ރިޔާސީ ކެންޑިޑޭޓްކަން ލިބުމުގެ ކުރިންވެސް ރައީސް ޞާލިހު ރަށްރަށަށް ދަތުރު ކުރައްވާ: މާރިޔާ

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ރަށްރަށް ވަޑައިގެން އެ ރަށްރަށުގެ ރައްޔިތުންގެ ހާލު ބައްލަވަނީ ރިޔާސީ ކެންޑިޑޭޓްކަން ލިބިލެއްވީމަ ނޫން ކަމަށާއި، އޭގެ ކުރިންވެސް އަބަދުވެސް އެ މަނިކުފާނު ރަށްރަށަށް ވަޑައިގެން އެ ރަށްރަށުގެ ރައްޔިތުންގެ ހާލު ބައްލަވާ ކަމުގައި ރައީސް ޞާލިޙްގެ އިންތިހާބީ މަންދޫބު އަދި ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ.

ސޯލްޓް ކެފޭ ހުންނަ ޝައިންޓްރީ ބިލްޑިންގައި ގާއިމްކޮށްފައިވާ ރައީސް ސޯލިހުގެ ކެމްޕެއިން އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމެއްގެ ތެރެއިން، ރައީސް ޞާލިޙަށް ކެރިވަޑައިނުގަންނަވާ ދެކަމެއްގެ ގޮތުގައި ރިޔާސީ ބަހުސްގައި ބައިވެރިވެ ވަޑައިގަތުމާއި ހިޔާ ފްލެޓް ސަރަހައްދަށް ޒިޔާރަތްކުރުން ހިމެނޭނެކަމަށް އިދިކޮޅު ފަރާތްތަކުން ބުނަމުންދާ ބުނުމާއި ގުޅޭގޮތުން ނޫވެސްވެރިއަކު ވަނީ މާރިޔާ އާއި ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން މާރިޔާ ވިދާޅުވީ، ރައީސް ޞާލިޙްގެ ކެމްޕެއިންގެ ކަންކަން ކުރިއަށް ގެންދަވަނީ އިދިކޮޅު ފަރާތްތަކުން ބުނަމުންދާ އެއްޗަކަށް ބަލައިގެން ނޫންކަމަށާއި އެއީ އެމަނިކުފާނުގެ އުސޫލުތައް ހުންނާނެ ގޮތެއްވެސް ނޫންކަމަށެވެ.

ހަމައެއާއެކު މާރިޔާ ވިދާޅުވީ، ރައީސް ޞާލިހްގެ ބ އަތޮޅުގެ ކުދި ކުދި ރަށްތަކަށް ވަޑައިގަތުމުން ކުޑަ ކުޑަ އާބާދީއަކުން 250 މީހުން ނިކުމެ މަރުހަބާ ދަންނަވާކަމުގައެވެ.

އެހެންނަމަވެސް އިދިކޮޅު ކެންޑިޑޭޓް މުއިއްޒު އައްޑޫއަށް ވަޑައިގަތުމުން އެ މަނިކުފާނަށް މަރުހަބާ ދެންނެވުމަށްވެސް ނިކުތީ 250 މީހުން ކަމަށެވެެ.

ރައީސަށް ކުޑަ އާބާދީއަކުން އޮތް ތަރުހީބު އެ ދެއްކެނީ ބޮޑު އާބާދީއަކުން

މާރިޔާ

އެގޮތުން މާރިޔާ ވިދާޅުވީ އިދިކޮޅު ފަރާތްތަކުން އެފަދަ ވާހަކަތައް ދައްކަނީ ކަންބޮޑުވެގެން ކަމަށާއި ކުރިން ރައީސް ޞާލިޙް ސްލޯކަމަށް ވިދާޅުވެވެ ތިއްބާ ރަށްރަށުގެ މަޝްރޫޢުތައްް ނިންމަންފެށުމުން ހަމަ ވާހަކައެއް ދައްކަވަނީ ކަމުގައެވެ.