ބޮޑުތަކުރުފާނު މަގުގެ މަރާމާތުގެ މަސައްކަތް 10 ދުވަސްތެރޭ ނިންމާލެވޭނެކަމަށް ލަފާކުރެވޭ: މޭޔަރު މުއިއްޒު

ބޮޑުތަކުރުފާނުމަގު މަރާމާތުކުރުމުގެ މަސައްކަތް 10 ވަރަކަށް ދުވަސް ތެރޭގައި ނިންމޭނެކަމަށް ލަފާކުރެވޭ ކަމަށް މާލެސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ބޮޑުތަކުރުފާނު މަގުގެ މަރާމާތުގެ މަސައްކަތަށް ބޭނުންވާ ތަކެތި ގެނެސް، އަމަލީ މަސައްކަތް ފަށާފައިވަނީ 21 އޭޕްރީލް ވީ ހުކުރުދުވަހު ދުވަހުއެވެ.

މި މަސައްކަތާއި ގުޅިގެން ކުރެއްވި ޓްވީޓެއްގައި މޭޔަރ ޑރ. މުޢިއްޒު ވިދާޅުވީ ބޮޑުތަކުރުފާނު މަގާއި، ޢިއްޒުއްދީން މަގުގެ ތާރު އެޅިބައި މަރާމާތުގެ މަސައްކަތް ވަރަށް ބާރަށް ކުރިޔަށްދާކަމަށެވެ. އަދި މި މަސައްކަތް 10 ވަރަކަށް ދުވަސް ތެރޭގައި ނިންމޭނެކަމަށް ލަފާކުރެވޭ ކަމަށްވެސް މޭޔަރު ވިދާޅުވިއެވެ.

ބޮޑުތަކުރުފާނު މަގުގެ މަރާމާތުގެ މަސައްކަތް ކުރަމުންދަނީ މާލެ އާއި ހުޅުމާލެއާއި ގުޅުވައިދޭ ހައިވޭ ހެދި ކުންފުނި ކަމަށްވާ ޗައިނާގެ ހުނާން އިންޖިނިއަރިންގ ކޯޕަރޭޝަން ލިމިޓެޑުންނެވެ.

ބޮޑުތަކުރުފާނުމަގު މަރާމާތު ކުރުމުގެ މަސައްކަތް މާލޭ ސިޓީ ކައުންސިލުން ފަށާފައިވާއިރު، އެ މަގަކީ މަގަކީ ހިތްފަސޭހަ މަގަކަށް ހެދުމަށް ސިޓީ ކައުންސިލުން ވަނީ މަގުގެ އެއްފަރާތުގައި ކަދުރު ރުށް ޖަހާ، ރުށްތަކުގެ ވަށައިގެން ބޯގަންވިލާ މާ ގަސްތައް ޖަހާ ޒީނަތްތެރިކޮށްފަ އެވެ.

ސިޓީ ކައުންސިލްގެ އެ މަސައްކަތަށް އާންމުންގެ ބޮޑު ތަރުހީބެއްވެސް ވަނީ ލިބިގެން ގޮސްފައެވެ.