ޤައުމު ދަރުވާލައި ޚިޔާނާތްތެރިވުމަށްފަހު، ވޯޓު ހޯދަން އަންނަން އެމްޑީޕީން ލަދުގަންނަންޖެހޭ: ޝަކީލް

އެމްޑީޕީގެ ސަރުކާރުން އެތައް ސަތޭކަ މިލިއަން ޑޮލަރުގެ ބޮޑެތި އަދަދުތަކުން ޤައުމު ދަރުވާލާފައުވާ ކަމަށާ، ގައުމަށް އެފަދައިން ޚިޔާނާތްތެރިވުމަށްފަހު، ވޯޓު ހޯދަން ރައްޔިތުން ކައިރިއަށް އަންނަން ލަދުގަންނަން ޖެހޭނެ ކަމަށް މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

ފިނޭންސް މިނިސްޓްރީން އިއްޔެ ހާމަކޮށްފައިވާ މަޢުލޫމާތުތަކަށް ބަލާއިރު، ސޮވެރިން ޑިވެލޮޕްމެންޓް ފަންޑާއި ރިޒާވްގައި ރައްކާކޮށްފައި ހުރި ފައިސާ ބޭނުންކޮށްގެން، ރާއްޖެއިން އަދާކުރަންޖެހޭ 500 މިލިއަން ޑޮލަރުގެ ސުކޫކު މިހާރު ވަނީ ދައްކައި ޚަލާޞްކޮށްފައެވެ. ސަރުކާރުން ވަނީ މި ސުކޫކުގެ ފައިދާގެ ގޮތުގައި ދައްކަންޖެހޭ 24.68 މިލިއަން ޑޮލަރާއެކު، ޖުމްލަ 524.68 މިލިއަން ޑޮލަރު ދައްކާފައެވެ.

މި ސުކޫކަކީ ކުރީގެ ސަރުކާރުން ނެގި 250 މިލިއަން ޑޮލަރުގެ "ސަނީ ސައިޑް ބޮންޑު" އަދާކުރުމަށްޓަކައި 2021 ވަނަ އަހަރު އޭރުގެ ސަރުކާރުން ވިއްކި ސުކޫކެކެވެ.

އެކަމާގުޅިގެން އެކްސްގައި ކުރެއްވި ޕޯސްޓެއްގައި ޝަކީލް ވިދާޅުވި ގޮތުގައި ‏އެމްޑީޕީ ސަރުކާރުން އެތައް ސަތޭކަ މިލިއަން ޑޮލަރުގެ ބޮޑެތި އަދަދުތަކުން ގައުމު ދަރުވާލައި ގައުމު ބަނގުރޫޓު ވުމާ ދިމާލަށް ދަނިކޮށް ރައީސް ޑރ.މުއިއްޒު މި ދަރަނިތައް ދައްކަވައި ގައުމު ބަނގުރޫޓުވުމުން ސަލާމަތްކޮށްދެއްވާފައިވާ ކަމަށެވެ.

‏”އެމްޑީޕީ ސަރުކާރުން ދިވެހިގައުމާއި ރައްޔިތުންނަށް މިވަރުގެ ބޮޑު ހިޔާނާތެއް ވެފައި މިއަދު އެމްޑީޕީން ދިވެހި ރައްޔިތުން ކައިރިއަށް ވޯޓު ހޯދަން އަންނަން ލަދުގަންނަންޖެހޭނެ“ ޝަކީލް ވިދާޅުވިއެވެ.