ދުނިޔޭގެ ގައުމުތަކުގެ ގަދަހިފުމުގެ ތެރޭގައި ރާއްޖެ ފިތެން ފުރުސަތެއް ނުދޭނަން: ޑރ.މުޢިއްޒު
ދުނިޔޭ ގަދަ ބާރުތަކުގެ ގަދަ ހިފުމުގެ ތެރޭގައި ރާއްޖެ ފިތެން ފުރުސަތެއް ނުދެއްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އިނގިރޭސި ވިލާތުގެ ބީބީސީއަށް ދެއްވި ޚާއްސަ ބަސްދީގަތުމެއްގައި އެ ނޫހުން ވަނީ ޑރ.މުޢިއްޒު ގެންގުޅުއްވާނެ ޚާރިޖީ ސިޔާސަތު ތަކާއި ގުޅިގެން ސުވާލުތައް އަމާޒުކޮށްފައެވެ. އެގޮތުން، އިންޑިއާ އަދި ޗައިނާ އާއި މެދު ބައްވާނެ ގުޅުމާއި ބޭރުގެ ސިފައިން ރާއްޖޭގައި ތިބުމާއި މެދު އެމަނިކުފާނު ކެންޕެއިންގެ ތެރެއިން ވެވަޑައިގެންނެވި ވަޢުދާއި ގުޅޭގޮތުން ވެސް ބީބީސީން ސުވާލު ކޮށްފައިވެއެވެ.
އެސުލުތަކަށް ޖަވާބުދެއްވަމުން ޑރ. މުއިއްޒު ވިދާޅުވީ، ނިމިގެން ދިޔަ ރިޔާސީ އިންތިހާބުގެ ނަތީޖާއިން، އިންޑިއާ ސިފައިން އެއްވެސް ސިފައެއްގައި ރާއްޖޭގައި ތިބެން ދިވެހިން ބޭނުން ނުވާކަން ރައްޔިތުން ހާމަކޮށްދީފައިވާކަމަށެވެ. އެހެންކަމުން އެމަނިކުފާނު ވެވަޑައިގެންނެވި އެ ވައުދު ފުއްދެވުމަށް ފުރަތަމަ ދުވަހުން ފެށިގެން މަސައްކަތް ފައްޓަވާނެކަމަށް އެމަނިކުފާނު ވިދާޅުވިއެވެ.
"އަޅުގަނޑުމެން ބޭނުމެއްނޫން ބޭރުގެ އެއްވެސް ގައުމެއްގެ ސިފައިން މި ފަސްގަނޑުގައި ތިބޭކަށް. އަޅުގަނޑު ދިވެހި ރައްޔިތުންނަށް ވާނީ އެކަމަށް ވަޢުދުވެފައި. އަދި އެ ވައުދުމަތީގައި އަޅުގަނޑު ދެމި ހުންނާނަން. އެ ވަޢުދު ފުއްދުމުގެ މަސައްކަތް ފުރަތަަމަ ދުވަހުގައި ފަށްޓާނަން."
އިންތިޚާބީ ރައީސް ޑރ މުހައްމަދު މުއިއްޒު
މީގެ އިތުރުން މުޢިއްޒު ވަނީ، އިންްޑިޔާއާއި އެކު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން ވެފައިވާ ގޮތް ނޭނގޭ އެއްބސްވުންތައްވެސް ބައްލަވާނެ ކަމަށެވެ.
"އަހަރެމެންނަކަށް ނޭނގެ އޭގައި ހުރި އެއްޗެއް. ރައްޔިތުންގެ މަޖިލީހުގައި ވެސް މަޖިލީހުގެ ބައެއް މެންބަރުން ބުނެފައި އެބަހުރި އެ އެއްބަސްވުންތަކުގައި ހުރި އެއްޗެއް މެންބަރުންނަށް ނޭނގޭ ކަމަށް. އަޅުގަނޑަށް ޔަގީން އަޅުގަނޑުމެންނަށް އެކަން ހޯދޭނެކަން"
އިންތިޚާބީ ރައީސް ޑރ މުހައްމަދު މުއިއްޒު
މުޢިއްޒު އިތުރަށް ވިދާޅުވީ، ހިމާލަޔާ ބޯޑަރު ސަރަހައްދުގައި ޗައިނާ އާއި އިންޑިއާއާ ދެމެދު މަސްރަހު ހޫނުވެފައިވާއިރު، އިންޑިއާ ސިފައިން ރާއްޖޭގައި ގާއިމުވެ ތިބުމަކީ ރާއްޖެ ބޮޑު ނުރައްކަލަކަށް ހުށަހެޅުން ކަމަށެވެ. އަދި ދުނިޔޭގެ ގަދަ ބާރުތަކެއްގެ ގަދަހިފުމުގެ ތެރޭގައި ފިތޭ ވަރަށް ވުރެ ރާއްޖެ މާ ކުޑަކަމަށްވެސް އެމަނިކުފާނު ވިދާޅުވި އެވެ.
"ދުނިޔޭގެ ގަދަ ބާރުތަކެއްގެ ގަދަހިފުމުގެ ތެރޭގައި ފިތޭ ވަރަށް ވުރެ ރާއްޖެ މާ ކުޑަ. އަޅުގަނޑުމެންނަށް އެ ފުރުސަތެއް ނުދެވޭނެ"
އިންތިޚާބީ ރައީސް ޑރ މުހައްމަދު މުއިއްޒު
މީގެއިތުރުން ޑރ. މުއިއްޒު ވިދާޅުވީ އެމަނިކުފާނު "ޕްރޯ-މޯލްޑިވްސް" ކަމަށާއި އެމަނިކުފާނަށް އަބަދުވެސް އެންމެ ފުރަތަމަ އަންނާނީ ރާއްޖެ ކަމަށެވެ. އަދި އެމަނިކުފާނަށް އެންމެ ފުރަތަމަ އެންމެ އިސްކަންދެއްވާނީ ރާއްޖޭގެ މިނިވަންކަން ކަމަށް ކަމަށާއި އެމަނިކުފާނު އެހެން ގައުމަކާ އެއްކޮޅެއް ވެސް ނުވަތަ ދެކޮޅެއް ވެސް ނޫންކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
