ވިއްސާރަތަ؟ ހޫނު ހޫނު ޗިކަން ސޫޕް ކިހިނެއް ވާނެ؟ މިއޮތީ ރެސިޕީ!

ވިއްސާރަ ދުވަސް ދުވަހާއި ވިއްސާރަ ނޫން ދުވަސް ދުވަހުވެސް ސޫޕް ތައްޓެއް ބުއިމަކީ ހިތަށް ވަރަށް ވެސް ހަމަޖެހުން ގެނުވާނެ ކަމެކެވެ. އެހެންކަމުން މިއަދު 'ވޮއިސް'ގެ ބަދިގެއިން މި ގެނެސްދެނީ މީރުކޮށް ޗިކަން ސޫޕް ތައްޔާރު ކޮށްލާނެ ގޮތެވެ.

ބޭނުންވާ ތަކެތި

900ގ ބޯންލެސް ކުކުޅު (ކޮށާފައި)

2 ކެރެޓު (ބޮޑެތިކޮށް ހަތަރެސްކަން ގޮޅިއަށް ކޮށާފައި)

1 ލީކްސް (ތުނިކޮށް ކޮށާފައި)

1 ފިޔާ (ހަތަރު ފަޅިއަށް ފަޅާފައި)

8 ތަށި ފެން

ޕާސްލޭ ފަތް (ކޮށާފައި)

ނޫޑްލްސް ސޫޕް ޕެކެޓް

އަސޭމިރުސް

6 ލޮނުމެދު (ބޮޑެތިކޮށް ކޮށާފައި)

20ގ ބަޓަރ

ހިކަނދިފަތް

ގިތެޔޮމިރުސް

ހިކި ރަތް މިރުސް (ބޮޑެތިކޮށް ކޮށާފައި)

ތައްޔާރު ކުރާނެގޮތް

1) ތެއްޔަކަށް ފެން އަޅައި އޭގެ ތެރެއަށް 1 ކެރެޓާއި އަދި އެއް ލީކްސްގެ ދެބައި ކުޅަ އެއްބައި އެޅުމަށް ފަހު، ކުކުޅާއި، ލޮނު އަދި އަސޭމިރުސް އަޅައި ކައްކަން އުދާށެވެ.

2) ކުކުލު ކޮޅު ރަނގަޅަށް ރޯފިލުމުން އޭގެ ތެރެއަށް ބާކީ ހުރި ތަރުކާރީ އާއި ފިޔާ އާއި ލޮނުމެދު، ހިކަނދިފަތް އަދި މިރުސް ކޮޅު އަޅާލާށެވެ. އެއަށްފަހު 10 ވަރަކަށް މިނެޓު ކައްކާލާށެވެ.

3) ލޮނު ހެޔޮވަރު ކޮށްލުމަށްފަހު ބަޓަރ ކޮޅު އަޅާލައި، ފަސް މިނެޓް ވަންދެން މަޑު ގިނީގައި ކައްކާލާށެވެ.

ޗިކަން ސޫޕް އެހުރީ ތައްޔާރު ވެފައެވެ. ގާލިކް ބްރެޑާއި އެކު ހުތް ކޮޅެއް ޖަހާލައިގެން ވަރަށް މީރުވާނެއެވެ.