ސަރުކާރުގެ އިދާރާތަކުގެ މަސައްކަތަށް ބައެއް ޕާޓީތަކުން ހުރަސްއަޅަމުންދާކަން ފާހަގަވެއްޖެ: ތަރުޖަމާނު

ސަރުކާރުގެ އިދާރާތަކަށް ގޮސް، އެ އިދާރާތަކުގެ މަސައްކަތްތަކަށް ބައެއް ސިޔާސީ ޕާޓީތަކުން ހުރަސްއަޅަމުންދާތީ ކަންބޮޑުވާކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.

މިއުވާން މިފަދައިން ވިދާޅުވެފައިވަނީ ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

ނަން ހާމަނުކޮށް މިއުވާން ވިދާޅުވީ ބައެއް ސިޔާސީ ޕާޓީތަކުން ސަރުކާރުގެ އެކި އިދާރާތަކަށް ވަދެ، އެ ތަނުގައި ކުރާ މަސައްކަތްތަކަށް ހުރަސްއެޅޭ ގޮތަށް އަމަލުކުރަމުންދާކަން ފާހަގަކުރެވިފައިވާ ކަމަށެވެ.

އަދި އެއީ ސަރުކާރުން އެއްވެސް ހާލަތެއްގައި ބަލައިގަންނާނެ ކަމެއް ނޫން ކަމަށާއި، ސިޔާސީ ޕާޓީތަކުން އެފަދައިން އަމަލުކުރުމަކީ ވަރަށް ބޮޑަށް ކަންބޮޑުވާ ކަމެއްކަމަށް މިއުވާން ވިދާޅުވި އެވެ.

"ސަރުކާރުގެ އިދާރާތަކާއި ދައުލަތުގެ މުއައްސަސާތަކުގެ މަސައްކަތްތަކަށް ބައެއް ސިޔާސީ ޕާޓީތަކުގެ ބޭފުޅުން ހުރަސްއަޅާ އެތަންތަނުގައި މަސައްކަތް ކުރައްވާ ބޭފުޅުންނަށް ފުރައްސާރަ ކުރަމުން ގެންދާކަން އަޅުގަނޑުމެންނަށް ފާހަގަކޮށްލެވޭ. މީ ކަންބޮޑުވާކަމެއް"

ރައީސް އޮފީހުގެ ތަރުޖަމާނު މިއުވާން

ވަކި ސިޔާސީ ޕާޓީއެއްގެ ނަން މިއުވާން ހާމަ ނުކުރި ނަމަވެސް މި ދުވަސްކޮޅަކީ ވާދަވެރި ސިޔާސީ ޕާޓީ ޕީޕީއެމްއިން އުފައްދާފައިވާ އިންތިޤާލީ ކޮމެޓީތަކުން ސަރުކާރުގެ އެކި އިދާރާތަކަށް ގޮސް، އެ އިދާރާތަކުގެ މަސައްކަތްތައް ބަލާ ޖަވާބުދާރީ ކުރުވުމަށް މަސައްކަތް ކުރަމުންދާ ދުވަސްކޮޅެއްކަން ފާހަގަކޮށްލެވެއެވެ.

ކޮންމެ ދުވަހަކު ވެސް އިދިކޮޅުގެ ޓީމުތަކުން ސަރުކާރުގެ އެކި އިދާރާތަކަށް ގޮސް، އި އިދާރާއަކާއި ގުޅުންހުރި މައުލޫމާތު ހޯދުމުގެ މަސައްކަތް ކުރައްވަމުން ގެންދަވާކަން ފާހަގަކޮށްލެވެއެވެ.

އޭގެ އިތުރުން އިދިކޮޅުގެ ލީޑަރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި ބައްދަލުކުރެއްވުމަށް ކޮންމެ ދުވަހަކު ރައީސް އޮފީހަށް ވަޑައިގެން އެތައް އިރެއް އެތަނުގައި ހޭދަކުރައްވާކަން ވެސް ފާހަގަކޮށްލެވެއެވެ.

އެހެން ނަމަވެސް މިހާތަނަށް ރައީސުލްޖުމްހޫރިއްޔާ އެއްވެސް ފަހަރަކު އިދިކޮޅުގެ ލީޑަރުންނާއި ބައްދަލުކުރައްވާފަ އެއް ނުވެއެވެ.