ކޮވިޑްގައި ނެގި ލޯނުތަކުގެ އިންޓްރެސްޓް ދެން ދައްކާކަށް ނުޖެހޭނެ؛ ދެއްކި ފައިސާވެސް އަނބުރާ ދޭނަން"

ކޮވިޑްގެ ޢާލަމީ ވަބާއާއި ގުޅިގެން، އެކިއެކު ކަންކަމުގައި ރައްޔިތުން ނެގި ލޯނުތަކުގެ އިންޓްރެސްޓް ދެން ދައްކަން ނުޖެހޭނެ ކަމަށާ، އިންޓްރެސްޓް ގެ ގޮތުގައި ފައިސާ ދެއްކި މީހުންނަށް އެ ފައިސާ އަނބުރާ ދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ހުވަދޫ ޖަގަހަ ހުޅުވުމަށް މާވެޔޮ މަގުގައި ރޭ ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަވަމުން ރައީސް ޞާލިހް ވިދާޅުވީ ކޮވިޑާއި ގުޅިގެން އާއްމު ރައްޔިތުންނަށް ބޮޑެތި ދަތިތަކާއި ކުރިމަތިލާން ޖެހުނު ކަމަށެވެ. އަދި އެކަމުން އަރައިގަތުމަށްޓަކައި އެސްއެމްއީ ޑިވެލޮޕްމަންޓް ކޯޕަރޭޝަން (އެސްޑީއެފްސީ) މެދުވެރިކޮށް އާއްމު ރައްޔިތުންނަށް ވަރަށް ގިނަ ލޯނު ދޫކުރެއްވި ކަމަށްވެސް އެމަނިކުފާނު ވިދާޅުވި އެވެ.

ރައީސް ވިދާޅުވީ، އެ ލޯނު ތަކުގެ އިންޓްރެސްޓް ދެން ދައްކަން ނުޖެހޭނެ ކަމަށާ އިންޓްރެސް ދައްކާފައިވާ މީހުންނަށް އަނބުރާ އެ ފައިސާ ދެއްވާނެ ކަމަށެވެ.

އެސްޑީއެފް އިން ނަގާފައި ހުރި ލޯނުގެ އިންޓަރެސްޓް ދެން ތިޔަބޭފުޅުން ދައްކާކަށް ނުޖެހޭނެ. އަދި މިހާތަނަށް އިންޓްރެސްޓް ދައްކާފައި ތިބި މީހުންނަށް އަނބުރާ އެ ފައިސާ އަޅުގަނޑުމެން ދޭނަން. އަދި ލޯނު އަނބުރާ ދައްކަންޖެހޭ މުއްދަތު، މިހާރު އޮތް 10 އަހަރު އިތުރަށް އަޅުގަނޑުމެން ދަންމާލާނަން،"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މީގެ އިތުރުން، ދޮށީ އުމުރުގެ މީހުންނަށް މިހާރު ދެމުން އަންނަ 5،000 ރުފިޔާ 7،000 ރުފިޔާއަށް ބޮޑުކޮށްދެއްވާނެ ކަމަށާ، ދައުލަތުގެ ވަޒީފާތަކުން ރިޓަޔާކުރާ އުމުރު 65 އިން 70 އަށް ބަދަލުކުރައްވާނެ ކަމަށްވެސް ރައީސް ޞާލިހު ވިދާޅުވި އެވެ.

އަދި އަމިއްލަ ރަށް ނޫން އެހެން ރަށެއްގައި މަސައްކަތް ކުރާ ޕްރިންސިޕަލުންނަށް ލިވިން އެލަވަންސްގެ ގޮތުގައި 7،000 ރުފިޔާ ދެއްވައި، ކަރަންޓް ފީ އަށް ފްލެޓް ރޭޓް ތަކެއް ކަނޑައަޅަންވެސް ރައީސް ޞާލިހު ވަނީ ވަޢުދުވެވަޑައިގެންފައެވެ.