ސަރުކާރުގެ ބައެއް ކުންފުނިތަކުގައި އިށީންނާނެ ގޮނޑިއެއް ނެތް ވަރަށް މުވައްޒަފުން ނަގާފައި އެބަހުރި: އަފީފު
ސަރުކާރުގެ ބައެއް ކުންފުނިތަކުގައި އިށީންނާނެ ގޮނޑިއެއް، ކުރާނެ ކަމެއް ނެތް ވަރަށް މުވައްޒަފުން ނަގާފައި އެބަހުރި ކަމަށާ އެފަދަ ކަންކަން ބެލެންޖެހޭ ކަމަށް ވިލުފުށީ ދާއިރާގެ މެންބަރު ހަސަން އަފީފު ވިދާޅުވެއްޖެއެވެ.
މަޑުއްވަރި ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ، ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސްކުރުމަށާއި ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި ދަރަނިތައް އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލައި ހުށަހަޅާ ޤަރާރަށް މިއަދުގެ މަޖިލީހުގެ ޖަލްސާގައި ބަހުސް ކުރައްވަމުން އަފީފު ވިދާޅުވީ، ފެނަކައިގެ މަތިބަރު ކަމުގެ ވާހަކަ އިވެމުންދާ ކަމަށެވެ. އެގޮތުން، ފެނަކައަށް ނަގާފައިވާ އެތައް މުވައްޒަފުންނަކީ އެ ކުންފުންޏަށް ބޭނުންވެސް ނުވާ މުވައްޒަފުން ކަމަށެވެ.
މަސައްކަތް ކުރުވަންޖެހޭނީ އެ މަސައްކަތައް އެކަށީގެންވާ މީހުން ހޯދައިގެން. ބައެއް ކުންފުނި ތަކުގައި އެބަހުރި އެތަނަށް ވަދެލާފައި ސޮއި ކޮށްލާފައިދާ މީހުން. އެމީހުންނަށް އިށީންނާނެ ގޮނޑިއެއްވެސް ނެތް ބައެއް ތަންތަނުގައި. އެހާ މުވައްޒަފުން އެބަތިބި ގިނަ ކޮށްފައި. މިއީ އެއްވެސް ހާލެއްގައި ދައުލަތުގެ ފައިސާ ޚަރަދުކުރަންޖެހޭނެ ގޮތެއް ނޫން. މިގޮތަށް ޚަރަދު ކުރެވިގެންވެސް ނުވާނެ. މިގޮތަށް ޚަރަދު ކޮށްފައިވާ ފައިސާ އެއީ ކޮން ގޮތަކަށް ކޮށްފައިވާ ޚަރަދެއްތޯވެސް ބަލަންޖެހޭ.
މެންބަރު ހަސަން އަފީފު
އަފީފު ވިދާޅުވީ, ސަރުކާރު ކުންފުނިތަކުގެ މަތިބަރު ކޮށްގެން ޚަރަދު ކުރަމުންދަނީ ދިވެހި ރައްޔިތުންގެ ފައިސާ ކަމަށެވެ. އަދި އެ ފައިސާ ޚަރަދުކުރާންޖެހޭނީ ދިވެހި ރައްޔިތުންނަށް ފައިދާވާގޮތަށް، އެއްވެސް އިސްރާފެއް ނުވާ ގޮތަށް ކަމަށެވެ.
އެހެން ނަމަވެސް ފެންނަމުން ދަނީވއެ އުސޫލާ ޚިލާފަށް ސަރުކާރު ކުންފުނިތަކުގެ ފައިސާ ބޭނުން ކުރެވެމުންދާތަން ކަމަށާ، އެކަން ކަން ބެލެންޖެހޭ ކަމަށް އަފީފު ވިދާޅުވި އެވެ. އަދި އެކަމުގައި ޒިންމާވާ ފަރާތްތަކާ މެދު ގާނޫނީ ފިޔަވަޅު އެޅެންޖެހޭނެ ކަމަށް އޭނާ ވިދާޅުވި އެވެ. އެހެން އެކަން ނުކޮށްފިނަމަ ފެންނާނީ ބޭކާރު، އަދި ނާޖައިޒް ޚަރަދުތައް ކުރަމުންދާތަން ކަމަށްވެސް އޭނާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
