ލީގު ފުލުގައި އޮތް ސައުތުހެމްޓަން އާއި އެއްވަރުވެ ލީގު ހޯދުމުގެ އަމިއްލަ ބާރު އާސެނަލްއަށް ގެއްލިއްޖެ!

އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ތާވަލުގެ ފުލުގައި އޮތް ސައުތުހެމްޓަން އާއި އެއްވަރުވެ ލީގު ހޯދުމުގެ އަމިއްލަ ބާރު އާސެނަލްއަށް ގެއްލިއްޖެ އެވެ.

ލީގުގައި އާސެނަލް އެންމެ ފަހުން ކުޅުނު ތިން މެޗުން އެޓީމަށް މޮޅެއް ހޯދިފައިނުވާ އިރު، ދެވަނައިގައި އޮތް މެންޗެސްޓާ ސިޓީއަށް ވުރެ އިތުރަށް ދެ މެޗު ކުޅެގެން އެޓީމު މިވަގުތު އޮތީ ފަސް ޕޮއިންޓުގެ ލީޑަކާ އެކު ތާވަލުގެ އެއްވަނައިގައެވެ.

އާސެނަލް ދަނޑުގައި މިރޭ ކުޅެވުނު މެޗުގެ ވަރަށް ކުރީކޮޅު ސައުތުހެމްޓަން އިން ވަނީ ދެލަނޑުގެ ލީޑެއް ނަގާފައެވެ. މިގޮތުން މެޗުގެ ފުރަތަަމަ މިނެޓުގައި އެޓީމުގެ އާޖެންޓީނާ މިޑްފީލްޑަރު  ކާލޯސް އަލްކަރާޒް ލަނޑެއް ކާމިޔާބުކޮށް އެޓީމަށް ލީޑު ނަގައިދިން އިރު، 14 ވަނަ މިނެޓުގައި ތިއޯ ވޮލްކޮޓް ވަނީ އެޓީމުގެ ލީޑު ފުޅާކޮށްދީފައެވެ.

ސައުތުހެމްޓަން އިން ދެ ލަނޑުގެ ލީޑެއް ނަގާފައި ވަނިކޮށް ފުރަތަމަ ހާފުގެ 20 ވަނަ މިނެޓުގައި އާސެނަލްގެ ބްރެޒިލް ފޯވާޑް ގެބްރިއަލް މާޓިނެލް ވަނީ ލަނޑެއް ކާމިޔާބުކޮށް އާސެނަލްއަށް އުންމީދު އަދާކޮއްދީފައެވެ. މިއީ އެޓީމުގެ އިގިރޭސި ފޯވާޑް ސަކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި އާސެނަލް އިން ގިނަ ފުރުސަތުތަކެއް ތަނަވަސްކުރި ނަމަވެސް މިހާފުގައި އެޓީމަށް އިތުރު ލަނޑެއް ކާމިޔާބު ކުރެވޭގޮތެއް ނުވިއެވެ.

ދެވަަނަ ހާފްގައި އާސެނަލް އިން ވަރަށް ބޮޑަށް ކުރިއަށް ޖެހި ލަނޑެއް ޖެހޭތޯ މަސައްކަތް ކުރަމުން ދަނިކޮށް އަނެއްކާވެސް ފެނިގެންދިޔައީ ސައުތުހެމްޓަން އިން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރިތަނެވެ. ދެވަަނަ ހާފުގެ 66 ވަނަ މިނެޓުގައި އެޓީމަށް ލިބުނު ކޯނަރުން އާސެނަލްގެ ގޯލު ކުރިމައްޗަށް ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައިގެން މި ލަނޑު އެޓީމަށް ކާމިޔާބުކޮށްދިނީ ކްރޮއޭޝިޔާ ޑިފެންޑަރު ޑުޖޭ ކެލެޓާ- ކާރު އެވެ. މި ލަނޑާއެކު، މެޗުގެ 88 ވަނަ މިނެޓާއި ހަމައަށް 3-1 ގެ ނަތީޖާއަކުން ކުރީގައި އޮތީ ސައުތުހެމްޓަން އެވެ.

ނަމަވެސް މެޗުގެ ފަހު ދެމިނެޓު ތެރޭގައި ދެ ލަނޑު ކާމިޔާބުކޮށް އާސެނަލް އިން މެޗުގެ ނަތީޖާ އެއްވަރުކުރި އެވެ. މިގޮތުން ދެވަަނަ ހާފުގެ 88 ވަނަ މިނެޓުގައި އެޓީމުގެ ދެވަަނަ ލަނޑު ކެޕްޓަން މާޓިން އޮޑެގާޑް ކާމިޔާބުކޮށްދިން އިރު، އެޓީމަށް މެޗުގެ ނަތީޖާ އެއްވަރުކޮށްދިނީ 90 ވަނަ މިނެޓުގައި ސަކާއެވެ. މި ލަނޑާއެކު މެޗުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމް އެއްވަރުވެގެންނެވެ.

މިރޭގެ މެޗުން ލިބުނު އެއް ޕޮއިންޓާއެކު ލީގުގައި ކުޅުނު 32 މެޗުން އާސެނަލް އަށް 75 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާއަށް 30 މެޗު ކުޅެގެން ވަނީ 70 ޕޮއިންޓް ލިބިފައެވެ.