ރައީސް ޔާމީންގެ ކެންޑިޑެންސީއާއި މެދު އީސީން ގޮތެއް ނުނިންމައިގެން ޝަރީފު ކަންބޮޑުވެއްޖެ

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ކެންޑިޑެންސީއާއި މެދު އިލެކްޝަން ކޮމިޝަނުން ގޮތެއް ނިންމާދިނުމަށް އެމްޑީޕީގެ ޕީޖީ ގުރޫޕުގައި ހިމެނިވަޑައިގަންނަވާ މަރަދޫ ދާއިރާގެ މެމްބަރު މުޙައްމަދު ޝަރީފު (މަވޯޓާ) އެދިވަޑައިގަންނަވައިފި އެވެ.

ޝަރީފު ކުރެއްވި ޓްވީޓެއްގައި ވިދާޅުވީ ޝަރުއީ ހުކުމެއް ތަންފީޒު ކުރަމުންދާ މީހެއްގެ އިސްތިއުނާފު ކުރިއަށް ދާ ޙާލަތުގައި އެފަދަ ފަރާތަކަށް ރިޔާސީ އިންތިޚާބުގައި ވާދަކުރެވޭނެކަން ނުވަތަ ނޫންކަން އީސީން ކަނޑައަޅަން ޖެހޭ ކަމަށެވެ.

ޝަރީފު ވިދާޅުވީ އިދިކޮޅު ސިޔާސީ ޕާޓީ ޕީޕީއެމްގެ ރިޔާސީ ކެންޑިޑޭޓު މިވަތުގު ޖަލު ހުކުމެއް ތަންފީޒުކުރައްވަމުން ވަޑައިގަނަންވާއިރު އަދި އެމަނިކުފާނުގެ ފަރާތްޕުޅުން އެ ހުކުމް އިސްތިއުނާފުކޮށްފައިވާއިރު، އެ މައްސަލައިގައި ނިހާއީ ހުކުމަކަށް އަދި ނުދާ ކަމަށެވެ.

އެ ހާލަތުގައި ރައީސް ޔާމިންގެ ކެންޑިޑެންސީއާއި މެދު އީސީން ވަރަށް އަވަހަށް ގޮތެއް ކަނޑައަޅަން ޖެހޭކަމަށް ޝަރީފު ވިދާޅުވި އެވެ. ރައީސް ޔާމިނަށް އިންތިޚާބުގައި ވާދަކުރެވޭނެ ކަން ނުވަތަ ނޫންކަން ވަރަށް އަވަސް އީސީން ކަނޑައަޅާދިނުމަށް ޝަރީފު ވަނީ ގޮވާލައްވާފަ އެވެ.

ޝަރީފުގެ އެ ޓްވީޓުގައި ވަނީ އިލެކްޝަން ކޮމިޝަންގެ ރައީސް ފުއާދު ތައުފީގުވެސް ޓެގު ކުރައްވާފަ އެވެ.

ޝަރީފު މިފަދައިން ވިދާޅުވެފައިވާއިރު، ރިޔާސީ ކެންޑިޑޭޓެއްކަމަށް އީސީން ކަނޑައަޅާނީ ރިޔާސީ އިންތިޚާބަށް ކުރިމަތި ލުމުގެ ފުރުސަތު ހުޅުވާލާ އެ އިންތިޚާބުގައި ވާދަކުރުމަށް ނަން ހުށައަޅާ ހިސާބުންނެވެ. އަދި މިހާތަނަށް އެ އިންތިޚާބަށް ރަސްމީކޮށް ހުޅުވާލާފަ އެއް ނުވެއެވެ.

އިންތިޚާބުގައި ވާދަކުރައްވާނެކަން ސިޔާސީ ޕާޓީތަކުން ކަނޑައެޅިނަމަވެސް އީސީއަށް ފޯމު ހުށައަޅާ، ފޯމުތައް ބަލައިގަތުމުގެ ކުރިން އެއީ ރިޔާސީ ކެންޑިޑޭޓެއްކަމަށް އީސީއިން ރަސްމީކޮށް ބަލައެއް ނުގަންނާނެ އެވެ.

އޭގެ އިތުރުން ރައީސް ޔާމިނުގެ މައްޗަށް ނިހާއީ ހުކުމެއް ނާންނަހާ ހިނދަކު އެމަނިކުފާނަށް ރިޔާސީ އިންތިޚާބުގައި ވާދަކުރެއްވުމުގެ ފުރުސަތު އޮންނާނެކަމަށް އިލެކްޝަން ކޮމިޝަންގެ ރައީސް ފުއާދު ތައުފީގު ވަނީ ވިދާޅުވެފަ އެވެ.