އެމްޑީއޭއާއި ޕީޕީއެމް އަކީ އެއްބަޔެއް، ކޯލިޝަން ހަދާނެކަމުގެ އުންމީދު ބޮޑު: އިދިކޮޅު

މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަކީ އެއްބަޔެއް ކަމަށާއި، ކުރިއަށް އޮތް ރިޔާސީ އިންތިޚާބުގައި އެމްޑީއޭއިން ޕީޕީއެމްއާއެކު ކޯލިޝަން ހަދާނެކަމުގެ އުންމީދު ވަރަށް ބޮޑުކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ.

ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން އެ ދެޕާޓީން ވަނީ މިއަދު މަޝްވަރާ ބައްދަލުވުމެއް ބާއްވާފަ އެވެ.

އެ ބައްދަލުވުމަށްފަހު ނޫސްވެރިންނާއި ވާހަކަދައްކަވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބުރާހިމް ޝުޖާއު ވިދާޅުވީ ޕީޕީއެމްއާއި އެމްޑީއޭއަކީ އެކުގައި މަސައްކަތް ކުރުމުގެ ތާރީހެއް އޮތް ދެ ޕާޓީކަމަށެވެ.

މިއަދު ކުރިއަށް ދިޔަ ބައްދަލުވުމަކީ ދެ ޕާޓީ ގުޅިގެން އިންތިޚާބުގައި މަސައްކަތް ކުރުމާއި ގުޅޭގޮތުން ކުރިއަށް ގެންދިޔަ ފުރަތަމަ ބައްދަލުވުން ކަމަށާއި، އަދި އެއީ ވަރަށް ކާމިޔާބު ބައްދަލުވުމެއްކަމަށް ޝުޖާއު ވިދާޅުވި އެވެ.

"ޕީޕީއެމް އާއި އެމްޑީއޭއަކީ މީ ވަކިނުވެވޭވަރުގެ ދެޕާޓީ، އަޅުގަނޑުމެންގެ އޮންނާނެ ވަރަށް ރީތި ތާރީހެއް ރައީސް އަބްދުالله ޔާމީން އަބްދުލްގައްޔޫމު، ޕީޕީއެމްގެ ރިޔާސީ ކެންޑިޑޭޓާއި އެމްޑީއޭގެ ރައީސް އޮނަރަބަލް ޝިޔާމަކީ މީ ވަރަށް ގާތް ދެބޭފުޅުން. އެހެންވެ އަޅުގަނޑުމެން ރައީސް ޔާމިންގެ ކާމިޔާބު ވެރިކަމުގައި އެންމެ މުހިންމު އެއް ބައިވެރިއަކީ އެމްޑީއޭ. އެހެންވީމަ އެމްޑީއޭއާ ޕީޕީއެމްއާއި ޕީއެންސީއަކީ މީ ހަގީގަތުގައި ތިން ޕާޓީއެއް ނަމަވެސް އެއް ޕާޓީއެއް. އަޅުގަނޑުމެންގެ ހަގީގަތުގައި ވަރަށް ކާމިޔާބު ބައްދަލުވުމެއް މި ދިޔައީ، އަޅުގަނޑުމެންވެސް ދައްކަން ޖެހޭ ވާހަކަތަކާއި، އަދި ޕާޓީއެއްގެ ގޮތުގައި އެމްޑީއޭވެސް ދައްކަން ޖެހޭ ވާހަކަތަކާއި ފުރަތަމަ ބައްދަލަވުން މި ބޭއްވުނީ"

ޕީއެންސީގެ ނައިބުރައީސް އިބްރާހިމް ޝުޖާއު

ޝުޖާއު އިތުރަށް ވިދާޅުވީ އިދިކޮޅުން މީގެ ކުރިން އެމްޑީއޭއާކު ކޯލިޝަން ހެދުމުގެ ޝައުގުވެރިކަން ފާޅުނުކުރީ، އެ ޕާޓީގެ ލީޑަރު ވެރިކަމަށް ކުރިމަތިލައްވާނެކަމަށް އިއުނާލުކޮށްފައި އޮތުމުން ކަމަށެވެ.

އެހެން ނަމަވެސް ޕާޓީގެ ސްޓޭންޑު ބަދަލުވުމުން، ޕީޕީއެމްއިން ކޯލިޝަން ހެދުމަށް އެންމެ ފުރަތަމަ މަޝްވަރާކޮށްފައިވާނީ އެމްޑީއޭއާކަމަށް ޝުޖާއު ވިދާޅުވި އެވެ. އަދި އެމްޑީއޭއާއެކު ކުރިއަށް އޮތް އިންތިޚާބުގައި މަސައްކުރެވޭނެކަމަށް އުންމީދުކުރައްވާކަމަށް ވިދާޅުވި އެވެ.