މަޖިލިސް އިންތިޚާބުގައި ޑިމޮކްރެޓްސް އިން ހުރިހާ ގޮނޑިއަކަށް ވާދަކުރަނީ!

ރައްޔިތުންގެ މަޖިލީހުގެ ދާއިރާތައް މަދުކުރުމަށް ހުޅުދޫ ދާއިރާގެ މެންބަރު އިލްޔާސް ލަބީބް މަޖިލީހަށް ހުށަހަޅުއްވާފައިވާ އިސްލާހު ފާސްނުވެއްޖެނަމަ، އިލެކްޝަން ކޮމިޝަނުން އިއުލާނުކޮށްފައިވާ 93 ދާއިރާއަށްވެސް ދަ ޑިމޮކްރެޓްސް އިން ވާދަކުރާނެކަން އިއުލާންކޮށްފިއެވެ.

ގާނޫނު އަސާސީ އިސްލާހު ކޮށްގެން ރައްޔިތުންގެ މަޖިލީހުގެ ގޮނޑީގެ އަދަދު 76 އަށް ކުޑަ ކުރުމަށް އިލްޔާސް ވަނީ މަޖިލީހަށް ހުށަހަޅުއްވާފައެވެ.

އެ އިސްލާހުގައި ވަނީ އިދާރީ ދާއިރާތަކަށް 55 ގޮނޑި، ވޯޓް ލިބޭ ނިސްބަތުން ސިޔާސީ ޕާޓީތަކަށް 11 ގޮނޑި، އަންހެނުންނަށް ހާއްސަ 8 ގޮނޑި އަދި ނުކުޅެދުންތެރިކަން ހުންނަ ފަރާތްތައް ތަމްސީލުކުރަން 2 ގޮނޑި ކަނޑައެޅުމަށް ވެސް ހިމަނާފައެވެ.

އެކަމާއި ގުޅޭ ގަރާރެއް ޑިމޮކްރެޓްސް އިން މިއަދު ބޭއްވި އިންޓެރިމް ކައުންސިލް ބައްދަލުވުމުގައި މުހައްމަދު ޝިފާޒް ހުށަހަޅުއްވާފައިވާއިރު، އެ ގަރާރުގައި ބަޔާންކޮށްފައިވާ ގޮތުގައި އެ ޕާޓީން މިވަގުތު އެންމެ އިސްކަން ދީގެން މަސައްކަތް ކުރަންވީ އިލްޔާސްގެ އިސްލާހުގެ މަސައްކަތް ކާމިޔާބު ކުރުމަށެވެ.

"ގާނޫނު އަސާސީއަށް ހުޅުދޫ ދާއިރާގެ މެންބަރު އިލްޔާސް ލަބީބު، ހުށަހަޅުއްވާފައިވާ އިސްލާހުގައިވާ ގޮތުގެ މަތިން، ރައްޔިތުންގެ މަޖިލީހުގެ މެންބަރުންގެ އަދަދު 76 ގޮނޑިއަށް މަދު ކުރުމަށާ، އެ އަދަދަަށްވުރެ މަޖިލީހުގެ ގޮނޑި، އިތުރު ނުކުރުމަށް މި ޕާޓީން (ޑިމޮކްރެޓްސް) އިން ވަކާލާތު ކުރުމަށާ، މި ޕާޓީން އެކަން ހާސިލް ކުރުމަށް ކުރެވެން ހުރި ހުރިހާ ކަމެއް ކުރުމަށާ، އެހެންނަމަވެސް އެ މަސައްކަތް ކާމިޔާބު ނުވެއްޖެނަމަ، ޑިމޮކްރެޓްސް އިން އިގްރާރު ވަނީ ކުރިއަށް އޮތް ރައްޔިތުންގެ މަޖިލީހުގެ އާއްމު އިންތިހާބުގައި މިޕާޓީގެ ފަރާތުން އިންތިހާބީ ހުރިހާ ދާއިރާއަކަށް ވާދަކުރުމަށެވެ." ޝިފާޒުގެ ގަރާރުގައި ބުނެފައިވެއެވެ.

ޝިފާޒުގެ އެ ގަރާރު މިއަދުގެ ބައްދަލުވުމުން ފާސްކޮށްފައިވާއިރު، އެ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ޑިމޮކްރެޓްސް ގެ ވަގުތީ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ، އެޕާޓީން އެންމެ އިސްކަމެއް ދޭނީ އިލްޔާސްގެ އިސްލާހުގެ މަސައްކަތަށް ކަމަށެވެ. އެހެންނަމަވެސް، އެ އިސްލާހު ފާސްނުވެއްޖެ ނަމަ، ޑިމޮކްރެޓްސް އިން މަޖިލީހުގެ ހުރިހާ ގޮނޑިއަކަށްވެސް ވާދަކުރާނެ ކަމަށް އޭނާ ވިދާޅުވި އެވެ.

"އެ އިސްލާހުގައިވާ ގޮތަށް އެކަންކަން ހަމަނުޖެހި ހިނގައްޖެ ނަމަ، ދެން އިލެކްޝަން ކޮމިޝަނުން އިއުލާނު ކުރާ ގޮނޑީގެ އަދަދަށް، މިހާރު ވެއްޖިއްޔާ އެއީ 93 ގޮނޑި ކަމަށް އިއުލާނު ކުރައްވާފަ އެވަނީ، އެހެންވީމަ އޭގެ މާނައަކީ މިވަގުތު އަޅުގަނޑުމެން 93 ގޮނޑިއަށް ވާދަކުރުމުގެ މަސައްކަތް އަޅުގަނޑުމެން ކުރާނެ ވާހަކަ،" ހަސަން ވިދާޅުވި އެވެ.

މީގެ އިތުރުން މިއަދުގެ އިންޓަރިމް ބައްދަލުވުމުގައި ޑިމޮކްރެޓްސް އިން ވަނީ އެޕާޓީގެ ލެޖިސްލޭޓިވް އެޖެންޑާއެއް އެކުލަވާލުމަށް ކުރެވެންހުރި ކަންކަން ކުރުމަށްވެސް ފާސްކޮށްފައި ކަމަށް ހަސަން ވިދާޅުވި އެވެ.