ނުބައި ކެންޑިޑޭޓަށް ލާ ވޯޓުގެ ޒިންމާ އެ ރައްޔިތަކު އުފުލަން ޖެހޭނެ: އަލީ ހުސެއިން

ވެރިކަމަށް ކުފޫހަމަނުވާ މީހަކަށް ލާ ވޯޓުގެ ޒިންމާ އެ ރައްޔިތަކު އުފުލަން ޖެހޭނެކަމަށް ރައްޔިތުންގެ މަޖިލީހުގައި ޖުމްހޫރީ ޕާޓީ ތަމްސީލު ކުރައްވާ ކެންދީ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ.

އަލީ ހުސެއިން މިފަދައިން ވިދާޅުވެފައިވަނީ ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ނ މާފަރަށް ކުރެއްވި ކެމްޕޭނު ދަތުރުފުޅުގައި ރައްޔިތުންނާއި ބައްދަލުކުރުމަށް ބޭއްވި ޖަލްސާއެއްގައި ވާހަކަދައްކަވަމުން ނެވެ.

އަލީ ހުސެއިން ވިދާޅުވީ މިއަދު ދިވެހިރާއްޖެ މި އޮތީ ވަރަށް ނާޒުކު ހާލަތެއްގައި ކަމަށެވެ. ދައުލަތުގެ ހިންގުމުގެ ނިޒާމުތަކަށް އެކަނި ބަލާލި ނަމަވެސް ގައުމުގެ ހާލަތު ސާފުކޮށް އެނގިގެންދާނެ ކަމަށާއި، އެހެންކަމުން ސެޕްޓެމްބަރު މަހުގެ 9 ގައި ލާ ވޯޓަކީ ވަރަށް އަމާނާތްތެރިކަމާއެކު ގައުމުގެ ހާލަތު ބަދަލުކުރުމަށް ލާ ވޯޓަކަށް ހައްދަވަން ޖެހޭކަމަށް އަލީ ހުސެއިން ވިދާޅުވި އެވެ.

އެއާއެކު އޭނާ ވިދާޅުވީ، އެކަމަށް ރިއާޔަތްކުރުމެއް ނެތި ވެރިކަމަށް ގެންނަން ނުޖެހޭ މީހަކަށް ވޯޓުލައިގެން، އޭގެ ނިކުންނަ ނުރަނގަޅު ނަތީޖާތަކުގެ ޒިންމާ ނުބައި ކެންޑިޑޭޓަށް ވޯޓުދިން ރައްޔިތުން ނަގަން ޖެހޭނެކަމަށް ދެކެވަޑައިގަންނަވާ ކަމަށެވެ.

"ވިސްނަން ޖެހޭ 9 ސެޕްޓެމްބަރުގައި ތިޔަބޭފުޅުން ވޯޓުލާއިރުގައި އެއީ ހަމައެކަނި ލާ ވޯޓެއް ނޫންކަން. އެއީ ތިޔަބޭފުޅުންނާއި މަތިކުރެވިފައިވާ ވަރަށް ބޮޑު އަމާނެއްތެއްކަން ތިޔަ ބޭފުޅުން ޖެހޭ ހަނދާން ކުރަން. އެ އަމާނާތް އަދާކުރުމުގައި އެ އަމާނާތައް ޚިޔާނާތްތެރިވެއްޖެކަމަށް ވާނަމަ އެކަމުގެ ޒިންމާ، ނުވަތަ އޭގެ ސަބަބުން ލިބޭ ދެރަ ނިކަމެތިކަމެއްގެ ޒިންމާ އަޅުގަނޑު ދަންނަވާނީ ގޯސްކޮށް، ނުބައި ކެންޑިޑޭޓަކަށް ނުވަތަ ރައީސުލްޖުމްހޫރިއްޔާ ކަމަށް ހޮވަން ނުޖެހޭ ކެންޑިޑޭޓަކަށް ވޯޓުލައްވާ ކޮންމެ ބޭފުޅަކު ވެސް އެ ޒިންމާ ނަންގަވަން ޖެހޭނެ"

ކެންދޫ ދާއިރާގެ މެމްބަރު އަލީ ހުސެއިން

އަލީ ހުސެއިން ވިދާޅުވީ ދިވެހިރާއްޖޭގައި މަލްޓި ޕާޓީ ޑިމޮކްރަސީ ތައާރަފުވެ، ވެރިކަން ކުރަން ފެށި ހިސާބުން ފާއިތުމިވީ 15 އަހަރު ދުވަހުގެ ތެރޭގައި ބޮޑު ދެ ޕާޓީއެއްގެ މެދުގައި ވެރިކަން ބެހިއްޖެ ކަމަށެވެ.

އެގޮތުން މިހާރު ވެރިކަން ކުރަމުންދާ މައި ޕާޓީ އެމްޑީޕީއަށް ދެފަހަރު ވެރިކަން ހަވާލުކުރެވިއްޖެ ކަމަށާއި، ޕީޕީއެމަށް ވެސް ދައުރެއް ދެވިއްޖެކަމަށެވެ.

އެހެންކަމުން ދެޕާޓީގެ މެދުގައި ވެރިކަން ބަހައިގެން ރައްޔިތުންނާއި ގައުމަށް ލިބުނީ ކުރިއެރުންތޯ ނޫނީ ގައުމުގެ ކަންކަން ދިފައީ ފަހަތަށްތޯ އަންނަ ސެޕްޓެމްބަރު މަހުގައި ވޯޓުލާއިރު ރައްޔިތުން ވަރަށް ފުންކޮށް ވިސްނުމަށްފަހު ގޮތްނިންމެވުމަށް އެދިވަޑައިގަންންވާކަމަށް އަލީ ހުސެއިން ވިދާޅުވި އެވެ.