މަސްތުވާތަކެއްޗާއެކު ފިލްމުކުޅޭ ބަޔަކު ހައްޔަރުކުރި މައްސަލަ: ތިން މީހުން ދޫކޮށްލައިފި

ވިލިމާލޭގައި ހިންގި މަސްތުވާތަކެތީގެ އޮޕަރޭޝަނެއްގައި ދިވެހި ފިލްމީ ދާއިރާގައި ހަރަކާތްތެރިވާ ބަޔަކު ހައްޔަރުކުރި މައްސަލާގައި ހިމެނޭ ހަތަރު މީހުންގެ ތެރެއިން ތިން މީހަކު ފުލުހުންގެ ބަންދުން ދޫކޮށްލައިފިއެވެ.

މި ހިނގާ މަހުގެ 8 ވަނަ ދުވަހު ވިލިމާލޭގައި ފުލުހުން ހިންގި ހާއްސަ އޮޕަރޭޝަނެއްގައި ހައްޔަރުކޮށްފައިވަނީ އަހްމަދު އަޒްމީލް (އަޒޭ) އާއި، އިސްމާއީލް ޖުމައިހް (ޖުމާ) އާއި، މުހައްމަދު ވިޝާލް (ރޯމަން) ގެ އިތުރުން ޝާހިލް މުހައްމަދު ކިޔާ މީހެކެވެ. މި އެންމެންގެ މައްޗަށްވެސް ކޮށްފައިވަނީ މަސްތުވާތަކެތި ބޭނުންކޮށް، ގެންގުޅުމާއި، އެތަކެތީގެ ވިޔަފާރިކޮށް ޓްރެފިކް ކުރުމުގެ ތުހުމަތެވެ.

ފުލުހުން މިއަދު ބުނީ އެ މީހުންގެ މައްސަލައިގެ ތަހުގީގު ފުރިހަމަކުރުމަށްފަހު މިހާރު ޕްރޮސިކިއުޓާ ޖެނެރަލް (ޕީޖީ) ގެ އޮފީހަށް ފޮނުވާފައިވާ ކަމަށެވެ. އަދި ތަހުގީގު ފުރިހަމަވެފައިވާތީ، އޭގެ ތެރެއިން އެކަކު ފިޔަވައި ދެން ތިބި ތިން މީހުން މިހާރު ވަނީ ބަންދުން ދޫކޮށްލާފައި ކަމަށެވެ.

ބަންދުގައި މިވަގުތު ހުރި މީހާވެސް މިއަދުގެ ވަގުތެއްގައި ދޫކޮށްލާނެ ކަމަށް ފުލުހުން މައުލޫމާތު ދެއެވެ. ފުލުހުން އިތުރަށް ބުނީ، ކޯޓު މަރުހަލާގެ ތެރެއިން ކުރިއަށްދާއިރު އިތުރަށް އެމީހުން ހައްޔަރުގައި ބައިތިއްބަން ކޯޓުން އަމުރުކޮށްފިނަމަ، އެގޮތުގެ މަތިން އަމަލުކުރަމުން ގެންދާނެ ކަމަށެވެ.

މި މައްސަލައިގައި ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ކުރިން ވަނީ އެ ހަތަރު މީހުންގެ ބަންދަށްވެސް 15 ދުވަސް ދީފައެވެ. ބަންދު މަޖިލީހުގައި ފުލުހުން ވަނީ އެ މީހުންނަށް ކުރެވޭ ތުހުމަތުތަކާ ގުޅޭގޮތުން ކޮންމެވެސް މިންވަރެއްގެ ހެކި ހުށަހަޅާފައެވެ. އެގޮތުން، އެ މީހުން ތިބި ކޮޓަރީގެ މޭޒުމަތީގައި މަސްތުވާތަކެތި ހާމައަށް ފެންނަން ހުރިކަން ސީންއަށް ދިޔަ ފުލުހުންގެ ބަޔާނުން އެނގޭ ކަމަށް ކޯޓު އަމުރުގައި ފާހަގަކޮށްފައިވެއެވެ.

މީގެއިތުރުން، ހައްޔަރުކުރި މީހުންގެ ތެރެއިން ޖުމާ އަދި ރޯމަން ވަނީ މަސްތުވާތަކެތީގެ ތިން ބާވަތެއް ކަމަށްވާ އެމްއޭޕީ، ސީއޭޓީ އަދި ޓީއެޗްސީ އަށް ޕޮޒިޓިވްވެފައިވާކަން އިންވެސްޓިގޭޝަން އޮފިސަރު (އައިއޯ) ވަނީ ފާހަގަކޮށްފައެވެ.

އަދި މި މައްސަލައިގައި ހިމެނޭ މީހުންގެ ތެރެއިން ޖުމާ ފިޔަވައި ދެން ތިބި އެންމެންނަކީވެސް މީގެ ކުރިން ކުށުގެ އެކި ރެކޯޑުތަކުގައި ހައްޔަރުކޮށްފައިވާ މީހުންކަން ކޯޓުގެ ބަންދު އަމުރުން އެނގެން އޮވެއެވެ.