ރައީސް ޞާލިހާއި ދެކޮޅަށް މުޒާހަރާކުރުން ހުއްޓުވާތީ، ތުލުސްދޫ ކައުންސިލްގެ އިންޒާރެއް ފުލުހުންނަށް!
ރިޔާސީ އިންތިޚާބުގެ ކެމްޕޭނަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ތުލުސްދޫއަށް ވަޑައިގަންނަވާއިރު، ފުލުހުން އެ ރަށުގެ އެއްވެސް ތަނެއް ބަންދުކޮށް ކޯޑަން ކުރެވޭނީ ކައުންސިލްގެ ހުއްދަ ހޯދައިގެންކަމަށް އެ ކައުންސިލުން ކަނޑައަޅައި އެކަން ފުލުހުންނަށް އަންގައިފި އެވެ.
މިފަދައިން އެ ކައުންސިލުން ނިންމާފައިވަނީ ތުލުސްދޫ ކައުންސިލްގެ 5 މެމްބަރުން ސޮއިކުރައްވާ ނެރުއްވާފައިވާ ޤަރާރެއްގަ އެވެ.
ތުލުސްދޫ ކައުންސިލުން ނެރުނު އެ ގަރާރުގައި ބުނެފައިވަނީ ސަރުކާރު ހިންގާ މައި ޕާޓީ އެމްޑީޕީން ރިޔާސީ އިންތިޚާބުގައި ކެމްޕޭނަށް ރަށްތަކަށް ދަތުރުކުރާއިރު، އެ ރަށްތަކުގައި ދިރިއުޅުއްވާ ފަރާތްތަކަށް ޤާނޫނު އަސާސީން ލިބިދީފައިވާ ޚިޔާލުފާޅުކުރުމުގެ މިނިވަންކަމަށް ހުރަސްއަޅަމުންދާ ކަމަށެވެ.
އެގޮތުން ހިޔާލު ފާޅުކުރުމުގެ މިނިވަން ކަމަށް ހުރަސް އަޅާ އެ ބާރު ކަނޑުވާލާ ރައްޔިތުންގެ މަސްލަހަތު ގެއްލޭ ގޮތަށް ރައްޔިތުންނާއި ފުލުހުންނާއި ކުރިމަތިލާ ހަމަނުޖެހުމަށް މަގުފަހިވާ ގޮތަށް ކަންކަން ހިނގަމުންދާތީ އެކަންކަން ހަރުކަށި އިބާރާތުން ކުށްވެރިކުރާ ކަމަށް ތުލުސްދޫ ކައުންސިލުން ވަނީ ބުނެފައެވެ.
އޭގެ އިތުރުން އެ ކައުންސިލުން ބުނީ ލާމަރުކަޒީ ޤާނޫނުން ލިބިދޭ ބާރުގެ ދަށުން އެ ރަށެއްގެ އަމަންއަމާންކަން ބެލެހެއްޓުމާއި ރަށުގެ މަސްލަހަތު ހިޔާމަތްކޮށް ރައްކާތެރިކުރުމަކީ ކައުންސިލްތަކުން ކުރުން ލާޒިމުކުރާ ކަމެއްކަމަށް ވާތީ، ގާނޫނުން ލިބޭ ބާރުގެ ދަށުން ރަށުގެ އެއްވެސް ސަރަހައްދެއް ފުލުހުންނަށް ބަންދުކުރެވޭނީ އެ ކައުންސިލުގެ ހުއްދަ ލިބިގެން ކަމަށެވެ.
އެގޮތުން ތުލުސްދޫގެ އިހްތިޞާސްތެރޭގައި ހިމެނޭ އެއްވެސް ސަރަހައްދެއް ބަންދުކޮށް ފުލުހުންގެ ކޯޑަން ޓޭޕް ދަމާ ރައްޔިތުންނަށް ނުވަދެވޭނެހެން ހެދުމަކީ މިކައުންސިލުން ހުއްދަ ލިބިގެން ނޫނީ ފުލުހުން ކޮށްގެންވާނެ ކަމެއް ނޫންކަމަށް ތުލުސްދޫ ކައުންސިލުން ނެރުނު ގަރާރުގައި ވަނީ ބުނެފަ އެވެ.
އޭގެ އިތުރުން ތުލުސްދޫ ކައުންސިލުން ނެރުނު ގަރާރުގައި ވަނީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ ވާދަވެރި އިންތިޚާބަކަށް ފުރުސަތު ފަހިކޮށްދިނުމަށް ވެސް ގޮވާލައިފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
