ޕީޕީއެމްގެ އެންމެހައި ހަރާކާތްތަކުން މަލީހު ސަސްޕެންޑް ކޮށްފި

ޕީޕީއެމްގެ ސެނެޓްގެ މެމްބަރެއްގެ ގޮތުގައި ހުންނަވައިގެން އެ ޕާޓީ ބަދުނާމުވާ ފަދަ ކަންކަން ކުރަމުން ގެންދާ ކަމަށްބުނެ އެ ޕާޓީގެ އެންމެހައި ހަރާކާތްތަކަކުން މުހައްމަދު މަލީހް ޖަމާލް ސަސްޕެންޑް ކޮށްފިއެވެ.

ޕީޕީއެމްގެ ދެ ނައިބް ރައީސުން ކަމަށްވާ، ފިޝަރީޒް މިނިސްޓަރު އަހްމަދު ޝިޔާމް އަދި ޑިފެންސް މިނިސްޓަރު މުހައްމަދު ޣައްސާން މައުމޫން ސޮއިކުރައްވާ މަލީހުއަށް ފޮނުވި ސިޓީއެއްގައި ބުނެފައިވަނީ، ޕީޕީއެމްގެ ލީޑަރޝިޕަށް އަދި އެ ޕާޓީގެ ސެނެޓަށްވެސް އެންގުމެއް އަދި މަޝްވަރާ ކުރުމެއްނެތި އަމިއްލައަށް ކޮމެޓީ ހަދައިގެން ޕާޓީގެ އަސާސްތަކާއި ޚިލާފުވާހެން ޕާޓީ ބަދުނާމުވާހެން މަލީހު މަސައްކަތް ކޮށްފައިވާކަމަށެވެ.

މީގެ އިތުރުން އެ ސިޓީގައި ބުނެފައިވަނީ އެކަންކަމަށް ބަލައި ޕާޓީގެ އަސާސީ ގަވާއިދުގެ 8 ވަނަ މާއްދާއިން އެ ޕާޓީގެ ލީޑަރޝިޕަށް ލިބިގެންވާ ބާރުގެ ދަށުން ޕާޓީގެ އެންމެހައި ހަރަކާތްތަކަކުން މަލީހު ސަސްޕެންޑް ކޮށްފައިވާކަމަށެވެ.

އަދި މީގެ އިތުރުން މަލީހުގެ މައްސަލަ އެ ޕާޓީގެ ސުލޫކީ ކޮމިޓީއަށް ފޮނުވައިފައި ވާކަމަށާއި އެ ކޮމެޓީން ވަކި ގޮތެއް ނިންމަންދެން ޕާޓީގެ އެއްވެސް ހަރަކާތެއްގައި މަލީހުއަށް ބައިވެރިވި ނުވެވޭނެ ކަމަށްވެސް އެ ސިޓީގައި ބުނެފައިވެއެވެ.

މަލީހުއާއި މެދު ފިޔަވަޅު އަޅާފައި މިވަނީ، ޕީޕީއެމްގެ ކޮންގްރެސް އިން ފާސްކޮށް އެ ޕާޓީ ހިންގުމުގެ ގަވައިދެއް ކަނޑައަޅާފައި ވަނިކޮށް، އޭގެ ބޭރުން ކުރީގެ ރައީސް ޔާމީން ވަގުތީ ކޮމިޓީއެއް އެކުލަވައިލައްވާފައިވާ ކަމަށް ބުނެ، ރޭ އެ ކޮމިޓީން ބޭއްވި ނޫސްވެރިންގެ ބައްދަލުވުމާއި ގުޅިގެންނެވެ. މި ކޮމިޓީގެ އިދާރީ ގޮތުން އެ ކޮމިޓީގައި އެންމެ އިސްކޮށް އުޅުއްވަނީ މަލީހެވެ. ނަމަވެސް ޕާޓީގެ ލީޑަޝިޕްގެ އެއްވެސް ބޭފުޅަކު މި ކޮމިޓީގައި ނުހިމެނެއެވެ.