ހދ.ކުމުންދޫ ކަރާދަނޑުތަކަށް ބަޔަކު ގެއްލުންދީފި

ހދ.ކުމުންދާ ކަރާދަނޑުތަކަށް ރޭގެ ވަގުތެއްގައި ބަޔަކު ގެއްލުންދީފިއެވެ.

ކުމުންދޫ ކައުންސިލުން މިއަދު ބުނީ، އެރަށުގެ ދަނޑުތަކަށް ބަޔަކު ގެއްލުންދީފައިވާ ކަމަށާއި، އެ މައްސަލަ މިހާރު ފުލުހުންގެ ސަމާލުކަމަށް ގެނެސްފައިވާކަމަށެވެ. ދަނޑުތަކަށް ގެއްލުންދިންކަން އެނގުނީ މިއަދު ހެނދުނު 06:00 ހައިރު ދަނޑުވެރިން ދަނޑަށް ދިއުމުންކަމަށް ކައުންސިލުން ބުންޏެވެ. ބެލެވޭގޮތުގައި ދަނޑުތަކަށް ގެއްލުންދީފައިވަނީ ރޭ ދަންވަރުގެ ވަގުތެއްގައެވެ.

ކުމުންދޫ އިން ވާހަކަދެއްކި މީހަކު ބުނީ ދަނޑުތަކަށްވަދެ، ވެލުގައި އަޅާފައިވާ ގިނަ އަދަދެއްގެ ކަރާތައް ފަޅާލާފައިވާއިރު، ބަހެއް ގަސްތަކަށްވެސް ވަނީ ގެއްލުންދީފައިވާކަމަށެވެ. އޭގެ އިތުރުން ދަނޑުގައި ބޭނުންކުރާ ބައެއް ސާމާނުތަކަށްވެސް ވަނީ ގެއްލުންދީފައެވެ.

ކުމުންދޫގައި މީގެ ކުރިންވެސް ދަނޑުތަކަށް ގެއްލުންދިނުމުގެ ހާދިސާތައް ހިނގާފައިވާއިރު، މިފަހުން މިކަން އިތުރުވެފައިވާކަމަށް ކައުންސިލުން ބުނެއެވެ.

ކުމުންދޫއަކީ އުތުރުގެ އަތޮޅުތަކުގެ ރަށްތަކުގެ ތެރެއިން ފުޅާދާއިރާއެއްގައި ދަނޑުވެރިކަން ކުރަމުން އަންނަ ރަށެކެވެ. އެރަށުގައި ހައްދާ ބައެއް ތަކެތި ކުޅުދުއްފުށީގެ އިތުރުން  މާލެ ގެނެސްވެސް ވިއްކައެވެ.