ރައްޔިތުން ތިބީ އެކައްޗެއް ކިޔައިގެން އުފާވެރި އަމާން ރާއްޖެއެއް ހޯދުމަށް: ރައީސް ޞާލިޙް
ދިވެހިރައްޔިތުން ތިބީ އެކައްޗެއް ކިޔައިގެން އުފާވެރި އަމާން ރާއްޖެއެއް ހޯދުމަށް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ރ.މީދޫގައި ބޭއްވި ބައްދަލުވުމެއް ގައި ވާހަކަ ދައްކަވަމުންނެވެ.
"އަޅުގަނޑަށް ފެންނަނީ ވަރަށް އުންމީދީ މަންޒަރެއް، އުފާވެރި އަމާން ރާއްޖެ ހޯއްދެވުމަށްޓަކައި ރައްޔިތުން އެކީ ނުކެމެތިއްބެވިތަން، އިރާދަކުރެއްވިއްޔާ މިއިންތިޚާބު ވެގެންދާނެ އެންމެ ބޮޑު ތަފާތަކުން އެއްބުރުން ނިމިގެންދާނެ އިންތިޚާބަށް" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ރައްޔިތުންގެ އިތުބާރު އެމަނިކުފާނަށް އޮތް ކަމަށެވެ. އަދި ވޭތުވެދިޔަ ތަނުގައި މިސަރުކާރުން ކުރި މަސައްކަތް އަދި ކުރަމުންދާ މަސައްކަތް ރައްޔިތުން ބަލައި ގަނެފައިވާ ކަމަށްވެސް ރައީސް ޞާލިޙް ވިދާޅުވިއެވެ.
ރައީސް ޞާލިޙުގެ ވާހަކަފުޅުގައި އިތުރަށް ވިދާޅުވީ އުފާވެރި އަމާން ރާއްޖެއެއް ހޯދައިދިނުމަށް މިކުރާ މަސައްކަތަކީ ރާއްޖެގެ ހުރިހާ ރައްޔިތުންނަށް ތަފާތުކުރުމެއް ނެތި އެކަން ހޯދައި ދިނުން ކަމަށާއި، އެއީ ވަކިރަށެއް ވަކި ފިކުރެއް ވަކި ވިސްނުމެއް އޭގައި ބެލުމެއް ނެތި ކޮންމެ ރައްޔިތަކަށް އެބޭނުންވަ އަސާސީ ހައްޤުތަކާއި ބޭނުންވާ މިނިވަންކަމާއި ބޭނުންވާ ފުދުންތެރިކަން އެމީހަކަށް އެއާއިލާއަކަށް ހޯދައިދިނުން ކަމަށެވެ.
ހަމައެއާއިއެކު ކުރިއަށް އޮތް ދައުރުގައިވެސް ކަންތައްތައް ރޭވިގެން ހިނގަމުންދާނީ އެގޮތައް ކަމަށް ރައީސް ވިދާޅުވިއެވެ. އަދި އެއްވެސް ރަށެއް ތަފާތުކުރުމެއް ނެތި މަޝްރޫޢުތައް ކުރިއަށް ގެންދަވާނެ ކަމަށް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ކުރިން މީދޫއަކީ ވަކި ޕާޓީއެއްގެ ޖަގަހައެކޭ ބުނާ މިންވަރަށް އެއްޕާޓީއަކަށް ތާއީދު ކުރި ބައެއް ކަމަށާއި، ނަމަވެސް މިހާރު މީދޫގެވެސް ގިނަ މީހުން ތިބީ ރަށުތަރައްޤީއާއި އެކު ކުރިއަށްދާން ނިންމައިންގެން ކަމަށެވެ.
ރައީސް ޞާލިޙް ވިދާޅުވީ ސިޔާސީ ޙިޔާލު ތަފާތުވުނަތަކެއް ހުއްޓަސް މީދޫ ރައްޔިތުންވެސް މިހާރު ބޭނުންވަނީ ރަށުގެ ތަރައްޤީ ކަމަށެވެ.
ރައީސް ޞާލިޙް ރ.އަތޮޅަށް ކުރައްވަމުން މިގެންދަވާ ދަތުރުފުޅުގައި ރ.އަތޮޅުގެ ގިނަ ރަށްތަކަކަށް ވަޑައިގަތުމަށް ވަނީ ހަމަޖެހިފައެވެ. އިންތިޚާބަށް 16 ދުވަހަށް ވެފައިވާއިރު އިންތިޚާބުގައި ވާދަކުރައްވާ ހުރިހާ ކެންޑިޑޭޓުންވެސް މިހާރު ވަނީ ކެމްޕޭނުގެ ފޯރި ވަރަށްބޮޑަށް ގަދަކުރައްވައިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
