މަޖިލީސް ހިސޯރުކޮށްގެން މިތިބީ ރާއްޖޭގެ ސަރަހައްދެއް ވިއްކާލީމާ: އިބްރާޙީމް ރަޝީދު

ރައްޔިތުންގެ މަޖިލީހުގެ ކޮމިޓީތައް ހުއްޓުމަކަށް ގެނެސް، މަޖިލީސް ހިސޯރުކުރީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ރާއްޖޭގެ ސަރަހައްދުން ބައެއް ވިއްކާލުމުން ކަމަށާ، އެކަން ކުރީ އެމްޑީޕީ މެންބަރުން ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.

މިއަދު ކުރިއަށް ދިޔަ، ރައްޔިތުންގެ މަޖިލީހުން ތިން ވަނަ ދައުރުގެ ދެވަނަ ޖަލްސާގައިވެސް އޮތީ ކޮމިޓީތައް އެކުލަވާލުމުގެ މަސައްކަތެވެ.

އެ މައްސަލާގައި ބަހުސް ކުރައްވަން ފަށްޓަވަމުން ބޮންޑެ ވަނީ މަޖިލީސް ހުއްޓުވުމަކަށް ގެނައީ ފޯޅަވަހީގެ މައްސަލާގައި މި ސަރުކާރުން ނިންމި ނިންމުމާއި ގުޅިގެން ރާއްޖޭގެ ކަނޑުގެ ސަރަޙައްދުން ބައެއް ގެއްލިފައިވާތީ ކަމަށެވެ.

ކޮމިޓީތައް ހުއްޓުވައިގެން، ރައްޔިތުންގެ މަޖިލިސް ހިސޯރުކޮށްގެން މި ތިބި ސަބަބަކީ، ދިވެހިރާއްޖޭގެ އަތޮޅު ތަކެއް، ދިވެހިރާއްޖޭގެ ސަރަހައްދެއް، ރައްޔިތުންނަށް ސިއްރުން މި ސަރުކާރުން ވަނީ ވިއްކާލާފައި. ބާކީ އޮތީ 14 ދުވަސް. އެހެންވީމާ މި ވެރިކަމުގައި، ރައްޔިތުންނަށް ހިޔާނާތްތެރިވެ، ރައްޔިތުންގެ މަޖިލީހަށް ސިއްރުން، ރައްޔިތުންނަށް ސިއްރުން ވިއްކާލާފައި، މަޖިލީހުގައި މަރުތަޅު އަޅުވާފައި މިވަނީ. ދައުލަތުގެ ބަންޑާރަ ނާއިބު އަޅުގަނޑުމެން ހާޒިރު ކުރިން. އެދުވަހުން ފެށިގެން މަޖިލިސް މިއޮތީ ހުއްޓިފައި. އަޅުގަނޑުމެން އަނެއްކާވެސް ޕެޓިޝަން ގައި ސޮއި ކުރަން ފަށާނަން.

އިބްރާހީމް ރަޝީދު

މިއާއެކު ބޮންޑެ ވިދާޅުވީ، މިސަރުކާރުން ދިވެހިރާއްޖެއަށް ޣައްދާރުވެފައިވާ ކަމަށެވެ. އަދި ދިވެހި ރައްޔިތުން މިސަރުކާރަށް ވޯޓު ނުދޭނެ ކަމަށާ، މިހާރު އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީސްވެސް ނޯންނާނެ ކަމަށް އޭނާ ވިދާޅުވި އެވެ.

މިސަރުކާރެއް އަލުން ނާންނާނެ. މި ސަރުކާރަކަށް ނުދޭނެ ރައްޔިތުން ވޯޓެއް. އަދި މި މަޖިލިސް އެއްވެސް ނޯންނާނެ. ރައްޔިތުން ނުޖެހޭ އެއްވެސް ވޯޓެއް ދޭކަށް. ރާއްޖޭގެ ކަނޑުގެ ސަރަހައްދެއް ވިއްކާލާފައި އޮތީ. ފޯޅަވަހި ވިއްކާލާފައި. މިއީ ޣައްދާރު ސަރުކާރެއް. ދީފައި ހުރި ގޯތި ތަކަކީ އަދި ފަޅު ތަކެއް.

އިބްރާހީމް ރަޝީދު

ބޮންޑެ މިފަދައިން ވިދާޅުވެފައިވާއިރު، ފޯޅަވަހީގެ މައްސަލާގައި ބަންޑާރަ ނާއިބުގެ އިތުބާރު ނެތް ކަމުގެ މައްސަލައެއް އިދިކޮޅުު މެންބަރުން މަޖިލީހަށް ވައްދައި، އެ މައްސަލަ ކުރިއަށް ނުގެންދެވޭނީސް، މަޖިލީހުގެ ރައީސާއި ނާއިބު ރައީސް ގެ އިތުބާރު ނެތް ކަމުގެ މައްސަލަ އެމްޑީޕީން ވަނީ މަޖިލީހަށް ވައްދާފައެވެ. އެއާއެކު މަޖިލީހުގެ ރިޔާސަތު ބަލަހައްޓަވަން ރައީސް މުހައްމަދު ނަޝީދާއި ނާއިބު ރައީސް އީވާ އަބްދުالله އުޒުރުވެރިވެ ވަޑައިގެންނެވުމުން އެ މައްސަލަ ވެސް ކުރިއަށް ނުގެންދެވޭގޮތް ވަނީ ވެފައެވެ.

އެފަހުން އެމްޑީޕީ މެންބަރުންތަކެއް އެ ޕާޓީން ކެނޑި ޑިމޮކްރެޓްސް ގެ ނަމުގައި ޕާޓީއެއް އުފައްދުމާއެކު މަޖިލީހުގެ ނިސްބަތަށް އައި ބަދަލާއެކު ކޮމިޓީތައް އެކުލަވާ ނުލެވި މަޖިލީހުގެ މަސައްކަތް ވެސް ކުރިއަށް ނުދެއެވެ.