ބަންޑަރަ ގޯތި ދޫކުރާ ސިޔާސަތު މިނިސްޓަރު އަސްލަމަށް ކަމަކު ނުދޭ!

ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ސަރުކާރުން ގެންގުޅޭ ބަންޑާރަ ގޯތި ދޫކުރުމުގެ ސިޔާސަތާއި ޕްލޭނިން މިނިސްޓަރު މުހައްމަދު އަސްލަމްގެ ޚިޔާލު ތަފާތުކަން އެމަނިކުފާނު މަޖިލީހުގައި ހާމަކުރައްވައިފި އެވެ.

މިއަދުގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވަނީ ބްނޑާރަ ގޯތި ދޭ އުސޫލަކީ ރަނގަޅު އުސޫލެއް ނޫންކަމަށް މީގެކުރިން ޕްލޭނިން މިނިސްޓަރު އަސްލަމް ވިދާޅުވެފައިވާއިރު، މި ސަރުކާރުން ގޯތި ދޫކުރުމުގެ މަޝްރޫއެއް އިއުލާނުކޮށް އަދި ބިން ހިންކައިގެން ވެސް ގޯތި ދޫކުރުމަށް މަސައްކަތްތަކެއް ކުރެވެމުންދާއިރު، އެކަމާއި މިނިސްޓަރު ދެކެވަޑައިގަންނަވާ ގޮތަކީ ކޮބައިތޯ އައްސަވާ ސުވާލުކުރައްވާފަ އެވެ.

"މީގެ ކުރިން މިނިސްޓަރު ވިދާޅުވި ބަންޑާރަ ގޯތި ދޫކުރާ އުސޫލަކީ ދުނިޔޭގެ ކަން ހިނގާ ގޮތެއް ނޫނޭ، ރާއްޖޭގައި ވެސް އެގޮތަށް ކަންކުރާކަށް މިނިސްޓަރު ޤަބޫލުފުޅެއް ނޫނޭ. އެކަމަކު މިހާރު ފެންނަނީ ފަޅު ހިއްކައިގެން ވިޔަސް ހިލޭ ގޯތި ދެވޭނެ ވާހަކަ.. ބަންޑާރަ ގޯތި ދެވޭނެ ވާހަކަ"

މަހިބަދޫ ދާއިރާގެ މެމްބަރު އަހުމަދު ތާރިގު

ތާރިގުގެ އެ ސުވާލަށް ޖަވާބުދެއްވަމުން އަސްލަމް ވިދާޅުވީ ބަންޑާރަ ގޯތި ދޫކުރުމަކީ ރަނގަޅު އުސޫލެއްކަމަށް އަަދިވެސް އެމަނިކުފާނު ޤަބޫލުފުޅު ނުކުރައްވާކަމަށެވެ.

އެހެން ނަމަވެސް ބަންޑާރަ ގޯތި ދޫކުރުމުގެ އުސޫލަކީ ބޯދާ ޒަމާނުއްސުރެ ރާއްޖޭގައި އޮންނަ އުސޫލެއް ކަމަށާއި، އެންމެ މީހެއްގެ ވިސްނުމަށް އެ އުސޫލު ބަދަލުކުރެވޭނެކަމަށް ދެކިވަޑައިނުގަންނަވާކަމަށް މިނިސްޓަރު ވިދާޅުވި އެވެ.

އޭގެ އިތުރުން މިނިސްޓަރު ވިދާޅުވީ ގޯތި ދޫކުރުމާއި ގުޅޭގޮތުން މިހާރަށްވުރެ ފުޅާކޮށް މަޝްވަރާކުރެވި، އެންމެންނަށް ގަބޫލުކުރެވޭ ކަމަކަށް ވެގެން ނޫނީ އެ އުސޫލު ބަދަލު ނުކުރެވޭނެކަމަށް މިނިސްޓަރު ވިދާޅުވި އެވެ.

"އަޅުގަނޑު ތަކުރާރުކޮށް ދަންނަވާނަން، މީ އަޅުގަނޑުމެން ވިސްނާފަކުރަން، އެއީ ސަސްޓެއިނަބަލް ގޮތުގައި ކުރެވޭނެކަމެއް ކަމަކަށް އަޅުގަނޑަކަށް ނުފެނޭ ދުރުމުސްތަގުބަލަށް ބަލާއިރު، އެހެންވީމަ އަބަދަކު އެހެން ބަންޑާރައިން ގޯއްޗެއް ނުވެސް ދެވޭނެ، ކިހެނެއްތޯ އަޅުގަނޑުމެން އެކަން ބަދަލުކުރާނީ؟ އެއީ ދައްކަން ޖެހޭ ވާހަކައެއްކަމަށް މިއަދުވެސް އަޅުގަނޑު ޤަބޫލުކުރަނީ"

ޕްލޭނިން މިނިސްޓަރު މުހައްމަދު އަސްލަމް

ބޯހިޔާވަހިކަމަށް ގޯތި ދޫކުރުމުގެ ސިޔާސަތާއި މިނިސްޓަރުގެ ޚިޔާލު ތަފާތުކަން އެމަނިކުފާނު ހާމަކުރައްވާފައިވާއިރު، މާލޭގެ ރަށްވެހިންނަށް ދޫކުރާ ގޯތީގެ އަދަދުތައްވެސް ސަރުކާރުން ވަނީ އިތުރުކޮށްފަ އެވެ.

އަދި ހުޅުމާލެ ތަރައްގީކުރުމަށް ކުރީ ސަރުކާރުން އެކުލަވާލާފައިވާ މާސްޓަ ޕްލޭނަށް ބޮޑެތި ބަދަލުތަކެއް ގެނެސް ހުޅުމާލޭ ދެވަނަ ފިޔަވަހީގެ ފަޅު ހިއްކައިގެން ގޯތި ދޫކުރުމަށް ސަރުކާރުން ވަނީ ނިންމާފައެވެ.

މިނިސްޓަރުގެ ވާހަކަތަކަށް ބަލާއިރު، ސަރުކާރުން މިގޮތަށް ނިންމާފައިވަނީ އެކަށީގެންވާ މަޝްވަރާތަކެއް ނުކޮށްކަމަށް ބެލެވެއެވެ.

އެއީ މިނިސްޓަރުގެ ވާހަކައިގައި ވެސް ވަނީ ގޯތި ދޫކުރުމާއި ގުޅޭގޮތުން މަޝްވަރާތަށް ކުރެވެން ޖެހޭ ކަމަށާއި، އެ ނޫން ގޮތަކަށް ބޯހިޔާވަހިކަމުގެ މައްސަލަ ޙައްލު ކުރެވޭނެ ގޮތްތަށް ހޯދާ ބަލަން ޖެހޭކަމަށް ވިދާޅުވެފަ އެވެ.