއް ބުނެފައި ނުވާ ކަންވަނީ ފާހަގަކޮށްފައެވެ.

އެހެންކަމުން  އެމްއެންޕީއިން ވަނީ މިކަންކަން ބަލައި ސަރުކާރާއި ކަމާބެހޭ މުއައްސަސާތައް ޒިންމާދާރުކުރުވުމަށް ރައްޔިތުންގެ މަޖިލީހުގެ މިކަމާ ގުޅޭ 2 ކޮމިޓީ ކަމުގައިވާ، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ އަށާއި، މިނިވަން މުއައްސަސާތަކުގެ ކޮމިޓީއަށް މި މައްސަލަ ހުށަހަޅައިކަމަށް މި ނޫސްބަޔާނުގައި ބުނެފައިވެއެވެ.

މިމަހު 8 ވަނަ ދުވަހު ވެލާނާ އިންޓަރނޭޝަނަލް އެއާޕޯޓްގައި، ކަސްޓަމްސް އިން ވަނީ ރާއްޖެ އައި ޕާކިސްތާނު މީހެއްގެ ލަގެޖުގައި މަސްތުވާތަކެތި އެތެރެކުރި ކަމުގެ ތުހުމަތުގައި އެމީހާ ފުލުހުންނާއި ހަވާލުކޮށްފައެވެ. ނަމަވެސް އޭނާއާ މެދު ތުހުމަތުކޮށް ބަންދުގައި ބެހެއްޓޭނެ ހެކި ނެތުމުން އޭނާ މިހާރު ވަނީ ދޫކޮށް ލާފައެވެ.