ހައުސިން ޔުނިޓްތަކުގެ އުޅޭމީހުންގެ ފަރާތުން 6،000 އަށްވުރެ ގިނަ މައްސަލަތައް މިހާތަނަށް ހުށަހަޅާފައިވޭ: އެފްޑީސީ

ފަހި ދިރިއުޅުން ކޯޕަރޭޝަން (އެފްޑީސީ) ގެ އަމާން ދޯދި އަދި އަމާން އުދަރެސް ޓަވަރުތަކުގެ ރައްޔިތުންގެ ފަރާތުން މިހާތަނަށް ޖުމްލަ 6،917 މައްސަލަ ހުށަހަޅާފައިވާ ކަމަށް އެ ކުންފުނިން ހާމަކޮށްފިއެވެ.

އެފްޑީސީން އެކްސްގައި ކުރި ޕޯސްޓެއްގައި ބުނީ، 13 އޮކްޓޫބަރު 2026 ގެ ނިޔަލަށް އެފްޑީސީގެ ޕޯޓަލް، އީމެއިލް، އަދި ރިސެޕްޝަނަށް ޖުމްލަ 6،917 މައްސަލަ ހުށަހަޅާފައިވެއެވެ. އޭގެ ތެރެއިން، 6،128 މައްސަލަ އެ ކުންފުނިން ހައްލުކޮށްފައިވާއިރު، މިހާރު ޖުމްލަ 789 މައްސަލަ އެ ކުންފުނިން ދަނީ ބަލަމުންނެވެ.

އެގޮތުން، އެފްޑީސީއަށް މިހާތަނަށް ހުށަހަޅާފައިވާ މައިގަނޑު މައްސަލަތަކަކީ ޔުނިޓުތަކާއި ގުޅޭ މައްސަލަތަކާއި، ޕޯޓަލް އަދި އިދާރީ ކަންކަމާއި ގުޅޭ މައްސަލަތަކާއި، އެހެނިހެން އާންމު ޝަކުވާތަކާއި ގުޅޭ މައްސަލަތަކެވެ.

ހަމައެއާކު، ޔުނިޓުތަކާއި ގުޅޭ ގޮތުން އެ ތަންތަނުން ފެން ލީކުވުމާއި، އެޕާޓްމަންޓްތަކުގެ މެއިންޓެނަންސް އާއި ގުޅޭ ކަންތައްތައް ހިމެނެއެވެ. އަދި ޕޯޓަލް އާއި އިދާރީ މައްސަލަތަކާއި ގުޅޭ ގޮތުން، ފައިސާ ދެއްކުމާއި މައުލޫމާތު އައު ކުރުމާއި ޔުނިޓުތަކަށް ގެންނަން އެދޭ ބަދަލުތަކާއި ގުޅޭ ކަންތައް ހިމެނެއެވެ. މީގެ އިތުރުން، އާންމު ޝަކުވާގެ ގޮތުގައި، އަޑުގަދަވުމުގެ އުނދަގުލާއި، އާންމު ސަރަހައްދުތަކުގެ ލިފްޓް މެއިންޓެނަންސް އާއި ގުޅޭގޮތުން އެ ކުންފުންޔަށް އެކި ފަރާތްތަކުން މައްސަލަތައް ހުށަހަޅާފައިވެއެވެ.

އެފްޑީސީން ވަނީީ، ދާދިފަހުން ޖުމްލަ 3،926 ފްލެޓުތަކުގެ ތެރެއިން 564 ފްލެޓުން މަހުން މަހަށް ގަވާއިދުން ކުލި ނުދައްކާ މައްސަލަ ވެސް ފާހަގަކޮށްފައެވެ.

އެގޮތުން، އެ ކުންފުނިން ވަނީ، ކުލި ނުދައްކާ ފަރާތްތަކުގެ ތެރެއިން 2 ފްލެޓެއް ހުސްކުރުމަށް އަންގައި އެ ފަރާތްތަކަށް ނޯޓިސް ފޮނުވައި، އެކަން އިއުލާންކޮށްފައެވެ. އަދި އެ އިއުލާން ކުރުމުން، ކުލި ނުދައްކާ ތިބި ގިނަ ފަރާތްތަކުން ފްލެޓްތަކަށް ކުލި ދެއްކުމަށްޓަކައި ގުޅާފައިވާކަން އޭގެފަހުން އެފްޑީސީން ހާމަކޮށްފައިވެއެވެ.