އެމްއާރުއެމް އުވާލުން ފަސްކުރަން ނެރުނު އަމުރު ދަމަހައްޓަވައިފި
ކުރީގެ ރައީސް އަލްއުސްތާޛް މައުމޫން އަބްދުލްޤައްޔޫމް އިސްވެ ހުންނަވައިގެން އުފައްދަވާފައިވާ މޯލްޑިވްސް ރީފޯމް މޫވްމަންޓް (އެމްއާރުއެމް) އުވާލަން އިލެކްޝަންސް ކޮމިޝަނުން ނިންމެވި ނިންމެވުމަށް ޢަމަލުކުރުން މަޑުޖައްސާލުމަށް ސިވިލް ކޯޓުން ނެރުއްވި އަމުރު ދަމަހައްޓައިފިއެވެ.
އެމްއާރުއެމް އުވާލަން އިލެކްޝަންސް ކޮމިޝަނުން ނިންމެވީ 3000 މެމްބަރުން ހަމަނުވެގެން ދެ ވަނަ ނޯޓިސްއެއް ދެއްވުމަށްފަހު މިދިޔަ މަހުގެ 24 ވަނަ ދުވަހުއެވެ.
އެ މައްސަލަ އެމްއާރްއެމްގެ ފަރާތުން ސިވިލް ކޯޓަށް ހުށަހެޅުމުން، ސިވިލް ކޯޓުން އަމުރު ނެރެފައިވަނީ، އެ ޕާޓީ އުވާލަން އީސީން ނިންމި ނިމުމަށް އަމަލުކުރަން މި ވަގުތަށް ފަސް ކުރުމަށެވެ. އީސީގެ ފަރާތުން ވަނީ އެ އަމުރު މުރާޖައާ ކޮށްދޭން އެދި ސިވިލް ކޯޓަށް ހުށަހަޅާފަ އެވެ.
އެ މައްސަލާގައި ސިވިލް ކޯޓުން އިއްޔެ ބުނީ، އަމުރު މުރާޖައާ ކޮށްދެވެން ނެތް ކަމަށެވެ.
އޭގެ ސަބަބެއް ކަމުގައި އެ ކޯޓުން ބުނީ, އީސީން ހުށަހެޅި ކަންކަމަށް ބަލާ، ގައިރު ހާޒިރުގައި އަމުރު ނެރެދިނުމަށް ހުރަސްއެޅޭ ފަދަ ހަގީގަތެއް އެމްއާރުއެމްގެ ފަރާތުން ހާމަނުކޮށް އޮތްކަން އީސީއަށް ބަޔާންކޮށްދެވިފައި ނުވާ ކަމަށެވެ.
އަދި އެމްއާރުއެމް އިން އަމުރަށް އެދި ހުށަހެޅި ހުށަހެޅުމަށާއި، އެއާ އެކު ހުށަހެޅި ލިޔެކިޔުންތަކަށް ބަލާއިރު ގައިރު ހާޒިރުގައި އަމުރު ނެރެދިނުމަށް ހުރަސްއެޅޭ ފަދަ ސަބަބުތަކެއް ހުރިކަމަށް ޝަރީއަތަށް ބުރަނުވެވޭ ކަމަށްވެސް ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
