ވެލެންސިއާ އަތުން ބަލިވެ، ރެއާލް މެޑްރިޑަށް ލީގުގެ ދެވަނަ މަގާމުވެސް ގެއްލިއްޖެ!

ސްޕެނިޝް ލަލީގާގައި ރޭ ރަށުން ބޭރުގައި 1-0 ގެ ނަތީޖާއަކުން ވެލެންސިއާ އަތުން ރެއާލް މެޑްރިޑް ބަލިވެ ލީގުގެ ދެވަނަ މަގާމް އެޓީމަށް ގެއްލިއްޖެއެވެ.

ޗެންޕިއަންސް ލީގުގެ ސެމީފައިނަލްގައި މެންޗެސްޓާ ސިޓީ އަތުން 5-1 ގެ އެގްރިގޭޓު ނަތީޖާއަކުން ބަލިވެ، މުބާރާތުން ކެޓުމުގެ ހިތާމައިގައި ވަނިކޮށް ރޭގެ މެޗުގައި ވެލެންސިއާ އިން ވަނީ 2020 ވަނަ އަހަރުގެ ފަހުން ފުރަތަަމަ ފަހަރަށް ރެއާލް މެޑްރިޑް ބަލިކޮށްފައެވެ.

ރޭގެ މެޗުގެ ފުރަތަަމަ ހާފުގައި ރެއާލް މެޑްރިޑުން ގިނަވަގު ބޯޅަ ހިފަހައްޓައިގެން ކުޅުނު ނަމަވެސް، ރަގަޅު އެޓޭކްތައް ފެނިގެންދިޔައީ ވެލެންސިއާގެ ފަރާތުން ނެވެ. މި ގޮތުން ފުރަތަަމަ ހާފުގައި އެޓީމުން ރެއާލްގެ ގޯލާއި އަމާޒުކޮށް ފަސް ހަމަލާއެއް ފޮނުވާލިއިރު، މިހާފުގައި ވެލެންސިއާގެ ގޯލަށް އަމާޒުކޮށް ރެއާލްއަށް ފޮނުވާލެވުނީ އެންމެ ހަމަލާއެކެވެ.

މި މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 33 ވަރަށް މިނެޓުގައި ވެލެންސިއާއަށް ކާމިޔާބުކޮށްދިނީ އެޓީމުގެ ޒުވާން ފޯވާޑް ޑިއެގޯ ލޮޕޭޒް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ވެލެންސިއާ ކުރީގައި އޮވެގެންނެވެ.

ދެވަނަ ހާފުގައި ރެއާލް މެޑްރިޑުން އެޓީމުގެ ކުޅުން ރަނގަޅުކޮށް ފުލުފުލުގައި ގިނަ ހަމަލާތަކެއް ވެލެންސިއާގެ ގޯލަށް ފޮނުވާލިއެވެ. އޭގެ ތެރޭގައި އެޓީމުގެ ބްރެޒިލް ފޯވާޑް ރޮޑްރިގޯ ގެ އިތުރުން ޖަރުމަނުގެ މިޑްފީލްޑަރު ޓޯނީ ކްރޫސް އާއި މިޑްފީލްޑަރު ވަލްވެޑޭ އަށް ލިބުނު ހުސް ފުރުސަތުގައި ބޭނުން ނުކުރެވުނު އިރު، ދެވަނަ ހާފުގެ އިތުރު ވަގުތުގެ ތެރޭގައި ރެއާލްގެ ބްރެޒިލް ފޯވާޑް ވިނީޝިއަސް ޖޫނިއަރ ވެލެންސިއާގެ ކުޅުންތެރިއަކަށް ކުޅުމުން ބޭރުގައި ހަމަލާދިނުމުގެ ސަބަބުން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ.

ލީގުގައި ކޮންމެ ޓީމަކަށް ބާކީ ތިން މެޗު އޮތްއިރު، މިރޭގެ މެޗުން ލިބުނު ތިން ޕޮއިންޓާއެކު، 35 މެޗުން 40 ޕޮއިންޓް ހަމަކޮށް ވެލެންސިއާ އިން ވަނީ ރެލިގޭޝަން ޒޯނާއި ފެއަށް ޖެހިލާފައެވެ. އަދި މި މެޗުން ބަލިވި ރެއާލް މެޑްރިޑަށް 35 މެޗު ކުޅެގެން ލިބުނު 71 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ ތިންވަނައިގައެވެ. ދެވަނައިގައި އޮތް އެތުލެޓިކޯ މެޑްރިޑަށް 35 މެޗުން 72 ޕޮއިންޓް ލިބިފައިވާއިރު މި ދެޓީމަށް ވެސް ވަނީ އަންނަ ސީޒަނުގެ ޗެންޕިއަންސް ލީގުގެ ޖާގައެއް ކަށަވަރުވެފައެވެ.