ރާއްޖެއަށް ލިބުނު ސަރަހައްދަކީ މީގެ ކުރިން ސިފައިންނަށް ވެސް ދެވުނު ހިސާބެއް ނޫން: ޝިފާއު

ރާއްޖޭގެ ދެކުނުގެ އިން ކަނޑައެޅުމަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލަ ނިމިގެން ދިޔަ ގޮތުން ދިވެހިންނަށް ލިބިގެން ދިޔަ ސަރަހައްދަކީ މީގެ ކުރިން ސިފައިންނަށް ވެސް ދެވުނު ސަރަހައްދެއް ނޫން ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެ އެވެ.

ޝިފާއު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ދެވަނަ ދައުރުގެ ތިން ވަނަ ޖަލްސާގައި ވާހަކަދައްކަވަމުން ނެވެ.

ޝިފާއު ވިދާޅުވީ މި ސަރުކާރުން މަސްވެރިންނަށް ކޮށްދިން އެންމެ ބޮޑު ކަމަކީ ދެކުނުގެ އިން ކަނޑައެޅުމުގެ މަސައްކަތް ކަމަށެވެ. އެ މަސައްކަތުގެ ތެރެއިން ދެކުނުގެ ސަރަހައްދަކީ ކޮބައިކަން ކަނޑައެޅިގެން ގޮސްފައިވާކަމަށާއި، މިހާރު އެ ސަރަހައްދަކީ ރާއްޖެއަށް ފުރިހަމައަށް ސިޔާދަތު ލިބޭ ސަރަހައްދަކަށް ވެގެން ގޮސްފައިވާކަން އޭނާ ފާހަގަކުރެއްވި އެވެ.

" މި ނިމިގެން ދިޔަ ނިންމުމާއެކު، އަޅުގަނޑުމެންނަށް ކަނޑުގެ ސަރަހައްދުގެ ފުރިހަމަ ބާރުވެރިކަން ލިބިއްޖެ. މިއަދު ދިވެހި ސިފައިންނަށް އެ ސަރަހައްދު ދާއަޅާ ބޯޓުފަހަރު އަޅާތޯ އާއި އެ ތަންތަނުގައި ކުރަނީ ބެލޭނެ ފުރިހަމަ ބާރުވެރިކަން ލިބިއްޖެ. މީ ދިވެހި މަސްވެރިންނަށް ލިބުނު ވަރަށް ބޮޑު ކުރިއެރުމެއް"

މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު

ޝިފާއު އިތުރަށް ވިދާޅުވީ ކުރީ ސަރުކާރުތަކުން މަސްވެރިންނަށް ނުދީ ހުރި ފައިސާ ދިނީވެސް ރައީސް ޞާލިހު ވެރިކަމަށް ވަޑައިގެންކަމަށެވެ.

މި ސަރުކާރަށްވުރެ ބޮޑަށް މަސްވެރިކަމުގެ ސިނާއަތަށް ޙަރަދުކުރަމުންދާ ސަރުކާރެއް ނެތްކަމަށް އޭނާ ވިދާޅުވި އެވެ.

އެއާއެކު ޝިފާއު ވިދާޅުވީ މި ސަރުކާރުން ވައުދު ނުފުއްދާކަމަށް ބުނާ މެމްބަރުން އެ ވާހަކަދައްކަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ލިބިވަޑައިގަންނަވާނެކަން ޔަގީން ކުރެވޭތީ "ޑެސްޕަރޭޓު" ވެގެން ކަމަށެވެ.

އެމްޑީޕީން ނިކުމެ އާ ސިޔާސީ ޕާޓީއެއް އުފައްދައިގެން ސަރުކާރާއި ދެކޮޅަށް މަސައްކަތްކުރާ ނަޝީދުގެ މެމްބަރުންނަކީ ވެރިކަން ލިބި، ވެރިކަން ކުރާނެ ގޮތް ނޭނގުމުގެ ސަބަބުން ރައްޔިތުން ވޯޓުން ބަލިކޮށް އެކަހެރިކޮށްފައި ތިބި ބައެއްގެ ގޮތުގައި ޝިފާއު ވަނީ ސިފަކުރައްވާފަ އެވެ.