އެންމެންގެ ސަލާމަތަށްޓަކައި ހެދިފައިވާ ގަވާއިދުތަކަށް ހުރުމަތްތެރިކޮށް ހިތަންވާނެ: ޚުތުބާ
ތިމާ އާއި މުޖުތަމައުގެ ސަލާމަތާއި ރައްކާތެރިކަމަށްޓަކައި ހެދިފައިވާ ގަވާއިދުތަކަށް ހުރުމަތްތެރިކޮށް ހިތަންޖެހޭނެ ކަމަށް މިއަދުގެ ޚުތުބާގައި ގޮވާލައިފިއެވެ.
"ރައްކާތެރިކަމުގެ ފިޔަވަޅުތައް ހަރުދަނާ ކުރުން" މި މައުޟޫއަށް މިއަދު އިއްވި ޚުތުބާގައި ބުނީ، އިސްލާމް ދީނުގައި އިންސާނާގެ ނަފްސުގެ ދަރަޖަ މަތިވެރި ކުރައްވައި އެ ނަފްސަށް ހުރުމަތްތެރިކޮށް ހިތުމަށް އަންގަވާފައިވާކަމަށެވެ.
އަދި އަހަރެމެން ކުރާ ކޮންމެ ކަމެއްވެސް ކުރަންވާނީ ސަލާމަތީ ސަބަބު ތަކުގައި ހިފަހައްޓައިގެން ކަމަށް ވާއިރު، މިއަދު ގިނަ ބަޔަކު ވަނީ އެކަމާއިމެދު އިހުމާލު ވެފައި ކަމަށްވެސް ޚުތުބާގައި ބުނެފައިވެއެވެ. އެގޮތުން ގޯތި ގެދޮރު އެޅުމުގައި ފަރުވާ ކުޑަކޮށް އަޅަންޖެހޭ ސަލާމަތީ ފިޔަވަޅުތައް ނޭޅުމުގެ ސަބަބުން ވަރަށް ގިނަ ހިތާމަވެރި ހާދިސާތައް ހިނގަމުން އަންނަ ކަމަށް ޚުތުބާގައި ބުނެފައިވެއެވެ.
އެހެންކަމުން ގޯތި ގެދޮރު އެޅުމުގަޔާއި، ކަނޑުދަތުރުފަތުރު ކުރާ އުޅަނދުތައް ބޭނުން ކުރުމުގަޔާއި، މޫދަށް އެރުމާއި، ފީނުމާއި، އެއްގަމު ދުއްވާ އުޅަނދުތައް ދުއްވުންފަދަ އެންމެހައި ކަންތައްތަކުގައިވެސް އަހަރެމެން ސަލާމަތީ ފިޔަވަޅުތައް އަޅަންޖެހޭނެ ކަމަށް ޚުތުބާގައި ވަނީ ނަސޭހަތްތެރިވެފައެވެ.
"މިފަދަ ކަންކަމުން އިހުމާލުވެއްޖެނަމަ، އޭގެ ސަބަބުން ދިމާވެދާނެ ހިތާމަވެރި ހާދިސާ އަކާމެދު ވިސްނަންޖެހޭނެއެވެ. ތިމާއާއި މުޅި މުޖުތަމައުގެ ސަލާމަތާއި ރައްކާތެރިކަމަށްޓަކައެވެ. އެހެން ކަމުން އެންމެންގެ ސަލާމަތާއި ރައްކާތެރިކަމަށްޓަކައި ހެދިފައިވާ ގަވާއިދުތަކަށް ހުރުމަތްތެރިކޮށް ހިތަންޖެހޭނެއެވެ. އެ ގަވާއިދު ތަކާއި ޚިލާފުވުމުގެ ސަބަބުން މީހެއްގެ ފުރާނައަށް ގެއްލުން ވެއްޖެ ނަމަ އެކަމުގެ ޒިންމާވެސް އުފުލަންޖެހޭނެ އެވެ." ޚުތުބާގައި ބުނެފައިވެއެވެ.
މީގެ އިތުރުން، މަގުމަތީގައި ހިނގާ މީހުންނަށާއި، ދުއްވާ އެއްޗިއްސަށް އުނދަގޫވާގޮތަށް ހުންނަ ތަކެތި އެއްފަރާތްކޮށް މަގުމަތި ސާފުކުރުމަކީވެސް ރައްކާތެރިކަމުގެ ގޮތުން އެޅޭނެ ފިޔަވަޅެއް ކަމަށާ، އަދި އެއީ އީމާންކަން ފުރިހަމަ ވުމުގެ ތެރޭގައިވެސް ހިމެނޭ ކަމެއް ކަމަށް ޚުތުބާގައި ބުނެފައިވެއެވެ.
އެހެންކަމުން ސަލާމަތީ ސަބަބު ތަކުގައި ހިފައި، މުދަލަށާއި ފުރާނައަށް ލިބިދާނެ ގެއްލުން ތަކުން ސަލާމަތްވުމަށް ދުއާކޮށް ޒިކުރު ކުރުންމަތީ ތިބުމަށްވެސް ޚުތުބާގައި ވަނީ ނަސޭހަތްތެރިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
