ތަރައްޤީގެ މަޝްރޫޢުތައް ކުރިއަށް މިގެންދަނީ ކުރިއަށްއޮތް ޖީލުތަކަށް ރާއްޖޭގެ ރީތިކަން ވާރުތަވާނޭހެން: ރައީސް ޞާލިޙް
ރާއްޖޭގައި ހިންގަމުންދާ ތަރައްޤީގެ މަޝްރޫޢުތައް ކުރިއަށް ގެންދަނީ ކުރިއަށް އޮތްޖީލުތަކަށް ރާއްޖޭގެ ޤުދުރަތީ ރީތިކަން ވާރުތަކުރެވޭނޭހެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުއްޖެއެވެ.
ރައީސް ޞާލިޙް މިހެން ވިދާޅުވީ ރިޔާސީ ކެމްޕޭނަށް ބ.އަތޮޅު މާޅޮހަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.
"އަޅުގަނޑުމެންގެ ތަރައްޤީގެ މަޝްރޫޢުތައް ކުރިއަށް މިގެންދަނީ ރާއްޖެ ހިމާޔަތްކޮށް ކުރިއަށް އޮތް ޖީލުތަކަށްވެސް މިރާއްޖޭގެ މިރީތި ކަމާއި، މިމުއްސަނދިކަން ވާރުތަކުރެވޭނެ ގޮތައް" ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ ތަންތަން ހިމާޔަތް ކޮށްފައި ބާއްވާ އިރުގައި އޭގެ އެންމެ ރަނގަޅު ފައިދާ އެތަނަކުން ލިބޭ ގޮތައް އެކަން ކުރަންއެބަޖެހޭ ކަމަށެވެ. އަދި ކުރިއަށް އޮތް ދައުރުގެ ތެރޭގައި ހިމާޔަތް ކުރެވޭ ތަންތަނުން ރަނގަޅު ފައިދާލިބޭ ކަހަލަ ނިޒާމަކަށް އެކަންތައް ބަދަލު ކޮށް އޭގެތެރެއިން އެރަށަކަށާއި އެއަތޮޅަކަށާއި މުޅި ރާއްޖެއަށް އެތަނަކުން ފައިދާ ލިބޭފަދަ ނިޒާމެއްގެ ދަށަށް އެތަންތަން ގެންނާނެ ކަމަށް ރައީސް ވިދާޅުވިއެވެ.
"މިހާތަނަށް އައި އިރުގައި މި ސަރުކާރުން ސޯލާ ހަކަތަ 34.6 މެގަވޯޓުގެ ސޯލާ ހަކަތަ ރާއްޖޭގެ އެކި ކަންކޮޅުތަކުގައި ޖަހައިފިން، މީގެ ސަބަބުން އެރަށްރަށުގެ ކަރަންޓުގެ އަގަށް ހެޔޮ ބަދަލުތަކެއް ލުއި ބަދަލުތަކެއް އެބަލިބޭ، ކުރިއަށް އޮތް ތަނުގައި މި ޕްރޮގްރާމް އިތުރަށް ހިންގައި ވަކިވަކިން ގޭގޭގައި ސޯލާ ބެހެއްޓޭ ގޮތައް ފެނަކައިން އެދަނީ އެމަސައްކަތް ކުރަމުން" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ އޭގެ ސަބަބުން ގޭގޭގެ ކަރަންޓު ބިލަށް އެތައް ބޮޑުތަނެއް ލުއިވެގެން ދާނެކަމަށެވެ. އަދި ރާއްޖެ އެތެރެކުރާ ޑިސަލާއި ޕެޓްރޯލަށް ޚަރަދުކުރާ ބޭރު ފައިސާގެ އެތައް ގުނައެއް ރައްކާ ކުރެވޭނެ ކަމަށް ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ޞާލިޙް ވިދާޅުވީ ރޭގައި އިޢުލާނު ކުރެވުނު ސަރުކާރުގެ މުވައްޒަފުންގެ މުސާރަ އިތުރުކުރުމުގެ ވާހަކައަށް ޢަމަލު ކުރެވެން ފެށުމާއި އެކު ރާއްޖެއަށް ބޮޑު ބަދަލެއް އަންނާނެ ކަމަށާއި އޭގެ ސަބަބުން ރައްޔިތުންގެ ދިރިއުޅުން އުފާވެރި ވެގެން ދާނެ ކަމަށެވެ.
ބ. އަތޮޅަށް ކުރައްވަމުން މިގެންދަވާ ދަތުރުފުޅުގައި މިއަދު މާޅޮސް، ދޮންފަނު، ކިހާދޫ، ކަމަދޫ، ކެންދޫ އަދި ދަރަވަންދޫއަށް ވަޑައިގަންނަވާނެއެވެ. އަދި ދަރަވަންދޫގައި ޖަގަހަ ބައްދަލުވުމެއް ބޭއްވުމަށް ވަނީ ހަމަޖެހިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
