ދިވެހި ދައުލަތުގެ މާލީ ކަންކަމުގައި ލަފަޔާއި މަޝްވަރާ ހޯދުމަށް ލަންޑަނަށާއި ވޮސިންޓަނަށް ދަނީ
ރައިސުލްޖުމުހޫރިއްޔާ ޑރ.މުހައްމަދު މުއިއްޒުގެ އިޤްތިޞާދީ ސިޔާސަތު ދުނިޔެއިން ބަލައިގެންފި ކަމަށާއި މާލީ ކަންކަމުގައި ދެން އަމަލުކުރާނެ ގޮތްތައް ހޯދުމަށް ލަންޑަނަށާއި ވޮސިންޓަނަށް ދިއުމުގެ ފުރުސަތު މި ސަރުކާރަށް ލިބިފައިވާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރ ސައީދު މިފަދައިން ވިދާޅުވެފައިވަނީ ރައީސްޑރ.މުހައްމަދު މުއިއްޒު އުތުރުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި ބައިވެރިވެވަޑައިގެން މިއަދު ށ.މިލަންދޫގައި ވާހަކަފުޅު ދައްކަވަމުންނެވެ.
މިނިސްޓަރ ސައިދު ވިދާޅުވީ ރާއްޖޭގެ މާލީ ކަންކަމުގައި ދެން އަމަލު ކުރާނެ ޒަމާނީ ގޮތްތަކުގެ ހައްލު ހޯދުމަށް ދެން މި ސަރުކާރުން ދާނީ ދުނިޔޭގައި އެންމެ ކުރިއަރާފައިވަ ޤައުމުތަކަށް ކަމަށާއި އެގޮތުން ވަރަށް އަވަހަށް އިނގިރޭސި ވިލާތުގެ ވެރިރަށް ލަންޑަނަށް ދަތުރުކުރަން ހަމޖެހިފައިވާ ކަމަށެވެ.
"މާލީ ކަންކަމުގައި ރާއްޖެ ދެން މިސްރާބު ބައްޓަން ކުރާނެ މޮޑާން ނުވަތަ ޒަމާނީ ހައްލު ހޯދުމުގެ ގޮތުން އެންމެ ކުރިއަރާފައިވާ މާލީ ނިޒާމުތަކާ ރާއްޖެއިން ވާހަކަ ދައްކަން ލަންޑަނަށް ވެސް ދަތުރު ކުރަން އިނގިރޭސި ސަރުކާރުން ވަނީ ރައީސަށް އިންތިޒާމު ފަހިކޮށްދެއްވާފައި،" ސައީދު ވިދާޅުވި އެވެ.
ސައީދު ވިދާޅުވި ގޮތުގައި މެއި މަހުގެ 15 އަށް އިނގިރޭސިވިލާތަށް ދިއުމަށް އެ ޤައުމުން ވަނީ ކަންތައްތައް ފަހިކޮށްދީފައެވެ. އަދި ޖުލައި 10 ގައި ރާއްޖޭގެ ވިޔަފާރި ވަފުދެއް ވޮސިންޓަނަށް ދިއުމުގެ ފުރުޞަތު އެމެރިކާ ސަރުކާރުން ރައީސް ޑރ.މުހައްމަދު މުއިއްޒަށް ތަނަވަސް ކޮށްދެއްވާފައިވާ ކަމަށެވެ.
"ރާއްޖެއިން ފުރަތަމަ ފަހަރަށް ޓްރޭޑު ޑެލިގޭޝަނެއް ވޮޝިންޓަނަށް ދާނެ. އެކަން ރައީސްއަށްޓަކައި އެމެރިކާ ސަރުކާރުން ވަނީ ފަހިކޮށްދެއްވާފައި،"
މިނިސްޓަރ ސައީދު ވިދާޅުވި އެވެ.
ސައީދު އިތުރަށް ފާހަގަކުރެއްވި ގޮތުގައި މިސަރުކާރަށް މިވީ ކުޑަ ދުވަސްކޮޅުގެ ތެރޭގައި ވަނި ދުނިޔޭގެ މާލީ އިދާރާތަކުގެ ފުރިހަމަ އިތުބާރު ހޯދާފައި ކަމަށާއި ރާއްޖެއަށް އިންވެސްޓަރުން އައުމަށް ކެތްމަދުވެފައިވާ ކަމަށެވެ.
މިނިސްޓަރ ސައީދު މިފަދައިން ވިދާޅުވެފައިވާއިރު ދުނިޔޭގެ މާލީ އިދާރަތަކުން ދާދިފަހުން ވަނީ ރާއްޖެއަށް ޒިޔާރަތްކޮށް ރާއްޖޭގެ އިޤްތިޞާދީ ހާލަތު ދެނެގަނެފައެވެ.
މިސަރުކާރަށް މިވީ ކުރުމުއްދަތުގެ ތެރޭގައި މި ސަރުކާރުންވަނީ ދުބާއީ އާއި ޗައިނާގައި ދެ އިންވެސްޓް ފޯރަމެއް ބާއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
