"މަޖިލީހަށް އެންމެ ގިނައިން ޖަވާބުދާރިވެ، ސަރުކާރުގެ ކަންކަން އެންމެ ގިނައިން ހާމަކުރީ މިސަރުކާރުން"

މިހާތަނަށް ރާއްޖޭގައި ވެރިކަން ކުރި ސަރުކާރު ތަކުގެ ތެރެއިން، ރައްޔިތުންގެ މަޖިލީހަށް އެންމެ ގިނައިން ޖަވާބުދާރީވެ، ސަރުކާރުގެ މައުލޫމާތު ތައް އެންމެ ގިނައިން ހާމަކުރީ އަދުގެ ސަރުކާރުން ކަމަށް، އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ބ.ދަރަވަންދޫގައި ބޭއްވި ކެންޕެއިން ޖަލްސާގައި ވާހަކަ ދައްކަވަމުން ރައީސް ޞާލިހް ވިދާޅުވީ ހެޔޮ ވެރިކަމެއް ކުރުމަށް ބޭނުން ނަމަ, މަޝްވަރާކޮށް، އެހެން މީހުން ދައްކާ ވާހަކަ އަޑުއަހަންވާނެ ކަމަށާ އަދި އެހާ އަވަހަށް ރުޅި އިސްކޮށްގެން ނުވާނެ ކަމަށެވެ.

"ހެޔޮ ވެރިކަމެއްގެ ކުރަން ބޭނުންވާ ކަމަށް ވަންޏާ މި ތިން ކަންތައް ކުރަންޖެހޭނެ. އެހާ އަވަހަށް ރުޅި އިސްވެގެނެއް ނުވާނެ، މީހުންނާއި މަޝްވަރާ ކުރެވެން ޖެހޭނެ، މީހުން ދައްކާ ވާހަކަ އަޑުއަހަން ޖެހޭނެ. ރައްޔިތުން އިންތިހާބުކޮށްފައި ހުންނަ ވެރިޔަކު ރައްޔިތުންނަށްޓަކައި ވެރިކަމެއް ކުރާކަމަންވަންޏާ ކުރަންޖެހޭނެ ގޮތަކީ މީ."

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މިއާއެކު ހެޔޮ ވެރިކަމެއް ކުރާން ބޭނުންވާ ނަމަ، އެ ސަރުކާރެއް ޖަވާބުދާރީ ކުރެވެންޖެހޭނެ ކަން ފާހަގަކުރައްވައި ރައީސް ޞާލިހު ވިދާޅުވީ، ޖަވާބުދާރީ ވުމާއި މައުލޫމާތްތައް ހާމަކުރުމުގައި މިސަރުކާރުން މަސައްކަތް ކުރި ވަރަށް އެއްވެސް ސަރުކާރަކުން މަސައްކަތް ނުކުރާ ކަމަށެވެ.

"ސަރުކާރެއް ހިންގާއިރުގައި ޗެކްސް އެންޑް ބެލެންސް ސަރުކާރު ޖަވާބުދާރީ ވާން އެބަޖެހޭ. ހާމަކުރެވެން އެބަޖެހޭ ކަންތައްތައް. ހަމަޤައިމުވެސް މިސަރުކާރުވެގެންދާނެ ރައްޔިތުންގެ މަޖިލީހަށް އެންމެ ގިނައިން ޖަވާބުދާރީވި ސަރުކާރަކަށް. ރައްޔިތުންގެ މަޖިލީހަށް ވަޒީރުން ހާޒިރުވެ، ރައްޔިތުންގެ ފަރާތުން، މަޖިލީހުގެ މެންބަރުން ކުރެއްވި ސުވާލުތަކަށް މިއަށްވުރެ ގިނައިން ޖަވާބުދިން ސަރުކާރެއް ނޯންނާނެ. އަދި ރައިޓް ޓޫ އިންފޮމޭޝަން ޤާނޫނުގެ ދަށުން މައުލޫމާތު ހާމަކުރުމަށްޓަކައި 10،000 އަށްވުރެ ގިނަ މައުލޫމާތު ހޯދުމަށް މިސަރުކާރަށް ހުށަހެޅިގެންދިޔަ. އެއިން ކޮންމެ ކަމަކަށް އަޅުގަނޑުމެންވާނެ ތަފްސީލާއެކު މައުލޫމާތުދީފައި. އަދި މިހާތަނަށް މި ވޭތުވެދިޔަ އެއްވެސް ސަރުކާރަކުން ކޮށްފައި ނުވާވަރަށް ސަރުކާރުގެ މައުލޫމާތު ތައް ހާމަކޮށްފައި ވާނެ."

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު އިތުރަށް ވިދާޅުވީ އިންސާފު ޤާއިމުކޮށް އިންސާފު ހޯދައިދިނުމަށްޓަކައި މިސަރުކާރުން ޝަރުއީ ދާއިރާ މިނިވަން ކޮށްދީފައިވާ ކަމަށެވެ. އަދި ދެން ބޭނުންވާ ކަމަކީ ފަނޑިޔާރުންނަށް ފަސޭހަކަމާއެކު މަސައްކަތްކުރެވޭނެ މާހައުލަކާއި ވަސީލަތްތައް ޤާއިމުކުރުން ކަމަށް ވިދާޅުވިއެވެ. އަދި ފަނޑިޔާރުންނަށް ލިބޭ މުސާރައަށްވެސް ޖެނުއަރީން ފެށިގެން ބަދަލު ގެނެވޭނެ ކަމަށް ރައީސް ވިދާޅުވިއެވެ.