ގުރުއާން އެންދުމަށް ސްވިޑެންގެ ސަރުކާރުން ހުއްދަ ދިނުމަކީ ލަދުވެތިވާންޖެހޭ ކަމެއް: ޑރ. ވަހީދު
ސްވިޑެންގެ ފާ-ރައިޓް، ސިޔާސީ ޕާޓީއެއްގެ ލީޑަރަކު ކަމަށްވާ ރަސްމުސް ޕަޑުލާން ޤުރްއާން އަށް އިހާނަތް ކޮށް ހިތުމަށް ހިންގި އަމަލަށް ސްވިޑްންގެ ސަރުކާރުން ހުއްދަ ދިނުމަކީ ލަދުވެތިވާން ޖެހޭ އަމަލެއް ކަމަށް ކުރީގެ ރައީސް މުހައްމަދު ވަހީދު ވިދާޅުވެއްޖެއެވެ.
ކުރީގެ ރައީސް ވަހީދު އިއްޔެގެ ވަގުތެއްގައި ކުރައްވާފައި ޓްވީޓެއްގައި ވަނީ ރަސްމުސް ޕަޑުލާން ޤުރްއާން އަށް އިހާނަތް ކޮށް ހިތުމަށް ހިންގި އަމަލަށް ސްވިޑްންގެ ސަރުކާރުން ހުއްދަ ދިނުމަކީ ލަދުވެތިވާން ޖެހޭ އަދި އެތައް މިލިއަން މުސްލިމުންނަށް ޤަބޫލްނުކުރެވޭނެ ފަދަ އަމަލެއް ކަމަށެވެ.
އަދި ދިވެހިރާއްޖެއިން މި އަމަލު ކުށްވެރި ކުރާކަމަށް ވެސް ވިދާޅުވެފައިވެއެވެ.
ފާ- ރައިޓް ޕާޓީގެ ހަރުކަށި ލީޑަރު ރަސްމުސް ޕަލުޑާން އިސްވެ ހުރެ އެ ޕާޓީގެ މެމްބަރުން ތަކެއް ގުރުއާން ލިޔެފައިވާ ޚަތިމުތަކެއް ސްވިޑެން ގައި ހުންނަ ތުރުކިޔޭ އެމްބާސީ ކުރިމަތީގައި އަންދާފައިވަނީ އިއްޔެގެ ވަގުތެއްގައެވެ.
ސްވިޑެން ގެ ސަރުކާރުގެ ހުއްދައާއި އެކު ފުލުހުންގެ ފުރިހަމަ ހިމާޔަތުގެ ދަށުގައި ހިންގި މި ހަރުކަށި އަމަލު ގާތްގަޑަކަށް ގަޑި އިރެއްހާ އިރުވަންދެން ކުރިއަށް ދިޔަ އިރު، މި ހަރަކާތުގެ ތެރެއިން، ހަތިމުތަކެއް އެންދުމުގެ އިތުރުން ތުރުކިޔޭ އާއި ދެކޮޅަށް އަޑު އުފުލައި އިސްލާމް ދީނަށް ފުރައްސާރަ ވެސް ވަނީ ކޮށްފައެވެ.
މިކަމާއި ގުޅިގެން ގިނަ އަދަދެއްގެ މުސްލިމް ގައުމު ތަކުންވެސް އަންނަނީ ނުރުހުން ފާޅުކުރަމުންނެވެ. އެގޮތުން، ތުރުކިޔޭ، ސައުދީ އަރަބިއްޔާ، ޖޯޑަން އަދި ކުވޭތުން ވަނީ އެކަން ކުށްވެރިކޮށް ބަޔާން ވެސް ނެރެފައެވެ.
ސްވިޑެން ގެ ސަރުކާރުގެ ހުއްދަ އާއި އެކު ރަސްމުސް ޕަލުޑާން ކުރިއަށް ގެންދިޔަ މި ހަރަކާތަކީ ސްވިޑެން ނޭޓޯގެ މެންބަރަކަށް ވުމަށް ތުރުކިޔޭ އިން ހުރަސް އަޅަމުން ގެންދާތީ ހިންގި ހަރަކާތެއް ކަމަށް އެމީހުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
