ޓިއުނީޝިއާ އިން ޑެންމާކް މޮޅުވިޔަނުދީ ހިފަހައްޓައިފި

ފީފާ ވޯލްޑް ކަޕުގެ ފެވަރިޓު ޓީމުތަކުގައި ގުނާލެވޭ ޑެންމާކް ކުޅުނު ފުރަތަމަ މެޗުގައި ޓިއުނީޝިއާ އިން އެ ޓީމު މޮޅުވިޔަނުދީ ހިފަހައްޓައިފި އެވެ.

އެންމެ ފަހުގެ ޔޫރޯގައި ވިދާލި ޑެންމާކް ޓީމު މިއަދު ހަވީރު ވޯލްޑްކަޕުގައި ކުޅުނު މެޗު ނިމުނީ ދެ ޓީމުންކުރެ ޓީމަކަށް ލަނޑެއް ނުޖެހިއެވެ.

މިއީ މި ފަހަރުގެ މުބރާތުގައި ލަނޑެއް ނުޖެހި ނިމުނު ފުރަތަމަ މެޗެވެ. މެޗުގެ 22 ވަނަ މިނެޓުގައި ޓިއުނީޝިއާގެ ޖެބާލީ ވަނީ ލަނޑު ޖަހާފައެވެ. އެކަމަކު ރެފުރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

މެޗުގެ ފުރަތަމަ ހާފު ނިމުމުގެ ކުރިން ޓިއުނީޝިއާގެ ލައިޑޫނީއަށް ވަނީ ލަނޑު ޖަހަން ފުރުސަތެއް ލިބި ބޭކާރުވެފައެވެ. އަދި ހާފު ނިމެން ތިން މިނެޓަށް ވެފައިވަނިކޮށް ޖެބާލީއަށްވެސް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ.

މުޅި މެޗުގައި ވެސް އެންމެ ބޮޑަށް ފާހަގަވީ ލިބުނު ހިލޭ ޖެހުންތަކެވެ. ދެ ޓީމަށްވެސް ލަނޑުޖަހާނެ ރަނގަޅު ގިނަ ފުރުސަތުތަކެއް މި މެޗުގައި ހިލޭ ޖެހުންތަކުން ލިބިގެންދިޔަ އެވެ. މިއީ ވޯލްޑް ކަޕުގެ ތާރީހުގައި މި ދެ ޓީމު ބައްދަލުކުރި ދެވަނަ ފަހަރެވެ. އެންމެ ފުރަތަމަ ބައްދަލުކުރީ ކޮރެއާ ޖަޕާނުގައި 2002 ވަނަ އަހަރު ބޭއްވި މުބާރާތުގައެވެ. އެ މެޗު ޑެންމާކް މޮޅުވީ 2-1 އިންނެވެ.