ކުމުންދޫ ނެރުގެ މައްސަލަ ޙައްލުކުރުމުގެ މަސައްކަތް ދަނީ ކުރަމުން: ރާއީ

ކުމުންދޫ ނެރުގެ މައްސަލަ ޙައްލު ކުރުމުގެ މަސައްކަތް ދަނީ ކުރަމުން ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެ އެވެ.

މެމްބަރު ރާއީ މިފަދައިން ވިދާޅުވެފައި ވަނީ ކުމުންދޫ ނެރުމައްޗަށް ދޯންޏެއް އަރައި އޭގައި ތިބި މީހުންނާއި މުދަލަށް ބޮޑެތި ގެއްލުންތަކެއް ލިބިފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.

ކުމުންދޫ ނެރުގެ މައްސަލައަކީ އެ ރަށުގެ ރައްޔިތުންގެ ވަރަށް ބޮޑު ޝަކުވާއެއްކަމަށް އެ ރަށު ކައުންސިލުން މައުލޫމާތު ދެއެވެ. 187 ހެކްޓަރު ހުންނަ އެރަށުގެ ނެރު، އިރުމަތި ފަރާތުގައި ކަނޑާފައި ހުރުމުގެ ސަބަބުން ރާޅު ބޮޑުވާ މޫސުމެއްގައި ނަމަ އެރަށު ފަޅަށް ވަދެ ނުކުމެ އުޅުމަކީ ދަތިކަމެއްކަން އެ ރަށު ކައުންސިލުން ދަނީ ފާހަގަކުރަމުން ނެވެ.

އެކަމާއި ގުޅޭގޮތުން ރާއީ ވިދާޅުވީ ކުމުންދޫ ބަނދަރު އަޕްގްރޭޑް ކުރުމުގެ މަޝްރޫއު މި ސަރުކާރުން އެމްޓީސީސީ އާއި ހަވާލުކޮށްފައިވާއިރު، އެ މަސައްކަތުގެ ތެރެއިން ކުމުންދޫ ދިމާވެފައިވާ ބަނދަރުގެ މައްސަލަ ހައްލުވެގެންދާނެ ކަމަށެވެ. އަދި ކުމުންދޫގެ ނެރުގެ މައްސަލަ ހައްލުކުރުމުގެ މަސައްކަތްވެސް މިހާރު ކުރެވެމުންދާކަމަށް އޭނާ ވިދާޅުވި އެވެ.

"ކުމުންދޫގެ ބަނދަރަށް ދިމާވެފައިވާ މައްސަލަތަށް ހައްލުކޮށް ދާޢިމީ ހައްލެއް ގެނެސް އަދި އިތުރަށް ރައްޔިތުން ބޭނުންވާ ގޮތަށް ބަނދަރު ބޮޑުކޮށް މަރާމާތު ކޮށް، އެއްމެ ޒަމާނީ ބަނދަރެއްގެ ލުއިފަސޭހަ ލިބިގެންދާނީ މި ސަރުކާރުން އެމްޓިސީސީއާއި ވާލު ކުރެވިގެން ގެންދާ މަސައްކަތުގެ ތެރެއިންނެވެ, ބަނދަރަށް 100,0000 މިލިއަނަށްވުރެ ބޮޑު ހަރަދެއް ކުރެވިގެންދާނެ،ފުރަތަމަ ނިމިގެންދަނީ ނެރުމުގެ މަސައްކަތް"

މަކުނުދޫ ދާއިރާގެ މެމްބަރު މުހައްމަދު ރާއީ

ރާއީ ވިދާޅުވި މިހާރު ސަރުކާރުން ފަށާފައިވާ މަޝްރޫއުގެ ތެރެއިން ކުމުންދޫ ރައްޔިތުންނަށް ބޭނުންވާ ވަރަށް ގިނަ ކަންތައްތަކެއް ފުރިހަމަވެގެން ދާނެ ކަމަށެވެ. އެކަމަށްޓަކައި ސަރުކާރަށް ޝުކުރު ދަންނަވާކަމަށް ރާއީ ވަނީ ވިދާޅުވެފަ އެވެ.

ކުމުންދޫ ބަނދަރު އަޕްގްރޭޑް ކުރުމުގެ މަސައްކަތުގެ ތެރެއިން އެރަށު ވާޓަރު މަރާމާތު ކުރުމާއި އިތުރު 700 ފޫޓަށް ވާޓަރު ދަމާލުމާއި ބަނދަރު ބޮޑު ކުރުމުގެ އިތުރުން ޓީޖެޓީއެއް ގާއިމު ކުރުމާއި 290 މީޓަރުގެ ބޮޑުހިލަޖަހައި ބޭރުތޮއްޓެއް ލުމުގެ އިތުރުން 40 މީޓަރުގެ ބޮޑު ހިލައިގެ ރިވެޓްމަންޓު ޖެހުމާއި އަދި 60 މީޓަރުގެ ބޮޑު ހިލައިގެ ގްރޮއިން ޖެހުމުގެ މަސައްކަތް އެމްޓީސީސީން ކުރުމަށް ވަނީ ހަމަޖެހިފަ އެވެ.

އެމްޓީސީސީއާއި ހަވާލުކޮށްގެން އެ މަސައްކަތް ކުރަމުން ދިޔަ ނަމަވެސް ބަނދަރު އެހެން ދިމާލަކަށް ބަނދަލުކުރުމަށް ނިންމާފައި ނުވާތީ އެ ކަށު ކައުންސިލުން ވަނީ ކަންބޮޑުވުން ފާޅުކޮށްފަ އެވެ.