ގައުމިއްޔަތާއި ތަރުބިއްޔަތުގެ މާއްދާއެއް މަންހަޖަށް އިތުރު ކުރާނަން: ޑރ މުއިއްޒު

ގައުމިއްޔަތާއި ރިވެތި އަބަދުތަކާއި ތަރުބިއްޔަތުގެ މާއްދާއެެއް ދިވެހިރާއްޖޭގެ ގައުމީ މަންހަޖަށް އިތުރުކުރައްވާނެ ކަމުގައި އިދިކޮޅުގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަބުރުގެ ކެމްޕެއިންގައި މިއަދު ބ . ފެހެންދޫއަށް ވަޑައިގެން އެ ރަށުގެ ސަޕޯޓަރުންނާއި ބައްދަލުކުރައްވާ މިއަދު ބޭއްވި ޖަލްސާގައި ވާހަކަފުޅުދައްކަވަމުން މުއިއްޒު ވިދާޅުވީ އިދިކޮޅުން ހުށަހަޅާ ސިޔާސަތާއި މިހާރުގެ މި ގައުމު އޮތް ހާލަތު ވަރަށް ތަފާތު ކަމަށެވެ. އެ ރައްޔިތަކު ނިސްވަތްބާ ރަށެއްގެ ސަބަބުން، އާބާދީއެއްގެ ސަބަބުން، ފިކުރެއްގެ ސަބަބުން ތަފާތެއް ނުކުރައްވާނެ ކަމުގައި ވިދާޅުވެ ޕީޕީއެމް ޕީއެންސީގެ ސަރުކާރެއްގައި ކޮންމެ ރައްޔިތަކު ހަމަހަމަވާނެ ކަމުގައި ޑރ މުއިއްޒު ވަނީ ވިދާޅުވެފައެވެ.

ރައްޔިތުންނަށް މުޅި ރާއްޖެ ތަރައްގީކުރުމުގެ މާސްޓާ ޕްލޭންގައި އަޅުގަނޑުމެން ފުރުސަތުތައް ދޭނަން. އެބަޔަކު ތިބި ރަށެއްގައި ތިބެގެން ހުރިހާ ހިދުމަތެއް އެ ރަށެއްގެ ނިސްބަތުން ފޯރުކޮށްދޭނަން. އަދި މުޅި ރާއްޖޭގެ އާބަން މާސްޓާ ޕްލޭންގެ ތެރޭގައި ސަރަހައްދީ ތަރައްގީ ކުރިއަށްގެންދާނަން. އެއާއެކު މެދު އަދި ދުރު ރާސްތާގައި ގޮތްތައް ނިންމުމުގެ ފުރުސަތު ރައްޔިތުންނަށް ލިބޭނެ.

ޑރ މުހައްމަދު މުއިއްޒު

ޑރ މުއިއްޒު އިތުރަށް ވިދާޅުވީ، ފެހެންދޫއަކީ އަޅާނުލާ ބާކީ ކުރެވިފައިވާ ރަށެއް ކަމަށާއި، ޕީޕީއެމް ޕީއެންސީގެ މެނިފެސްޓޯގައި އެ ރަށެއްގެ އާބާދީގެ ނިސްބަތުން އަދި އެ ރަށުގައި އިގްތިސޯދީ ހަރަކާތް ހިންގާ ނިސްބަތަށް ބަލާފަ ސިއްހީ މަރުކަޒަށް އިތުރު ކުރިއެރުން ގެނެސްދޭނެ ވާހަކަ އޮންނާނެ ކަމަށެވެ. އަދި އެ ރަށުގެ އާބާދީއާއި އެކަށޭނެ ގޮތަށް ލެބޯޓްރީގެ ނިޒާމް ގާއިމްކޮށްދޭނެ ކަމަށާއި އެއީ މުޅި ރާއްޖެއަށް އޮތް ސިޔާސަތެއް ކަމަށާއި އެހެންވުމުން އެ ރަށަށް ވެސް އެކަން ކޮށްދެއްވާނެ ކަމަށް ޑރ މުއިއްޒު ވިދާޅުވިއެވެ.

މީގެ އިތުރުން ފެހެންދޫގެ ރަށްގިރުމުގެ މައްސަލަ ހައްލުކޮށް ދިނުމުގެ އިތުރުން ކުނި މެނޭޖް ކުރުމުގެ މަޝްރޫއާއި ކުޑަކުދިންގެ ޕާކެއް ގާއިމްކުރުމާއި، އައުޓް ޑޯރ ޖިމެއް ގާއިމް ކުރުމުގެ އިތުރުން، ކަރަންޓުގެ މަައްސަލަ ހައްލުކޮށްދެއްވާނެ ކަމަށާއި، ނަރުދަމާގެ ނިޒާމުގެ މަސައްކަތް ކުރިއަށް ގެންގޮސްދޭނެ ކަމުގައި ޑރ މުއިއްޒު ވަނީ ވިދާޅުވެފައެވެ.